Dual PanelI. Angka hata ni si Elihu: Dipaboa alana umbahen sai sip ibana na sai laon 1-10. II. Ala so adong be diboto alealena sitolu halak i alusna dohononna tu si Job, gabe ndang tarorom si Elihu mandok hatana 11-22
1(I.) Dung i mansohot ma sitolu halak i masisualan dohot si Job, ala sai dipintori ibana dirina.
2Jadi marpiarpiar ma rimas ni si Elihu, anak ni si Barakel, marga Bus i, marompu tu si Ram; marsigorgor rimasna mida si Job, ala sai dipintori dirina moradophon Debata.
3Marro ni rimas ibana huhut mida alealena sitolu halak i, ala so haalusan nasida si Job, hape ditorui do ibana.
4Ai nunga ngolngolan hian si Elihu naeng mandok hatana tu si Job, ala tumua sitolu halak i sian ibana.
5Alai dung diida si Elihu, ndang haalusan sitolu halak i si Jobi, tarrimas situtu ma ibana.
6Dung i ro ma hata ni si Elihu, anak ni si Barakel, marga Bus i mangalusi: Bajar dope nian anggo ahu, alai nunga pola ubanon ia hamu; dibahen i alang rohangku jala mabiar ahu papatarhon parbinotoanku tu hamu.
7Ai ninna rohangku do: Angka na tuatua ma jumolo mandok hatana, jala halak siginjang umur pabotohon habisuhon.
8Alai tongon tahe, Tondi na di bagasan jolma na gale i dohot pangombushon ni Nasunhinagogo i marrohaihon jolma i.
9Ndada sai tardok halak siginjang umur pangalapan bisuk, jala ndada sai tardok halak na tuatua umboto manimbang uhum.
10Ala ni umbahen hudok: Tangihon hamu ma ahu, asa dohot ahu pabotohon parbinotoan ni rohangku.
11(II.) Ida ma nunga sanga ngolngolan ahu paimaima hatamuna, sai hupatangitangi sipaingotmuna paima sun dirisik hamu hata na humona dohononmuna.
12Sai ditimbangi rohangku do nian hatamuna, hape ida ma, ndang adong sian hamu nanggo sahalak patundukkon si Job, manang na torang mangalusi hatahatana.
13Dibahen i unang ma tung dok hamu: Nunga jumpang hami habisuhon, Debata do na manorui ibana, ndada jolma.
14Alai tahe, ndada ahu pininggil ni hatahatana, jadi ndada alusanku ibana hombar tu hatamuna i.
15Nunga tung tarhatotong anggo nasida, ndang be tarbahensa maralus, nunga tung jut nasida mandok hatana.
16Tung sai ngolngolan ahu, umbahen na so mangkuling nasida, ala sai tarhatotong boti nasida jongjong, jala ndang diboto be maralus?
17Antong ahu ma huhut mandok alushu, ahu pe naeng papatarhon pingkiran ni rohangku.
18Ai nunga gok hata ahu huhilala, sai disosak Tondi na di bagasan rohangku do ahu.
19Ida ma, tudoshon anggur na so binungka do andorangku, tudoshon tuhukan bobak na imbaru do naeng mapuntas.
20Dibahen i naeng mangkuling ahu asa lumbang huhilala, naeng bungkaonku pamanganku, huhut mangalusi.
21Dao ma sian ahu anggo tung marnida bohi mandingkani manang ise.
22Ai ndang huboto marsipalensem, atik tung beha tompu ahu ripurhonon ni Sitompa ahu.