Alkitab Mobile SABDA
[VER] : [TABARU]     [PL]  [PB] 
 <<  Galatia 4 >> 

1'Ai dumutu ge'ena la: Kokia naga ma do'ingo 'o warisi ma dutu kowobalusuawasi ge'ena naga 'o nyawa wisilega-legasi de wi'aturu sigado ya'adono 'awi 'umuru gee ma dea wositatapuokau ma ngale 'una ma sirete wa'urusu 'awi warisi. 'O ngowaka gu'una salingou wo'ise-'isene 'awi balusika 'isoka 'o yongosi moi ma ngale koidadiwasi 'una ma sirete woma'aturu, ngaro 'una ge'ena 'o sagala moi-moi ma warisi ma ga-gao.

2(4:1)

3Koge'enali mita ngone: Ma 'orasi ngone koposikanakowasi ma Jo'oungu ma Dutu 'awi mau, ngone 'inaparetano 'o sagala ngomasa gee yapa-pareta 'o dunia ne'ena.

4Ma ma 'orasi yadae-daenuku gee ma Jo'oungu ma Dutu wositatapuokau, so ma Jo'oungu ma Dutu wosiguti 'awi Ngowaka 'o duniaku. 'O ngowaka gu'una 'o ngeweka mimoi mosilahiri de wamoteke 'o 'agama ma besesongo.

5De ge'enau 'una wakisipidili 'o nyawa gee yo'ahu 'o 'agama ma besesongo yakiparetano; la ngone poodumu podadi ma Jo'oungu ma Dutu 'awi ngowa-ngowaka.

6Sababu ngini ge'ena ma Jo'oungu ma Dutu 'awi ngowa-ngowaka, so ma Jo'oungu ma Dutu wosuloko 'awi Ngowaka wi Ngomasa 'iwosanga to ngone poodumu nanga singinaka. 'O Ngomasa 'Itebi-tebini ge'enau 'inasi'asa so ngone pomasigasoko, "Ee 'Aba, 'ai Dea!"

7So ngini ne'ena ka 'o yongosuwau ma 'ena 'o ngowaka. De sababu ngini ge'ena ma Jo'oungu ma Dutu 'awi ngowaka, so ma Jo'oungu ma Dutu 'asa winikula 'okia sonaa gee wadua-duangou ma ngale 'awi ngowa-ngowaka.

8Ma sira ngini kowininakowa ma Jo'oungu ma Dutu, ge'enau so ngini nioyongosika 'o sagala gee de ma kuasaka gee ngini niongose 'o jo'oungu, 'ena momongo ma gou-goungu ko ma Jo'oungu ma Dutuwa.

9Ma ne'ena ngini wininakokau ma Jo'oungu ma Dutu, bolo 'ifoloi yadaene ge'ena ma Jo'oungu ma Dutu wininakokau ngini. De 'ido'oa so ngini niomau niogilioli 'o sagala ngomasika 'o duniaka ne'ena, gee koya'akunuwa 'inariwo de kokiawa 'inakula? 'Ido'oa so ngini niomau nioyongosioli 'o sagala ngomasika ge'ena?

10Ngini niosirame 'o sagala wange 'ita-tantuu, 'o sagala mede 'ita-tantuu, de 'o sagala taunu 'ita-tantuu.

11Ngoi tododato 'uwa sigado 'ai gangela ma ngale tiniriwo gee ma faedaa koi'iwa.

12'Esa moi riaka dodoto! Ngoi toga'asoko tosigou-gounguku la ngini niodadi 'isoka ngoioli, ge'ena la 'o 'agama ma besesongo koikuasanowau. Sababu ngoi mita 'o Yahudioka ma todadiokau 'isoka ngini. 'O 'orasi 'ipasa-pasa, ngini ko 'okiawa niasowono ngoino.

13Ma raiokau ngini kaniongano-nganonosi 'okia ma sababu so ngoi tokurue tositotara 'o Habari ma Owa nginika. Ma sababu ge'ena la topanyake so 'o 'orasi tamake.

14Ma 'orasi ge'ena ngini koni'emonuwa ngoino, ngaro 'ai roesie ma lugo 'isoka nitaili nginika. Ma ngini nidawongo ngoi 'isoka niadawongo ma Jo'oungu ma Dutu 'awi mala'ekati bolo 'isoka ma Kristus Yesus ma sirete.

15Ma 'orasi ge'ena ngini posironga niosanangioka! Ma ne'ena naga, kianosi 'o sanangi ge'ena? Ngoi tanako ma 'orasi ge'ena ngaro 'ania kianikia yaowa-owa ma kanikula, de nako 'iso kogee 'idadi, tanu nia ako ma gomono ma niapeleuru so niokulakau ngoino.

16Bolo ne'ena naga niamaoku ngoi ne'ena 'isoka nia musuou? sababu tinisitotara gee yadae-daene?

17'O nyawa-nyawa gee yoma-magae yakapulutu 'o Habari ma Owa, 'ona 'o singina yo'ese nginika, ma manga dumutu 'itorou. 'Ona ge'ena kayakarana ngone pomakati-tingaka la ngini nioma-magae niakimoteke 'ona.

18Ma goungu 'isure nako niomagae naga 'okia sonaa yaowa-owaka, 'itilai kaitaurika koge'ena, 'uwa duga ka ma 'orasi ngoi naga de de ngini.

19'Ai ngowa-ngowaka gee tinisi-singina! Ngoi ne'ena tosangisarakauoli sababu to ngini 'ania gokoie de nia gogeruku. Ngoi 'ai singina 'isusa de tosangisara matero ka 'o ngeweka mimoi mosangisara ma 'orasi momaku'arene. Ngoi dua katosangisarasi nako la 'o Yesus 'awi 'ahu ma jako ge'ena koiwaituawasi 'ania 'ahu ma sigoronaka.

20Ngoi toduaka ma sala ma 'orasi ne'ena ngoi naga de de ngini, la 'idadi tobicara tosidi-diai la 'ifoloiosi 'iwaiti ma ngale kokia to ngoi 'ai singina ma dodaka. Sababu kotomasinakowau salingou 'okiasi todiai nginika!

21'Esa moi riaka dodoto, ngini gee niomau 'o 'agama ma besesongo nipa-paretano, bika niosigisene! Ngoi 'asa tinisiwaiti 'okia naga 'isilefo-lefoku 'o Musa 'awi besesongo ma bukuoka.

22Ge'enaka 'isilefoku 'ato 'o Abraham 'awi ngowaka 'o nauru yamididioka. Wimoi 'awi 'esa muna ge'ena 'o yongosi, de wimoioli 'awi 'esa muna ko 'o yongosuwa.

23'O ngowaka gee 'awi 'esa modadi yongosi, wolahiri ka biasa sababu ka 'o nyawa manga mau. Ma 'o ngowaka gee 'awi 'esa ko 'o yongosuwa, wolahiri sababu ma Jo'oungu ma Dutu 'awi jaji.

24Ne'ena ge'ena 'idadi papake 'o 'ade-'ade. 'O ngeweka yamididi ge'ena kaimatero de 'o jaji ngai modidi. Ngai moi ge'ena 'o Sinai ma gigieno ge'ena la ngo Hagar, 'ami ngowa-ngowaka yoodumu yodadi yongosi.

25So ngo Hagar ge'ena 'isoka 'o Sinai ma gigie, 'o Arab ma tonaoka. Muna 'isoka 'o Yerusalem ma kota de ma nyawa 'iodumu, gee ne'ena yodadiokau 'o yongosi ma ngale yamoteke 'o 'agama ma besesongo.

26Ma 'o Yerusalem gee 'o sorogaaka, ge'ena 'o Yerusalem gee ko 'o yongosuwa, de ge'enau matero ka to ngone nanga 'esa.

27Sababu naga ma Jo'oungu ma Dutu 'awi bukuoka 'isilefoku konee, "Nomorenie ngona gee koma'iwa 'ani roesoka, gee koma'iwa nomaku'arene! Nomorenie nomasa-sagaga ngona gee koma'iwa namao yomaku'arene ma siri! Sababu 'o ngeweka gee manga rokata yakido-doowaruku 'asa 'o ngowaka 'ifoloi 'ikudai yomadamake de gee 'o ngeweka yo'ahu de manga rokatoka."

28'Esa moi riaka dodoto! Ngini ma sirete ge'ena ma Jo'oungu ma Dutu 'awi ngowa-ngowaka gee nisilahiri sababu ma Jo'oungu ma Dutu 'awi jaji; ngini kaimatero de 'o Ishak.

29Ma ma 'orasi ge'ena 'o ngowaka gee 'ilahiri moteke ka 'o nyawa ma mau, yasikisaa 'o ngowaka gee 'ilahiri sababu 'o Ngomasa 'Itebi-tebini ma mau. Koge'enali mita ne'ena naga.

30Ma kokia naga ma Jo'oungu ma Dutu 'awi Bukuoka 'isilefoku? Ge'enaka 'isilefoku konee, "Miniginiikika 'o yongosi gumuna de 'ami ngowaka, sababu 'ami ngowaka 'asa koidadiwa 'o warisi yoridoomuku de komoyongo-yongosuwa mi ngowaka."

31So koneda 'Esa moi riaka dodoto! Ngone ne'ena bukangi la moyongo-yongosi 'ami ngowa-ngowaka, so 'ena gee komoyongo-yongosuwa 'ami ngowa-ngowaka.


  Share Facebook  |  Share Twitter

Download Audio MP3 (Galatia 4):
Mobile (Low Quality) - CD (High Quality)

 <<  Galatia 4 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel