Alkitab Mobile SABDA
[VER] : [TOBA]     [PL]  [PB] 
 <<  Kejadian 28 >> 

I. Si Isak mamasumasu si Jakkob paborhathon ibana tu si Laban 1-5. II. Si Esau mangoli sada boru ni si Ismael 6-9. III. Si Jakkob marnida di bagasan nipina tanggatangga na sungkot ro di langit, jala maruli bagabaga sian Debata 10-15. IV. Hamauliateon ni rohana dohot bagabagana tu Debata 16-22.

1(I.) Dung i dijou si Isak ma si Jakkob, jala dipasupasu ibana, didok ma manonai ibana: Unang buat sian angka boru Kanaan bahen jolmam.

2Borhat ma ho laho tu Padang-Aram, tu jabu ni si Betuel, ama ni inam, sian i ma buat bahen jolmam, sian angka boru ni si Laban, iboto ni inam.

3Sai gabe ma ho jala torop dipasupasu Debata na sun hinagogo i, asa torop bangso marompu tu ho.

4Sai dilehon ma tu ho dohot tu pinomparmu pasupasu na tu si Abraham i, asa ho manean tano paisolatanmu, na nilehon ni Debata tu si Abraham i.

5Jadi diparbohat si Isak ma si Jakkob i, asa laho ibana tu Padang-Aram, tu si Laban, anak ni si Betuel, halak Ram i, iboto ni si Rebekka, ina ni si Jakkob dohot si Esau.

6(II.) Jadi dung diida si Esau, naung dipasupasu si Isak si Jakkob i, jala dipaborhat ibana tu Padang-Aram, mangalap jolmana sian i, jala na nioraanna i, di na pinasupasuna i ibana, mambuat sian boru Kanaan, bahen jolmana.

7Jala naung ditangihon si Jakkob hata ni amana dohot inana laho tu Padang-Aram.

8Diida si Esau huhut sogo do roha ni si Isak, amana i mida boru Kanaan.

9Jadi laho ma si Esau tumopot si Ismael, jala dibuat si Mahalat, boru ni si Ismael, anak ni si Abraham, iboto ni si Nabaiot bahen jolmana, imbang ni angka jolmana hian.

10(III.) Alai borhat do anggo si Jakkob sian Berseba laho tu Haran.

11Jadi tolhas ma ibana tu sada parbornginan, gabe marborngin ibana disi, ai nunga mate mata ni ari. Dung i dipambuat ma angka batu na disini bahen halang ni uluna, laos modom ibana disi.

12Dung i marnipi ma ibana, diida ma sada tangga, na pinagohon tu tano, tolhas ro di langit ia ujungna, jadi ida ma, sai marnaek mijur sian i angka surusuruan ni Debata.

13Jongjong di ginjangna anggo Jahowa, jala ninna do: Ahu do Jahowa, Debata ni ompum si Abraham dohot Debata ni si Isak, ia tano pinodomanmon lehononku ma tu ho dohot tu pinomparmu.

14Jala sobokkon orbuk ni tano on sogot torop ni pinomparmu, jala angka rarat ma hamu tu hasundutan dohot tu habinsaran dohot tu utara dohot tu dangsina, jala dapotan pasupasu sogot nasa marga na di tano on marhitehite ho do pinomparmi.

15Ida ma, sai dongananku jala ramotanku do ho manang tu dia pe ho mangalangka, jala togihononku do ho mulak tu tano on; ai ndang tadingkononku ho, nda jolo sahat hubahen na huparbaga i tu ho.

16(IV.) Dung i tarsunggul ma si Jakkob sian na modom i, jadi didok ma: Inganan ni Jahowa do on hape, so pamotoanku.

17Jadi mabiar ma ibana, ninna ma: Na songkal situtu do inganan on, ndang tarbahen so on bagas ni Debata, jala baba pintu ni langit.

18Dung i hehe ma si Jakkob sogot manogotna i, dibuat ma batu pinarhalanguluna i, jala dipajongjong bahen partinandaan, jala diusehon miak tu ginjangna.

19Dung i dibahen ma goar ni inganan i Betel (bagas ni Debata), Lus do goar ni huta i anggo na sai laon.

20Dung i marbagabaga ma si Jakkob, ninna do: Molo didongani jala diramoti Debata ahu di dalan na hudalani on, jala dilehon di ahu sagusagu sipanganon dohot ulos siporuloshononhon.

21Jala marsonangsonang ahu mulak ditogihon tu bagas ni damang, sai Jahowa ma Debatangku.

22Jala batu na hupajongjong on bahen partinandaan, i ma gabe bagas ni Debata, jala sude na nilehonmu tu ahu parsampuluonku ma i tu Ho.


  Share Facebook  |  Share Twitter

 <<  Kejadian 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel