Alkitab Mobile SABDA
[VER] : [TABARU]     [PL]  [PB] 
 <<  Galatia 3 >> 

1'Esa moi riaka dodoto 'o Galatia ma nyawa! Ma goungu ngini niohaga-haga! Poilia naga moikani manga bo-baja nidaenokau! Ma Kristus wosongene 'o salipoka tosiwaiti 'iti-tiai mongau nginika.

2Bika naneda moi niosidemo ngoino: Ngini niamakekau 'o Ngomasa 'Itebi-tebini ge'ena sababu niamoteke 'o 'agama ma besesongo? bolo sababu ngini nio'isene 'o Habari ma Owa ma Jo'oungu ma Dutuno de niongaku ma Kristusika?

3Ge'ena 'ido'oa so niohaga-haga koge'ena! Ngini niokuruekau nio'ahu de 'o Ngomasa 'Itebi-tebini, de kokia so ne'ena ngini niomau nimadotomo ka de to ngini ma sirete nia guata?

4Gee niamao-maokau ge'ena 'iodumu kaiparacuma? Ge'ena kaiparacumawa!

5Ma Jo'oungu ma Dutu 'o Ngomasa 'Itebi-tebini winikula de 'o no-nako 'ihera-herangi wokadiai naga nginioka. Ma Jo'oungu ma Dutu wodiai ge'ena sababu 'o 'agama ma besesongo niamoteke? bolo sababu nio'isene 'o Habari ma Owa de niongaku ma Kristusika?

6Ge'ena 'isoka naga 'o Buku 'Itebi-tebinoka 'isilefoku ma ngale 'o Abraham, 'isilefoku konee, "'O Abraham wongaku ma Jo'oungu ma Dutuka, de sababu to 'una 'awi ngo-ngaku ge'ena so ma Jo'oungu ma Dutu wongose 'ato to 'una wi singina 'itiai."

7So salingou nianako 'ato 'o nyawa gee ma gou-goungu manga 'asali 'o Abrahamuno ge'ena la 'o nyawa gee yongaku-ngaku ma Jo'oungu ma Dutuka.

8'O Buku 'Itebi-tebini 'isira 'inasimarangiokau 'ato ma Jo'oungu ma Dutu womau la ko 'o Yahudiokawa mita yomarimoioli de de 'una nako la yongaku 'unaka. 'O Habari ma Owa ge'ena 'isira 'o Abrahamuka wisitotara 'o jajioka konaneda, "Ma ngekomo ngona, ma Jo'oungu ma Dutu 'asa wakisibarakati 'o nyawa 'iodumu 'o duniaka ne'ena."

9'O Abraham wongaku, so wisibarakati. Koge'enali mita 'o nyawa yongaku-ngaku 'iodumu 'asa yakisibarakati 'isoka 'o Abraham.

10'O nyawa 'iodumu gee yomasiga-gao 'o 'agama ma besesongoka, 'ona ge'ena yo'ahu 'o gorosau ma dodaka. Sababu 'o Buku 'Itebi-tebinoka 'isilefoku, "'O nyawa gee koyosigou-gounguwa yamoteke 'iodumu gee 'isilefo-lefoku 'o 'agama ma besesongo ma bukuoka, ge'ena ma Jo'oungu ma Dutu wakikorosau!"

11Komoiwa 'idadi yomarimoioli de ma Jo'oungu ma Dutu sababu yamoteke 'o 'agama ma besesongo. Ge'ena 'isidemokau 'o Buku 'Itebi-tebinoka konee, "Ka 'o nyawa yongaku-ngaku duga 'idadi yotiai ma Jo'oungu ma Dutu 'awi bionoka, 'ona 'asa yo'ahu."

12Ma 'o 'agama ma besesongo ge'ena ma titi ko 'o ngo-ngakuwa. 'O Buku 'Itebi-tebinoka 'ingose 'ato 'o nyawa gee yamote-moteke 'o 'agama ma besesongo, salingou yakokimoteke 'o besesongo ge'ena la yo'ahu.

13'O 'agama ma besesongo ge'ena kopa'akunuwa pamoteke 'iodumu so pamake 'o gorosau. Duga ma Kristus wonasisupuokau 'o gorosauoka ma ngekomo 'una wamoku 'o gorosau ge'ena sababu wonadora ngone. Sababu 'o Buku 'Itebi-tebinoka 'isilefoku konee, "'O gorosau widaene 'una gee wisidelika 'o salipoka de wosongene."

14Ma Kristus koge'ena wodadi, la 'o barakati gee ma Jo'oungu ma Dutu wosijajiokau 'o Abrahamuka ge'ena ko 'o Yahudiokawa mita yamake. Koge'enali mita ngone, sababu pongaku ma Jo'oungu ma Dutuka so padawongo 'o Ngomasa 'Itebi-tebini gee wosijajiokau.

15'Esa moi riaka dodoto! Yaowa tosi'ade-'ade de 'okia naga gee 'o nyawa kaitaurika yadi-diai ngoneka naga. Ge'ena la nako naga yomakajaji de 'o jaji ge'ena yaputusokau, ge'ena koidadiwau yatagali bolo yadogo.

16Niosi-singina, ma Jo'oungu ma Dutu wositotara 'awi jaji moi-moi 'o Abrahamuka de wi waatuku womatengo. 'O Buku 'Itebi-tebinoka koisilefokuwa 'ato "de 'o nyawa-nyawaka 'o Abraham wi waatuku", ge'ena la 'o nyawa manga gudai. Ma 'ena 'isilefoku ge'ena la, "de wimoi 'ani waatuku". Ge'ena ma ngale kawimoi duga, ge'ena la ma Kristus.

17'Ai dumutu ge'ena koneda: 'O 'agama ma besesongo koi'iwasi 'ena ma Jo'oungu ma Dutu 'awi jaji wositatapuokau. So 'o 'agama ma besesongo koidadiwa yaisanga ma Jo'oungu ma Dutu 'awi jaji gee wosita-tatapuokau ge'ena, sababu ma Jo'oungu ma Dutu 'awi jaji wositatapuoka 'o taunu 430 'asa de 'o 'agama ma besesongo 'isupu.

18Sababu nako ma Jo'oungu ma Dutu 'o co-catu wokula ge'ena moteke 'o 'agama ma besesongo, ge'ena gee wokula-kulakau ge'ena sababu ko 'awi jajiwa. Ma ngano ma Jo'oungu ma Dutu wosijajiokau 'o Abrahamuka so wokula 'o barakati.

19So nako koge'ena, de 'o 'agama ma besesongo ma Jo'oungu ma Dutu wokulano ge'ena ma dumutu 'okia? Ma dumutu la 'o besesongo ge'ena 'isidogo la panako 'ato ngone ne'ena 'o nyawa posowo-sowono. 'O 'agama ma besesongo kaipakesi duga ka sigado ma 'orasi 'o Abraham 'awi waatuku wimoi woboa, gee 'isoka ma Jo'oungu ma Dutu wangosekau 'awi jajioka 'o Abrahamuka. 'O 'agama ma besesongo ge'ena 'o mala'ekati ngai muruo naga 'isitotara ma ngekomo wimoi wodadi wositota-totara.

20Aa, salingou naga 'o nyawa 'o bolu modidioka 'asa de poparaluu wimoi wositota-totara nanga 'ilingi. Duga ma Jo'oungu ma Dutu 'una kowoparaluuwa wimoi wositota-totara, sababu ka 'unau ma sirete wobicara ma ngale wojaji 'o Abrahamuka.

21Nako koge'ena de 'o 'agama ma besesongo de ma Jo'oungu ma Dutu 'awi jaji 'imakatilikutino? Ma gou-goungu ko'uwa! Sababu nako ma Jo'oungu ma Dutu wokula 'o 'agama ma besesongo la 'o 'ahu ma dutu pamake, ge'ena ma ngale 'o nyawa manga 'ahu 'itiai ma Jo'oungu ma Dutu wi bionoka ma ngekomo 'o 'agama ma besesongo.

22Duga 'o Buku 'Itebi-tebinoka 'ingose 'ato 'o nyawa 'iodumu 'o sowono 'inaparetano. Ge'ena ma ngale duga kapongaku ma Yesus Kristusika, ngone pamake 'o barakati gee ma Jo'oungu ma Dutu wosijajiokau 'o Abrahamuka.

23Duga ma 'orasi koya'adonuawasi ngone pongaku ma Kristusika, ngone 'o 'agama ma besesongo 'inakuasano. Matero kainabuika de 'inajaga 'inasidi-diai sigado ma 'orasi ya'adono ma Jo'oungu ma Dutu wosidumutu 'itiai ma ngale pongaku ma Kristusika.

24So 'o 'agama ma besesongo ge'ena 'inasilega-lega sigado ma Kristus woboa ma ngale 'inadiai ngone pasanangi ma Jo'oungu ma Dutu 'awi singina sababu pongaku ma Kristusika.

25Sababu ne'ena ma 'orasi ya'adonokau ngone pongaku ma Kristusika, so 'o 'agama ma besesongo koinasilega-legawau.

26Ngini nioodumu niodadi ma Jo'oungu ma Dutu wi ngowa-ngowaka sababu niongaku ma Yesus Kristusika.

27Sababu ngini nioodumu ni'osikokau de ma Yesus Kristus 'awi ronga ma ngale niomarimoi de de 'una, so ngini nio'ahu 'isoka ma Kristus ma sirete 'awi 'ahu ma jako.

28Ne'ena dau ma dodaka ge'ena koisikaregu-reguwau 'o Yahudioka de ko 'o Yahudiokawa, 'o yongosi de ko 'o yongosuwa, 'o ngeweka de 'o nauru. Ngini nioodumu ge'ena ka moi sababu nio'ahu de ma Kristus Yesus.

29De sababu ngini ge'ena to ma Kristus, so ngini ge'ena 'o Abraham 'awi waata. De ngini 'asa nimadamake 'okia naa gee ma Jo'oungu ma Dutu wosijajiokau.


  Share Facebook  |  Share Twitter

Download Audio MP3 (Galatia 3):
Mobile (Low Quality) - CD (High Quality)

 <<  Galatia 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel