Dual PanelDatu Salomo umpabendan Banua Kabusungan
1Iatonna taun a’pa’ratu’ ngkarua pulona tonna mangka tassu’ tu to Israel lan mai tondok Mesir, lan taun ma’penna’pa’na kama’parentanna Salomo lako to Israel, tonna bulan Ziw, iamotu bulan ma’penduan, nabangunanni Salomo tu banuanNa PUANG.
2Iatu banua nabangunanni datu Salomo tu PUANG, annan pulona siku tu lambe’na, duangpulo siku tu babana, na tallungpulo siku tu langka’na.
3Iatu sarambi dio tingayo bilik kapua dio banua iato duangpulo siku lambe’na pada suka’ baba banua iato, na sangpulo siku tu babana, lako to’ tingayo banua iato.
4Anna garagai dio banua iato tu pentiroan marepe’ taralinna.
5Anna dio to’ rinding nagaraga tu ba’tu pira-pira bilik dipasikande banua, dio to’ rinding banua tiku lao, dio to’ bilik kapua sia to’ bilik boko’ tiku lao; sia napopa’kalada’-lada’ langngan tiku lao.
6Iatu kalada’ diongna lu limang siku babana, na iatu lanna tangnga annan sikunna, na iatu ma’pentallunna langngan pitung siku, belanna dipakurang tu babana dio salian banua tiku lao, kumua da namella’ka’ lako rinding banua.
7Iatu banua tonna dibangun, digaraga dio mai batu pura dipa’ dio se’pon tanete, iamoto natae’ oni pepa’tong ba’tu pa’ ba’tu moi misa’ pareanan bassi pandiu, tonna dibangun tu banua iato.
8Iatu ba’ba kalada’ diongna lu dio kanan banua iato sia eran tilekko tu diolai kendek langngan kalada’ tangnga sia dio mai kalada’ tangnga langngan kalada’ ma’pentallunna.
9Iatonna upu’ umbangunni tu banua iato, nasamboi papan kayu arasi’ ke sangsapa’oi sia nadada’ tu lentong kayu arasi’.
10Sia iatonna pabendanni tu bilik dio mintu’ banua iato, silima siku langka’na (ke misa’oi), namane ullopakki kayu arasi’.
11Saemi tu kadanNa PUANG lako Salomo, nakua:
12Iate banua mupabendan, ke lolangko unturu’ mintu’ apa Kupondok, sia umpogau’i tu mintu’ atorangKu sia ungkaritutui tu mintu’ pepasanKu ammu pengkaolai, manassa la Kupamatua tu kadangKu lako kalemu, tu mangka Kupokada lako Daud, ambe’mu,
13kumua la torroNa’ dio lu to’ to Israel sia tae’ Kula untampei tu to Israel, taungKu.
14Iatonna mangkamo tu Salomo umbangunni tu banua iato,
15nagaragammi kayu arasi’ tu rinding tembo’ banua iato, lanna lu, randuk diong mai salinna sae lako balok rattiangna nalopak kayu tu lanna lu; apa iatu sali banua nalopak papan sendana.
16Iatu pollo’ banua tu duangpulo siku lambe’na disapa’ papan arasi’ randuk diong mai salinna sae lako balok, anna garagai tu lanna lu mendadi misa’ bilik dio boko’, iamoto tu inan mandu maindan.
17Iatu banua iato, iamotu bilik kalua’ dio tingayona, patangpulo siku lambe’na.
18Iatu kayu arasi’ dipanglopakan tu banua lanna lu, nanii passura’ ma’rupa katimun sia puso bunga tiballa’; mintu’nato kayu arasi’ nasang, natae’ tu batu kanaan.
19Susimoto tu misa’ bilik nagaragai dio boko’ lan banua iato, la napannii patti basseNa PUANG lan.
20Iatu bilik dio boko’ duangpulo siku lambe’na, na duangpulo siku babana, na duangpulo siku langka’na, nasapu’ nasangi bulaan tasak; sia nagaragai duka misa’ inan pemalaran kayu arasi’.
21Sia nasapu’ Salomo bulaan tasak tu banua iato lanna lu sia natoke’i (kulambu) tu rante bulaan dio tingayo bilik dio boko’, tu mangka nasapu’ bulaan.
22Na iatu mintu’ banua iato nasapu’ bulaan, naurunganni mintu’ banua disapu’ nasang; ia duka tu mintu’ inan pemalaran, tu sikande bilik dio boko’, nasapu’ bulaan.
23Lan bilik dio boko’ nagaragai tu da’dua karubion kayu saitun pangala’, sangpulo siku tu langka’na.
24Iatu lambe’na pani’na tu misa’ karubion silimang sikuan, naurunganni sangpulo siku randuk dio mai tampak pani’ sangbalinna sae lako tampak sangbalinna.
25Susi dukato tu karubion misa’ sangpulo siku; pada dua suka’na sia pada dua rupanna.
26Iatu karubion misa’ sangpulo siku tu langka’na na iatu karubion misa’ susi dukato.
27Napalanmi bilik lanna lu tu karubion da’dua, anna balla’ pani’na sola duai, naurunganni iatu pani’na misa’ tu karubion misa’ sumpu lako to’ rinding na iatu pani’na misa’ tu karubion senga’o sumpu lako to’ rinding senga’, na iatu pani’na sola duai tu ma’palutama tangnga banua sitammu.
28Iatu karubion sola duai nasapu’ bulaan.
29Sia mintu’ rinding banua iato tiku lao, la bilik lanna lu la bilik salianna nasura’i dio tu rapang-rapang karubion sia koroma sia puso bunga tiballa’.
30Sia ia duka tu sali banua iato, la bilik lanna lu la bilik salianna nasapu’ bulaan.
31Dio ba’ba bilik dio boko’ nagaragan kayu saitun pangala’ tu tutu’na; iatu ampang iato dipasikande-kande namendadi lima tetuk.
32Iato tutu’ ba’ba da’dua kayu saitun digaragai, anna sura’i rapang-rapang karubion dio sia koroma sia puso bunga tiballa’ sia nasapu’ bulaan; anna sapu’i bulaan tu karubion sia koroma napemati’tinni.
33Susi dukato tu dio ba’ba bilik kalua’ nagaragai tu ampang kayu sendana, tu dipasikande-kande anna massulapa’ a’pa’.
34Na iatu tutu’na da’dua kayu sendana iatu misa’na duang lamba’ tu ma’din digirik na iatu misa’na duang lamba’ tu ma’din duka digirik.
35Nasura’mi lan tu rapang-rapang karubion sia koroma sia puso bunga tiballa’, anna sapu’i bulaan, tu dipemati’tinni tongan, anna kanaan tu sura’na.
36Nagaragami tu tarampak lanna lu tallu silopak dio mai batu dipa’, tu dilopak lentong kayu arasi’ dibingkung.
37Iatonna taun ma’penna’pa’ diotonmi tu parandangan banuanNa PUANG lan bulan Ziw.
38Na iatonna taun ma’pessangpulo misa lan bulan Bul, iamo bulan ma’pengkarua, upu’mi dipabendan tu banua lan mintu’ bangunanna, sia mintu’nato unturu’ tongan pandirinna, naurungan pitung taun nabangun tu banua iato.