Alkitab Mobile SABDA
[VER] : [TABARU]     [PL]  [PB] 
 <<  Ibrani 6 >> 

1Sababu ge'ena, nou ngone posigila pomadotoko 'o do-dotoko ma ngale ma Kristus gee 'isitotomo nanga ngo-ngaku, la 'uwa pomadotoko duga ka nanga do-dotoko ma di-disiraka. 'Uwa ngone duga kapogi-gilio nanga do-dotoko ma gurue ge'ena ma ngale 'o nyawa salingou yomaogoro yodiai 'okia sonaa gee ma faedaa koi'iwa-'iwa de salingou yongaku ma Jo'oungu ma Dutuka,

2bolo 'o do-dotoko ma titi ma ngale 'o go-gosiki de nanga giama podatami 'o nyawa manga saeuku. Bolo gee posongenoka de po'ahuoli, de mita 'o hukumani kaisi'ado-'adonika.

3Nou, ngone posigila pomadotoko 'o do-dotoko gee 'ifoloiosi 'inasikuata, 'itilai ma Jo'oungu ma Dutu wonariwo!

4Sababu 'o nyawa gee koyongakuwau ma Jo'oungu ma Dutuka, ma raiokau koidadiwau yakisigilioli. 'Ona yo'ahuokau ma Jo'oungu ma Dutu 'awi darangioka de yamaokau 'awi barakati, 'ona yakiparetakau 'o Ngomasa 'Itebi-tebini.

5'Ona yanakokau 'ato ma Jo'oungu ma Dutu 'una ge'ena 'awi demo 'isure, de yamaokau 'o sagala co-catu gee de ma kuasaka 'o 'orasi ma du'uruoka,

6duga nako wimadakau ma Jo'oungu ma Dutu, ge'ena koya'akunuawau yakiriwo yakisigilioli ma ngale yomaogoro 'o sowono yodiai de yolio ma Jo'oungu ma Dutuka. Sababu 'ona matero kawisideloli 'o salipoka ma Jo'oungu ma Dutu wi Ngowaka, de wisimae-maeke 'o kawasa ma bionoka.

7'Isi'ade-'ade 'o tonaka gee 'ijaga yodebesaka so ma besaka ma 'akere yasii-siisi, de 'isigo'oo 'o sagala joro gee de ma faedaaka 'o nyawa gee yopai-pairika, 'o tonaka ge'ena ma Jo'oungu ma Dutu wosibarakati.

8Ma nako 'o tonaka ge'ena 'isisupu 'o kakanoko de 'o sisika, 'o tonaka ge'ena ma faedaa koi'iwa de dua ma Jo'oungu ma Dutu wakorosau de ma duanguku watuuku wabootoka.

9Duga 'Esa moi riaka dodoto tinisiboso-bosono, ngaro ngomi miongose koge'ena ma ngomi miongaku 'ato ngini niadawongokau 'okia sonaa yaowa-owa, ge'ena la 'o sagala co-catu gee nisilaha-laha.

10Sababu ma Jo'oungu ma Dutu 'una ge'ena ma gou-goungu woloa ma sala, so kowamongoruwa 'okia naga gee niadiaiokau ma ngale 'una, de mita nia dora gee niosidumutokau 'unaka ma ngale niakiriwo 'o nyawa gee ka 'o ngo-ngaku moi de de ngini ka ngino-nginosi sigado ne'ena naga.

11Ngomi mioduaka ma sala ngini moi-moi kanioma-magae niodiai koge'ena sigado ma do-dogumika, la ngini nimadamake 'okia naga gee niongano-nganonou.

12Ngomi miooluku ngini nitebeturu. Ma ngomi miomau la ngini 'isoka 'o nyawa yongaku-ngaku de yosaba-sabari yotamaa, so yamake 'okia naga gee ma Jo'oungu ma Dutu wosijajiokau.

13Gee ma Jo'oungu ma Dutu wojaji 'o Abrahamuka, 'una wosasi 'ato 'una 'asa wadiai 'okia naga gee wojajiokau. De 'una wosasi de to 'una ma sirete 'awi ronga. Sababu komoiwa manga kuasa 'ifoloi 'iamoko de to ma Jo'oungu ma Dutu.

14Wojaji konee, "Ma gou-goungu ngoi 'asa tonisibarakati de dua 'ani ngowaka de ni dangonuku posironga manga gudaioka."

15'O Abraham wotongosono wotamaa, so 'una womadamake 'okia naga gee ma Jo'oungu ma Dutu wojajiokau 'unaka.

16Nako ngone 'o nyawa posasi, ge'ena de 'o nyawa 'iregu manga ronga gee 'ifoloi yodaduie de de ngone, la 'isikuata 'ato 'okia naga pojajiokau ge'ena dua padiai. De ge'enau so komoiwau yoributu.

17Ma Jo'oungu ma Dutu womau la 'o nyawa gee yadawo-dawongo 'awi jaji go'ona yanako 'itiai 'ato dua kowangaliwa 'awi jaji, ge'enau so wosikuata 'awi jaji ge'ena de wosasi.

18Ma Jo'oungu ma Dutu 'awi jaji de 'awi sasi ge'ena koingali-ngaliwa. 'Una kowoelu-elukuwa. Sababu ge'ena ngone gee pomasidutu-dutuku 'unaka 'inasikuata ma ngale pomasiga-gao ma gou-goungu nanga singina nganonika gee pongano-nganonou nanga bionoka.

19To ngone nanga singina nganono ge'ena 'isoka 'o tapu, de ge'enau to ngone nanga guata so koinado'oawau. Nanga singina nganono ge'ena 'inasi'asa papasa 'o Ngii 'Itebi-tebini ma ngorana ma da-datoko ma Jo'oungu ma Dutu 'awi Woaka, la 'idadi potaari ma Jo'oungu ma Dutuka.

20'O Yesus wonadebelengakau 'o ngorana la 'idadi posikaika ge'enaka. 'Una wosirakau wowosanga ma ngale wodadi nanga 'Imam ma Amoko kaisi'ado-'adonika, 'isoka ma 'Imam Melkisedek.


  Share Facebook  |  Share Twitter

Download Audio MP3 (Ibrani 6):
Mobile (Low Quality) - CD (High Quality)

 <<  Ibrani 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel