Dual PanelI. Marharoroan sian Debata do hapistaran na sintong, i ma roha hadaulaton i 1-9. II. Mandao do hajahaton dohot elaela tu hajungkaton bahenonna 10-22
1(I.) Ale anaha, molo dijangkon roham angka hatangki, jala diparateatehon ho angka tonangki.
2Jala dipatinggil ho pinggolmu tumangihon hapistaran, dipaeleng ho roham tu habisuhon.
3Pola tung joujou ho mangido pangantusion, dipangiar ho suaram mangido habisuhon.
4Molo dijalahi ho angka i, songon perak, jala disulingkit ho, songon arta angka na buni:
5Jadi antusanmu ma biar mida Jahowa, jala jumpang ho parbinotoan ni Debata.
6Ai Jahowa do na marbasabasahon hapistaran, sian pamanganna do ro parbinotoan dohot habisuhon.
7Jala Ibana pahot hatuaon di halak partigor, Ibana do lombulombu di halak na marpangalahohon hadaulaton.
8Asa diramoti angka lapang ni uhum, jala dijagai dalan ni angka na niasianna.
9Jadi disi ma antusanmu hatigoran dohot uhum, ro di ruhut hasintongan, sandok pangalaho na denggan i tahe.
10(II.) Molo masuk hapistaran tu bagasan roham, jala dihalomohon roham parbinotoan.
11Jadi roha hapantason mangaramoti ho, jala habisuhon marjaga ho.
12Asa paluaonna ho sian dalan ni parjahat, sian baoa na mangkatahon getegete.
13Sian halak angka na tumundalhon dalan hasintongan, asa mardalani di angka dalan haholomon;
14Halak angka na las roha mangulahon hajahaton, mariaia nasida mida getegete angka na roa;
15Halak angka na geduk marpangalaho, jala pasebut angka dalanna;
16Asa paluahon dirim sian jolma ni halak sileban, sian sibabijalang na patabotabo hatahatana;
17Naung tumadingkon hasoloan ni haposoonna, jala dihalupahon padan tu Debatana.
18Ai marongrong tu hamatean do bagasna, jala pate tu banua toru do angka dalanna.
19Nasa na manopot nasida, ndang ulahan bulung, jala ndang dapotsa angka lapang tu hangoluan.
20Dibahen i mardalani ma ho ale anaha, di dalan ni halak angka na denggan roha, jala marsihohot roham mangihutihut angka dalan ni halak partigor;
21Ai halak partigor i mangingani tano on sogot, jala halak na daulat roha tading disi.
22Alai anggo halak parjahat siap sian tano on, jala halak pangoseose pidom sian i.