Dual PanelSalomo ditokko dadi datu
1Iatu datu Daud matuamo sia matessekmo sia moi nasambu’i parramba’ tau, apa inang tae’mo namalassu.
2Nakuami tu to mase’ponna lako: Melo ke didakaranni puangki datu tu misa’ anak dara malolle’ anna kamayai tu datu sia nadaranai sia la mamma’ diong riammi, anna malassu tu puangku datu.
3Nadaka’mi tau tu pia baine ballo lan mintu’ lili’ parentana Israel, anna kabu’tui tu Abisag, misa’ baine to Sunem, anna solanni lako datu.
4Iatu pia baine iato lendu’ maballona; nadaranaimi tu datu sia nakamayai, apa tae’ nasangampa’ datu.
5Attu iato, iatu Adonia, anakna Hagit matampo penaanna naurunganni ma’tangnga’ nakua: Akumo tu la datu. Napasakka’mi tu ba’tu pira-pira kareta sia pakkanarang sia limangpulo tau la dolo ma’dondo-dondo dio olona.
6Tae’ bangpa naada’i ambe’na angge tuona, kumua: Ma’apari ammu ma’gau’ susirato? Sia pissanmito lendu’ ia melona tu pati’na, sia ia undampi’ Absalom.
7Samaturu’mi Yoab, anakna Zeruya, sia to minaa Abyatar; iamo sola duai untundui sia unturu’ Adonia.
8Apa iatu to minaa Zadok sia Benaya, anakna Yoyada, na nabi Natan na Simei na Rei sia mintu’ pa’baraninna Daud, tae’ namenturu’ lako Adonia.
9Untunumi domba sia sapi sia patuoan malompo tu Adonia dio to’ batu Zohelet, dio sa’dena to’ kalimbuang En-Rogel, anna tambai tu mai siulu’na, iamo tu mai anakna datu sia mintu’ to Yehuda, iamotu to diala parea dio datu.
10Apa tae’ natambai tu nabi Natan sia Benaya sia mintu’ pa’barani sia Salomo, adinna.
11Attu iato ma’kadami tu Natan lako Batsyeba, indo’na Salomo, nakua: Tae’raka mirangi kumua iatu Adonia, anakna Hagit, dadi datu, natae’ naissanni puangta Daud?
12Na totemo, maikomi kupokadangkomi timbangan melo, ammi kanandai sunga’mi sia sunga’na Salomo, anakmi.
13Malekomi ammi tama inanna datu Daud, ammi ma’kada lako kumua: Tang umpalaoraka sumpa tu puangku datu lako kaleku sia ma’kada kumua: Manassa Salomo, anakmu, tu la datu undinna ussondana’ sia ia la unnisungi isungan kapayungangku! Ma’apai na Adoniamo totemo dadi datu?
14Iammi marassan sipa’kada datu, la undina’ tama, angku sumbungi tu kadammi.
15Tamami tu Batsyeba umpennoloi datu lan inan; iatu datu matessekmo, anna kamayai Abisag, to Sunem.
16Mengguntu’mi tu Batsyeba anna tukku menomba dio olona datu. Nakuami tu datu: apa mutungkanan?
17Ma’kadami lako datu nakua: Mangkamo puangku umpalao sumpa lako kaleku tete dio sanganNa PUANG, Kapenombammi, mikua: Manassa Salomo, anakmu, tu la datu undinna ussondana’ sia ia la unnisungi isungan kapayungangku.
18Apa totemo Adoniamo tu dadi datu na moi susito, tae’ duka naissanni puangku datu.
19Untunu sapi buda sia patuoan malompo sia domba anna tambai tu mintu’ anakna datu sia to minaa Abyatar sia Yoab, kamandang lompo, apa iatu Salomo, taummi, tae’ natambai.
20Apa totemo, o puangku, iatu matanna mintu’ to Israel mentiro lu lako kalemi, kumua ammi paissanni, minda tu la unnisungi kapayungammi la ussondakomi.
21Iake tae’i nasusito, la nakuanna’ tau sola Salomo, anakku, to pabali-bali, ke tamamokomi batu dilobang dipasola nene’ to dolomi.
22Marassan bangsia ma’kada lako datu, pakalan tamami tu nabi Natan.
23Naparampomi tau lako datu nakua: Den nabi Natan inde. Saemi mennolo dio olona datu tukku sae rokko padang.
24Ma’kadami tu Natan nakua: O puangku datu, inangmikuaraka kumua: Adonia la ussondana’ mendadi datu sia ia la unnisungi kapayungangku?
25Belanna allo iate malemo untunu sapi buda sia patuoan malompo sia domba anna tambai tu mintu’ anakna datu sia mintu’ pangulu rari sia to minaa Abyatar; marassanmo tu tau iato mai kumande sia mangiru’ dio olona, anna ma’kada nakua: Namaupa’mora tu datu Adonia.
26Apa iate aku te, tu taunna datu, sia to minaa Zadok sia Benaya, anakna Yoyada, sia Salomo, tu taunna datu tae’ anna tambaikan.
27Iake susito tu kadanna puangku datu, tae’ ammi pokadan tonganni taummi, kumua minda tu la unnisungi kapayunganna datu.
28Ma’kadami tu datu Daud nakua: Tambaianna’ Batsyeba. Malemi tama umpennoloi datu, anna bendan dio olona.
29Umpalaomi sumpa tu datu nakua: La lelukraka tuoNa PUANG, tu ullendokan sunga’ku lan mai mintu’ kapussakan,
30tonganna susi kamangkangku umpalao sumpa ussa’bu, sanganNa PUANG, Kapenombanna to Israel, kukua: Inang anakmu Salomo la dadi datu ussondana’, sia la unnisungi kapayungangku ussullena’, susi dukato tu la kupogau’ totemo.
31Mengguntu’mi tu Batsyeba anna tukku sae rokko padang sia menomba dio olona datu, anna ma’kada nakua: Namaupa’mora tu puangku datu Daud sae lakona!
32Nakuapa tu datu Daud: Tambaianna’ to minaa Zadok sola nabi Natan na Benaya, anakna Yoyada; saemi tu tau iato mai mennolo lako datu.
33Ma’kadami tu datu lako nakua: Solan nasangi tu mintu’ taunna puangmi, anna anakku Salomo messake dao bagala’ku, ammi solanni lako Gihon.
34Anna to minaa Zadok sia nabi Natan untokkoi minna’ inde to dio, anna dadi datunna to Israel; ammi mane umpannoni napiri tanduk sia metamba kumua: Namaupa’mora tu datu Salomo!
35Ammi balole’i male tama tondok, anna isungi kapayungangku; na ia dadi datu ussondana’; belanna kupamanassamo kumua ia arungna to Israel sia to Yehuda.
36Mebalimi tu Benaya, anakna Yoyada, lako datu, nakua: Amin, la Napamanassa susimo PUANG to tu kadanna puangku datu.
37Susi kaNarondonganna PUANG tu puangku datu dolona, la susi dukato tu Salomo la Narondong sia la Napatarompo’ tu isungan kapayunganna ondong na iatu isungan kapayunganna puangku datu Daud.
38Malemi tu to minaa Zadok sola nabi Natan na Benaya, anakna Yoyada, sisola to Kreti sia to Pleti, anna popessakei tu Salomo dao bagala’na datu Daud, anna solanni lako Gihon.
39Naalami to minaa Zadok tu tanduk nanii minna’ lan mai tenda, anna tokkoi tu Salomo; anna pannonii tau tu napiri tanduk, namintu’ to buda sipeoli-olian nakua: Namaupa’mora tu datu Salomo!
40Saemi tu mintu’ to buda umbalole’ datu sia umpannoni suling sia sisumapuko-pukoan, naurungan takua to la ra’pak tu padang napobua’ gamaranna.
41Narangimi Adonia sola tu mai to natambai, tu mane ra’pa’ mangka kumande. Sia narangi Yoab tu oni napiri tanduk anna ma’kada, nakua: Apara napatu tu oni iato lan kota, anna lendu’ marambana tu tau.
42Marassan bangsia ma’kada, saemi tu Yonatan, anakna to minaa Abyatar, nakuami tu Adonia: Tamako mai, belanna to malinta’ siako sia la umbaako kareba melo.
43Apa mebali tu Yonatan lako Adonia nakua: Tae’ nasusito, sangadinna iatu puangta datu Daud unnangka’mo Salomo dadi datu.
44Nasuamo datu tu to minaa Zadok sia nabi Natan sia Benaya, anakna Yoyada, sia mintu’ to Kreti sia to Pleti male ussolanni, anna popessakei dao bagala’na datu.
45Sia natokkomo to minaa Zadok sia nabi Natan dio Gihon dadi datu, anna ke’de’ tu tau iato mai sola nasang sisumapuko-pukoan, naurungan maramba tu tau lan kota, iamoto tu ramba mirangi.
46Sia iatu Salomo unnisungmo dao isungan kapayungan.
47Sia iatu mintu’ to mase’ponna datu sae dukamo umpennoloan pa’passakke lako puangta datu Daud, nakua: Denno upa’ anna Kapenombanna puangki umpatarompo’i tu sanganna Salomo mandu pole’ anna sangammi sia Napalayukki tu isungan kapayunganna mandu pole’ anna isungan kapayungammi. Tukkumi tu datu menomba dao inan mamma’na.
48Sia ma’kada tu datu susite nakua: Mintu’ kadipudian lu langngan nasang PUANG, Kapenombanna to Israel, tu allo iate umpa’kamasean misa’ to unnisungi kapayungangku, tu natiro kalenamo matangku.
49Attu iato sipa’rundedeammi ara’na tu mintu’ to nasolan Adonia, anna pada male umpeloloi lalanna.
50Mataku’ dukami tu Adonia lako Salomo; ke’de’mi anna male untoe tanduk inan pemalaran.
51Naparampomi tau lako Salomo nakua: Iatu Adonia mataku’ lako datu Salomo, iamoto anna male untoei tu tanduk inan pemalaran, nama’kada, nakua: la umpalao sumpa tu datu Salomo lako kaleku, kumua da anna patei pa’dangna’ te aku, taunna.
52Ma’kadami tu Salomo nakua: Ianna maruru’ tu gau’na, moi sanglamba’ beluakna tae’ anna la ronno’ rokko padang, apa iake denni kakadakean lan penaanna, manassa la mate dipongko.
53Nasuami datu Salomo tu tau unnalai dio mai to’ inan pemalaran. Malemi tama, anna tukku menomba lako datu Salomo; nakuami Salomo lako: Sulemoko lako banuammu.