Alkitab Mobile SABDA
[VER] : [TABARU]     [PL]  [PB] 
 <<  Roma 2 >> 

1'Esa moi riaka dodoto, nako ngini niongose 'ato 'o nyawa 'iregu manga di-diai koyadaenuwa, ge'ena done naga de ma 'ena? niakisidumutu 'ato ngini nia sala koi'iwa? Sababu nako ngini niongose 'ato 'o nyawa 'iregu yosowono, 'ena momongo ngini mita niodiai 'okia sonaa 'ito-torou 'isoka 'onali, ge'ena ngini ma sirete mita nimasidaene 'o hukumani.

2Ngone panakokau 'ato ma Jo'oungu ma Dutu wokula 'o hukumani 'o nyawaka gee yadi-diai 'okia sonaa 'ito-torou, ge'ena 'una wodiai posironga de 'itiaioka.

3Ma ngini ma sirete mita niadiai 'okia naga gee 'o nyawa 'iregu yadi-diai, de ngini niongose 'ato 'isowono! So 'uwa niongose 'ato ngini dua konidaenuwau ma Jo'oungu ma Dutu 'awi hukumani!

4Bolo ngini koniosikiamoiwa ma Jo'oungu ma Dutu 'awi singina posironga de 'isureka, de mita 'awi sabari 'ikurutu so kowinihukumuawasi? Ma raiokau ngini nianakokau 'ato ma Jo'oungu ma Dutu 'awi singina 'isure ma sala sababu 'una womau la ngini niomaogoro 'o sowono niodiai de niolio 'unaka.

5Ma ngini nio'opini de niooluku niomangali. Sababu ge'ena nginiou ma sirete nimadiai 'ania hukumani ma dubuso 'idogo 'o dunia ma do-dogumoka, gee ma Jo'oungu ma Dutu wosidumutu 'awi do'otasa sababu 'o sowono de wokula 'o hukumani 'iloa-loa.

6Sababu ma Jo'oungu ma Dutu 'asa wokula 'o nyawa 'isinoimika moteke kokia naga manga di-diai.

7Ge'ena la wakikula 'o 'ahu 'ika-kakali 'o nyawaka gee tatapu manga di-diai yaowa-owa. La 'ona yomariwo duga ka ma Jo'oungu ma Dutu wakisitedene, wakisiarene de wakikula 'o 'ahu 'ika-kakali.

8Ma 'o nyawa gee kayomadengo-dengoka de koyosingounuwa ma Jo'oungu ma Dutuka, so yamoteke kaisowo-sowono, 'o nyawa go'ona dua ma Jo'oungu ma Dutu posironga wakikorosauoka.

9'O nyawa gee yoduaka 'o dorou yodiai, 'o Yahudioka bolo ko 'o Yahudiokawa, 'asa ma Jo'oungu ma Dutu wakisisangisara.

10Ma 'o nyawa 'iodumu gee yoduaka yodiai yaowa-owa, 'asa wakisimorene, wakihoromati de wakisisanangi, 'o Yahudioka de mita 'o nyawa 'iregu-regu.

11Sababu ma Jo'oungu ma Dutu 'o nyawa kowoiri-irikuwa.

12Ko 'o Yahudiwa ma nyawa gee yosowo-sowono, 'asa yakihukumu. 'Ona koyosikanakowa 'o besesongo ma Jo'oungu ma Dutuno gee 'o Musa wositota-totara, so 'ona yakihukumu ma sababu ko 'o besesonguwa ge'ena yaparene. Ma 'o Yahudioka yosowono ge'ena yanakokau ma Jo'oungu ma Dutu 'awi besesongo 'o Musa wositota-totara. Sababu ge'ena 'ona yakihukumu moteke 'o besesongo ge'ena.

13Sababu 'o nyawa gee ma Jo'oungu ma Dutu 'awi singina yasanangioli, ge'ena ko ma ngalewa 'ato 'ona yanakokau 'o besesongo ma Jo'oungu ma Dutuno gee 'o Musa wositota-totara, ma 'ena ngano yamoteke 'okia naga gee 'isilefoku ma besesongoka ge'ena.

14Ko 'o Yahudiwa ma nyawa 'ona koyanakowa 'o besesongo ma Jo'oungu ma Dutuno gee 'o Musa wositota-totara. Ma nako 'ona ma sirete manga mau yamoteke 'okia naga gee 'o besesongo ge'ena 'isuloko, to 'ona ma sirete manga singina 'imadadi to 'ona manga besesongo, ngaro 'ona koyanakowa 'o besesongo gee 'o Musa wositota-totara ge'ena.

15Manga di-diaioka 'isinyata 'ato 'okia naga gee 'o besesongoka 'isuloko, 'isilefokau to 'ona manga singinaka. To 'ona manga singina mita 'isinyata ge'ena, sababu to 'ona ma sirete manga singina ma 'ijaga 'ingose 'ato yosowono de do'oaka 'ingose 'ato yotiai.

16Koge'enau dua 'asa 'idadi gee ma wange 'isitantuukou ya'adono. Moteke 'o Habari ma Owa gee ngoi tositota-totara, ma wange ge'ena ma ngekomo ma Yesus Kristus, ma Jo'oungu ma Dutu 'asa wahakimi 'o nyawa 'iodumu manga singina ma dodaka de manga di-dibangioka gee koyosisupu-supuwa.

17Ma ne'ena kokia ngini ma sirete 'Esa moi riaka dodoto? Ngini niongose 'ato ngini ge'ena 'o Yahudi ma nyawa de ngini nimasiga-gao 'o besesongo ma Jo'oungu ma Dutuno gee 'o Musa wositota-totara de 'ania singina 'iamoko sababu ma Jo'oungu ma Dutu winiiriki niodadi to 'una 'awi 'umati.

18Ngini nimadotokokau 'o besesongo ge'ena, so ngini nianako ma Jo'oungu ma Dutu 'awi mau de 'idadi niosikanako ka'ena yaowa.

19Ngini niongose 'ato nginiou ne'ena 'o nyawa niakisi'asa-'asa ma Jo'oungu ma Dutuka, matero ka 'o nyawa yorau-rau niakituda, de niodiai la winako ma Jo'oungu ma Dutu matero ka 'o darangi nio'asa 'o darusika.

20Ngini niakidoto-dotoko 'o nyawa yohaga-haga, de 'o nyawa koyoba-barijawasi. Ngini niongose 'ato niobarija naga 'o besesongo gee 'o Musa wositota-totara de 'o do-dotoko ge'ena 'iti-tiai.

21Ngini niakidotoko 'o nyawa 'iregu, de 'ido'oa so ngini ma sirete konimadotokuwa? Ngini niosidotoko 'ato 'uwa potosiki, 'ena momongo ngini ma sirete niotosiki!

22Ngini niosidotoko 'ato 'uwa posongou, 'ena momongo ngini ma sirete niosongou! Ngini ma sirete niodu'uduku 'o barahala, 'ena momongo ngini ma sirete nia'ese 'okia sonaa 'o barahala ma woaka.

23Ngini niosimole-mole 'o besesongo ma Jo'oungu ma Dutuno gee 'o Musa wositota-totara, 'ena momongo winisiti-tingoono ma Jo'oungu ma Dutu ma ngale koniamotekuwa 'awi besesongo.

24Naga 'o Buku 'Itebi-tebinoka 'isilefoku konee, "Ma sababu ngini 'o Yahudioka, so naga 'o nyawa 'iregu-regu ma Jo'oungu ma Dutu 'awi ronga yosito-torou."

25Nako ngini niodomoteke 'o besesongo gee 'o Musa wositota-totara, ge'ena nimasuna de ma faedaaka. Ma nako ngini koniamotekuwa 'okia naga gee 'o besesongoka ge'ena 'isuloko, ge'ena nimasuna ma faedaa ka ma eta ma koi'iwa.

26Ko 'o Yahudiokawa 'ona koyomasunawa, ma nako yamoteke 'o besesongo ma Jo'oungu ma Dutuno, ge'ena ma Jo'oungu ma Dutu wamaoku kaimatero de yomasunakau.

27De koyomasuna-sunawa dua nisisowono ngini 'o Yahudi ma nyawaka, sababu to ngini de 'ania besesongo gee 'o Musa wositota-totara de ngini nisunaka, ma ngini niaparene ma besesongo ge'ena. 'Ona koyakisunawa, ma 'onau ge'ena yamoteke ma besesongo ge'ena.

28Sababu 'o Yahudi toto ge'ena bukangi la ka manga ronga duga 'o Yahudioka, de 'o nyawa gee ma gou-goungu yomasuna ge'ena bukangi la ka manga roese ma kia sonaa moteke 'o 'adati.

29Koge'enali mita 'o Yahudi toto ge'ena la 'o nyawa gee yamote-moteke 'o besesongo ma Jo'oungu ma Dutu. De 'o suna ma gou-goungu ge'ena la nanga singinaka 'uwau 'o dorou podiai de ge'ena 'o Ngomasa 'Itebi-tebini ma manarama, gee koisilefokuwa 'o bukuoka. 'O nyawa koge'ena, yomadamake 'o siarene ma Jo'oungu ma Dutuno, so ko 'o nyawanowa.


  Share Facebook  |  Share Twitter

Download Audio MP3 (Roma 2):
Mobile (Low Quality) - CD (High Quality)

 <<  Roma 2 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel