Alkitab Mobile SABDA
[VER] : [TABARU]     [PL]  [PB] 
 <<  Kolose 1 >> 

1Tabea 'Esa moi riaka dodoto ma Jo'oungu ma Dutu 'awi 'umati 'o Kolose ma kotaka, gee tatapu nimarimoi de ma Kristus. Ngoi 'o Paulus ma Kristus 'awi su-suloko, ngoi todadi 'o su-suloko sababu ma Jo'oungu ma Dutu woigoraka. Ngoi tolefo 'o surati ne'ena, de ngoi de nanga 'esa moi 'o Timotius miosidingoto nginika. Ngomi mioga'asoko ma Jo'oungu ma Dutuka, to ngone nanga Dea, la tanu winikula 'o barakati de 'o sanangi.

2(1:1)

3Ngomi mio'isenokau 'ato ngini niongaku ma Yesus Kristusika de niakidora ma Jo'oungu ma Dutu 'awi kawasa 'iodumu, ge'enau so ngomi kaitaurika minisilahidoa de miolahidoa ma noimi mio'amalaha ma Jo'oungu ma Dutuka, ma Yesus Kristus to ngone nanga Jou 'awi Dea.

4(1:3)

5Ngini winingaku 'o Yesus de niakidora ma Jo'oungu ma Dutu 'awi kawasa, ge'ena sababu ngini niongano-nganonou 'okia naga gee ma Jo'oungu ma Dutu winidudu-duangou 'o sorogaaka. Ngini nio'isenokau ge'ena, ma 'orasi ma di-disiraka 'o Habari ma Owa 'iti-tiai nisitotara nginika.

6Ma Habari ma Owa ge'ena 'itagi 'o dunia yakilolituku de 'isowoko ma ngale 'isidadi 'o nyawa manga 'ahu 'isure, 'isoka nginioli gee ma 'orasi ngini nio'isene ma Jo'oungu ma Dutu 'awi dora de nianako 'itiai.

7Ma Habari ma Owa ge'ena nanga 'esa moi 'o Epafras winisitotara. 'O Epafras 'una ge'ena mimasida-damanarama wimoi kamisiboso-bosono. 'Una ge'ena ma Kristus wile-leleani wosingou-ngounu, gee womanarama ma ngale wonariwo.

8'O Epafras wosidemo ngomino 'ato to ngini 'ania dora 'o Ngomasa 'Itebi-tebinino.

9Ge'enau so gee mio'isenoka 'iodumu ge'ena, de kaitaurika minisilahidoa. Ngomi mioga'asoko ma Jo'oungu ma Dutuka la ngini niamake 'o barija la nianako 'itiai ma Jo'oungu ma Dutu 'awi mau.

10De ge'enau ngini 'idadi nio'ahu moteke ma Jo'oungu ma Dutu 'awi mau, de 'awi singina niasanangi sababu kaitaurika niadiai yaowa-owa. De ngini 'asa kaidogo monga wininako ma Jo'oungu ma Dutu.

11Ngomi miolahidoa la tanu ma Jo'oungu ma Dutu de 'awi kuasa gee posironga ma amoko, winisikuata la ma gou-goungu nia'akunu niodaari 'o sangisara 'irupa-rupaka.

12De kaniomore-morene nio'amalaha nanga Deaka ge'ena la ma Jo'oungu ma Dutuka, sababu 'unau so ngini 'idadi niamake 'okia naga gee wasadiakou 'awi pareta 'iki-kinitaroka ma ngale 'awi kawasa.

13'Una wonasisupuokau 'o darusu ma paretaka, de wona'asa to 'una 'awi Ngowaka wisiboso-bosono wi pareta ma sigoronaka.

14Ma Jo'oungu ma Dutu 'awi Ngowakou gu'una watuusu nanga so-sowono, ge'ena ma ngale ma Jo'oungu ma Dutu kowosi-singinawau nanga so-sowono.

15Ma Jo'oungu ma Dutu 'una 'o nyawa kowimakewa, ma 'awi singina de 'awi mau 'iwai-waiti monga ma Kristusoka. Ma Kristus 'una nagau 'o sagala moi-moi koisidadiwasi 'ena. De 'unau 'o sagala moi-moi ma dutu de 'ifoloi wodaduie de 'o sagala moi-moi 'isidadi-dadiku.

16Sababu ma ngekomo 'unau ma Jo'oungu ma Dutu wosidadi 'iodumu 'o sorogaaka de 'o duniaka, gee pamake-make de kopamake-makewa, ge'ena dau ma dodaka 'o sagala ngomasa gee 'iku-kuasa de 'ipa-pareta mita. 'O sagala moi-moi ma Kristus wosidadiku de ma dumutu 'una ma sirete.

17'O sagala moi-moi koisidadikuwasi 'ena ma Kristus 'una nagau. De sababu 'unau mita so 'o sagala moi-moi naga to 'ena ma ngiioka.

18De ma Kristusou waparetano 'o jamati, matero ka to 'una 'awi roese, sababu 'una ge'ena 'o jamati ma 'ahu ma titi. Naga 'o sagala moi-moika, 'unau ge'ena ma di-disiraka ma Jo'oungu ma Dutu wisimomiki 'o songenoka, la 'una 'ifoloi wodaduie de 'o sagala moi-moi.

19Sababu 'isoka kokia naga ma Jo'oungu ma Dutu, 'awi Ngowaka mita koge'enali, moteke ma Jo'oungu ma Dutu 'awi mau.

20De ma ngekomo 'awi Ngowakou mita, ma Jo'oungu ma Dutu wodiai ngone pomarimoioli de de 'una. De duga ka ngonewa pomarimoi de ma Jo'oungu ma Dutu, ma 'ena 'o sagala moi-moi 'o duniaka de 'o sorogaaka mita. Ma Jo'oungu ma Dutu koge'ena wodiai, ma ngekomo 'awi Ngowaka 'awi 'aunu 'ipoa de wosongene 'o salipoka.

21Ma 'orasi 'ipasa-pasa gee ngini koniongakuwasi ma Kristusika, ngini nimasikurutu ma Jo'oungu ma Dutuoka de winimusu 'unaka, sababu 'ania singina de nia di-dibangi 'itorou 'isoka gee 'iwaitokau nia 'ahu ma sigoronaka.

22Ma ma Jo'oungu ma Dutu 'awi Ngowaka gee ma gou-goungu wodadiokau 'o nyawa de wosongenokau, ge'enau so ngini 'idadi nimarimoioli de ma Jo'oungu ma Dutu. Ma Jo'oungu ma Dutu 'awi Ngowakou gu'una wosongene so ngini nia sala de nia dorou ka ma eta ma koi'iwau ma Jo'oungu ma Dutu 'awi bionoka.

23Ma ngini salingou tatapu nimasiga-gao nia ngo-ngakuka. La 'uwa sigado niamada 'ania singina nganono 'o Habari ma Owano gee ma 'orasi ngini niadawongokau. 'O Habari ma Owa ge'ena 'isitotarokau 'o dunia yakilolituku, de ma ngale ge'enau mita so ngoi 'o Paulus tositota-totara 'o Habari ma Owa.

24Ne'ena ngoi tomorene tosangisara ma ngale tiniriwo. Sababu 'ai roese 'isangisara ge'ena ma ngale tositotomo ma Kristus 'awi sangisara ma ngale wariwo 'awi jamati matero ka 'awi roese.

25Ma Jo'oungu ma Dutu woisulokokau ngoi taleleani 'awi jamati de ge'ena ma dodaka dau salingou tositotara 'o habari ma Jo'oungu ma Dutuno 'iodumu nginika,

26ge'ena la 'o habari gee ma sira ma taunu 'iratu-ratusou ma Jo'oungu ma Dutu wosisupu koiodumuawasi 'o nyawa-nyawaka, ma ne'ena wosikokisupuokau 'awi kawasaka.

27Ma Jo'oungu ma Dutu womau la 'awi kawasa yanako 'okia naga gee kowosisupu-supuwasi. Gee kowosisupu-supuwasi ge'ena posironga de 'isureka so kapoki-kiliri, ne'ena naga wosisupu 'o sagala nyawa 'iodumika. Gee kowosisupu-supuwasi ge'ena la: Ma Kristus naga ngoneka, de ma ngale 'unau so ngone 'asa po'ahu ma Jo'oungu ma Dutu 'awi kumati ma sigoronaka.

28Ma Kristusou gu'una gee ngomi miositota-totara 'awi habari 'o nyawa 'iodumika. De 'o sagala barija ma Jo'oungu ma Dutuno, ngomi miakisitiari de miakidotoko 'ona yoodumu. Koge'ena miodiai la 'o nyawa 'iodumu 'idadi yosikaika yotaari ma Jo'oungu ma Dutuka 'ena ma gou-goungu yamotekokau ma Jo'oungu ma Dutu 'awi mau, sababu yomarimoi de ma Kristus.

29Ma ngale ge'enau so ngoi tomariwo ma sala tomanarama. Ngoi tomariwo moteke 'o kuasa gee posironga ma guatoka ma Kristusino gee 'imanarama ngoioka.


  Share Facebook  |  Share Twitter

Download Audio MP3 (Kolose 1):
Mobile (Low Quality) - CD (High Quality)

 <<  Kolose 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel