Dual Panel1'O taunu muruo naga deika 'o Yohanes Wo'osi-'osiki woboano 'o tonaka 'ika-kakasaka 'iga-gamamuoka 'o Yudea ma daeraaka de wokurue wodotoko,
2wongose, "Niotoba 'o sowono niodiai de niolio ma Jo'oungu ma Dutuka, sababu ma Jo'oungu ma Dutu wacobou wopareta!"
3'O Yohanesou gee ma Nabii Yesaya wongosekau konee, "'O nyawa moi naga 'o tonaka 'ika-kakasaka wosigaso-gasoko wongose 'ato, 'Niosikadiai ma Jou 'awi ngekomo; niosikaboooto ma Jou wi tapaki la waboa!'"
4'O Yohanes wi baju ge'ena 'o 'onta ma gogo yadiaiku, de 'awi bulu ge'ena 'o haewani ma kai, de wi 'inomo, 'o kakasoso de 'o madu 'o bonganika.
5Manga gudai 'o Yerusalemuoka de 'o Yudeaka de mita 'o Yordan ma 'akere ma date-dateoka gee, yoboa 'o Yohanesino.
6'Ona yomangakuoka manga sowono de 'o Yohanes waki'osiki ge'ena 'o Yordan ma 'akeroka.
7Manga gudai mita 'o Farisioka de 'o Sadukioka yoboa 'o Yohanesino la waki'osiki. Ma gee wakimake yoboa, de kawongosekau, "Ee ngini 'o ngowosana ma ngowa-ngowaka! Nago'ona nidongoseka 'ato ngini 'idadi niomasiresene gee dua ma Jo'oungu ma Dutu wi hukumani 'iboa?
8Niosidumutu nia gokoieka 'ato ma gou-goungu niotobakau 'o sowono niodiai.
9'Uwa nimangano-nganono 'o hukumani konidaenuwa sababu niongose 'ato 'o Abraham ge'ena to ngini nia topora. Niongano-nganono, 'o teto-teto ne'ena mita ma Jo'oungu ma Dutu 'idadi wadiai ma ngale 'o Abraham wi ngowa-ngowaka.
10'O patu naga 'inoakou 'o gota ma pegoka, ma ngale 'isitodanga 'o gota ma roese sigado ma ngutu-ngutuuku. 'O gota gee 'isowoko 'itorou, ge'ena dua yatodanga de yodugumo 'o 'ukuka.
11Ngoi tini'osiki de 'o 'akere, ma ngale ma no-nako niotobakau 'o sowono niodiai; ma dua wimoi wotu'uruno, wini'osiki de 'o Ngomasa 'Itebi-tebini de 'o 'uku, 'una 'ifoloi woamoko de de ngoi. Ka 'awi tarupa to'asa ma koyadaenuwa.
12'Una wacobou wosikati-tingaka 'o nyawa ma owa de ma dorou matero kawopai-pairi wimoi 'awi tatapa wa'aonou ma ngale 'awi bira wakokitadoko sigado 'itebini. Ma bira ge'ena 'asa watoomu 'o rawongoka, duga ma konga 'iodumu 'asa wositaulu 'o 'ukuka gee koisonge-songenuawau!"
13Ge'enaka de 'o Yesus 'o Galileaka de wotagi 'o Yordan ma 'akerika, ge'enaka waika de 'o Yohanesika waika womaga'asoko wi'osiki.
14Ma 'o Yohanes wositaili womanitomo 'o Yesus wi ga-ga'asoko ge'ena, kawongosekau, "'Aba, yadaene 'ena ngona noi'osiki, ma ne'ena 'ido'oa so ngona noboa ngoino?"
15'O Yesus wosango, "Koge'enau ngaro. Sababu kone'ena ma ngale padiai 'iodumu gee ma Jo'oungu ma Dutu wi mau." Ge'enaka de 'o Yohanes 'o Yesus wi'osiki.
16Wi'osiki 'iduanga so womabaorie de 'o diwanga 'ipelenga de 'o Yesus wamake ma Jo'oungu ma Dutu wi Ngomasa 'i'uti dakuuku 'isoka 'o pombo ngai moi de widangiku.
17Ge'enaka de ma Jo'oungu ma Dutu wi 'ilingi 'ingose konee, "Ne'ena to ngoi 'ai Ngowaka towisiboso-bosono, 'una 'ai singina wasanangi."