Dual PanelI. Angka induk pature pargansion marsasabulan 1-15. II. Angka induk ni Israel na sampulu dua margai 16-24. III. Angka induk ni siramoti ugasan dohot angka panuturi 25-34.
1(I.) On do bilangan ni sandok halak Israel, angka na niuluhon ni angka induk marompuompu dohot angka induk sasaribu dohot sisaratus halak, ro di panuturi angka na marhalado di jolo ri rajai, taringot tu sude ulaon ganup mangihuthon gansina be, marlaho ro sasabulan di saluhut bulan ni na sataon; jala ganup gansi duapulu opat ribu halak toropna.
2Ia induk ni gansi parjolo di bulan sipaha sada, i ma Jasobeam, anak ni si Sabdiel, jala duapulu opat ribu halak masuk tu gansina i.
3Sian pinompar ni si Peres do ibana, induk ni saluhut partogi ni parangan di bulan sipaha sada.
4Ia induk ni gansi di bulan sipaha dua i ma si Dodo, halak Ahohi, si Mikhlot do donganna induk di gansina i, jala duapulu opat ribu halak masuk tu gansina i.
5Ia induk patoluhon manguluhon parangan di bulan sipaha tolu i ma si Benaia, anak ni malim Joiada; jala duapulu opat ribu halak masuk tu gansina i.
6I ma si Benaia, ulubalang na umbaritaan sian na tolupulu halak, laos gabe induk ni na tolupulu i, jala anakna si Amisabad donganna induk di gansina i.
7Ia na paopathon di bulan sipaha opat i ma si Asahel, anggi ni si Joab, jala si Sebadia anakna i donganna, jala duapulu opat ribu halak masuk tu gansina i.
8Ia na palimahon i di bulan sipaha lima i ma induk si Samhud, halak Jisrahi, jala duapulu opat ribu halak masuk tu gansina i.
9Ia na paonomhon i di bulan sipaha onom i ma si Ira anak ni si Ikes, halak Tekoa i, jala duapulu opat ribu halak masuk tu gansina i.
10Ia na papituhon i di bulan sipaha pitu i ma si Heles halak Peloni sian pinompar ni Epraim, jala duapulu opat ribu halak masuk tu gansina i.
11Ia na paualuhon i di bulan sipaha ualu i ma si Sebekkai, halak Husa i sian halak Zerah, jala duapulu opat ribu halak masuk tu gansina i.
12Ia na pasiahon i di bulan sipaha sia i ma si Abieser, halak Anatot i sian pinompar ni si Benjamin, jala duapulu opat ribu halak masuk tu gansina i.
13Ia na pasampuluhon i di bulan sipaha sampulu i ma si Maharai halak Netopa i sian halak Zerah, jala duapulu opat ribu halak masuk tu gansina i.
14Ia na pasampulusadahon i di bulan li i ma si Benaia, halak Piraton i sian pinompar ni si Epraim, jala duapulu opat ribu halak masuk tu gansina i.
15Ia na pasampuluduahon i di bulan hurung i ma si Heled, halak Netopa i sian si Otniel, jala duapulu opat ribu halak masuk tu gansina i.
16(II.) Ia angka induk ni marga ni Israel sadasada on do: Sian marga Ruben i ma si Elieser, anak ni si Sikri, sian marga Simeon i ma si Sepatia, anak ni si Maaka.
17Sian marga Lepi i ma si Hasabya, anak ni si Kemuel; sian pinompar ni si Aron i ma si Sadok.
18Sian marga Juda i ma si Elihu, sada sian hahaanggi ni si Daud; sian marga Isasar i ma si Omri, anak ni si Mikhael.
19Sian marga Zebulon i ma si Ismaia, anak ni si Obaja; sian marga si Naptali i ma si Jerimot, anak ni si Asriel.
20Sian pinompar ni Epraim i ma si Hosea, anak ni si Asasia; sian satonga marga Manasse i ma si Joel, anak ni si Pedaya.
21Sian satonga marga Manasse na di Gilead i ma si Iddo, anak ni si Sakaria; sian marga Benjamin i ma si Jehasiel, anak ni si Abner.
22Sian marga Dan i ma si Asarel, anak ni si Jeroham. I ma angka induk ni angka marga ni Israel.
23Alai ndang masuk tu bilangan dibahen si Daud jolma angka na so gok dope marumur duapulu taon, ala naung diparbagabaga Jahowa hian patoroponna halak Israel, songon bintang angka na di langit.
24Nunga nian dipungka si Joab, anak ni Nai Seruia mamilangi, alai ndang marujung dibahen; ai ala ni do masa torutoru tu halak Israel; dibahen i ndang disurathon bilangan i tu bagasan buku jamita ariari ni raja Daud.
25(III.) Ia panahatan ni sude ugasan ni rajai i ma si Asmapet, anak ni si Adiel; ia panahatan ni angka ugasan di ladang, di angka huta bagasan dohot di angka huta na gonting, i ma si Jonatan, anak ni si Usia.
26Ia panahatan ni halak parumauma, angka na mangula di balian i ma si Esri, anak ni si Kelub.
27Ia panahatan ni angka porlak anggur i ma si Simei, halak Rama i; ia panahatan ni anggur angka na pineop di angka porlak anggur i ma si Sabdi, halak Syifmi.
28Ia panahatan ni porlak hatubuan ni hau Jetun dohot hau ara harangan na di rura, i ma si Baal-Hanan, halak Geder; ia panahatan ni bagas parpeopan miak i ma si Joas.
29Ia panahatan ni lombu angka na manjampal di Saron, i ma si Sirtai, halak Saron i; ia panahatan ni lombu angka na di rura i ma si Sapat, anak ni si Adlai.
30Ia panahatan ni unto, i ma si Obil, halak Ismael i; ia panahatan ni halode boruboru, i ma si Jehdeia, halak Meronot i.
31Ia panahatan ni birubiru, i ma si Jasis, halak Hagar i. I ma saluhut jolma panahatan ni ugasan ni raja Daud.
32Alai anggo si Jonatan, hasudungan ni si Daud, i ma panuturina, bapa na pantas marroha jala na pistar; ia si Jeiel, anak ni Hakmoni, i ma dongandongan ni angka anak ni rajai.
33Si Ahitopel pe panuturi ni rajai do; jala si Husai halak Arki, i ma aleale ni rajai.
34Jadi dung salpu si Ahitopel soluk ma si Joiada, anak ni si Benaia dohot si Abiatar, alai anggo si Joab partogi ni parangan ni rajai do.