Dual PanelDIONA BANUA KABUSUNGAN DIRARA ; Patti BasseNa PUANG dipalele, na kamala’biranNa PUANG ungkabu’ Banua Kabusungan (2 Oss. –)
1Iatonna attu iato narampunmi Salomo tu mintu’ pekaamberanna to Israel sia mintu’ pangulunna sukunna, iamotu to paa dio lu tongkonanna to Israel, mennolo lako datu Salomo dio Yerusalem, la umbaai langngan tu patti basseNa PUANG diong mai tondokna Daud, iamotu Sion.
2Ma’rampunmi tu mintu’ muane to Israel lako datu Salomo, la umpakaraya pa’gauran lan bulan Etanim, iamotu bulan ma’pempitu.
3Iatonna sae nasangmo tu pekaamberanna to Israel, naangka’mi mintu’ to minaa tu patti,
4anna baai langngan tu pattinNa PUANG sia Tenda Kasitammuan sia mintu’ pareanan maindan tu lan tenda iato; iatu umbaai langngan iamotu mintu’ to minaa sia to Lewi.
5Iatu datu Salomo sia mintu’ kasirampunan to Israel, tu sirampun lako kalena dio tingayo patti, umpemalaran domba sola sapi tu tang dikemba’ diia’ sia dibilang diona kabudanna.
6Iatu patti basseNa PUANG nabaa to minaa tama inanna, iamotu bilik dio boko’ lan banua iato, iamotu bilik tarru’ maindan diongna lu pani’ karubion.
7Belanna iatu karubion umballa’ pani’na patomali dao inan patti iato, naurungan iatu karubion ussamboi dao mai tu patti iato sola pebullena.
8Iatu pebulle iato kalando tongan, naurunganni kaanan tu tampakna dio mai bilik maindan dio tingayo bilik dio boko’, apa tae’ natiroi tau dio mai salian; iatu apa iato tontong dio sae lako allo totemo.
9Tae’ bang apa senga’ lan patti iato, sangadi papan batu da’dua tu napalan Musa dao Horeb, iamotu papan batu basse, tu natanan PUANG sola to Israel, tonna tassu’ tu tau iato mai lan mai tondok Mesir.
10Iatonna tassu’mo tu mintu’ to minaa lan mai banua maindan lako salian, nasitutu’imi sangkombong salebu’ tu banuanNa PUANG,
11naurunganni tae’ natananni tu mintu’ to minaa bendan menomba, diona salebu’ iato, belanna naponnoi kamala’biranNa PUANG tu banuanNa PUANG.
12Ma’kadami tu Salomo nakua: Napokadamo PUANG kumua la torro lan kamalillinan.
13Kupasundunmo umbangunni tu banua iato, tu Minii torro, iamotu misa’ inan matontongan tu Minii torro sae lakona.
PUANG ussundunni pa’dandinNa lako Daud
14Mangkato menggirikmi tu datu, anna passakkei tu mintu’ kombongan to Israel, tonna bendan tu mintu’ kombongan to Israel.
15Sia ma’kada nakua: Mintu’ kadipudian lu langngan PUANG, Kapenombanna to Israel, tu mangka umpasundunni tu apa mangka Nasa’bu’ randan dipudukNa lako Daud, ambe’ku, Nakua:
16Randuk dio mai allo Kunii ussolan taungKu sun lan mai Mesir, tae’ angKu pilei langsa’i tu misa’ kota dio lu mintu’ sukunna to Israel, la dinii umbangunni tu misa’ banua, kumua anna nii sangangKu lan, sangadinna Kutonno’ bua kayumo tu Daud la umpangului tu taungKu Israel.
17Bu’tumi lan penaanna Daud, ambe’ku, la umbangunanni misa’ banua tu sanganNa PUANG, Kapenombanna to Israel.
18Nakuami PUANG lako Daud, ambe’ku kumua: Bu’tumo lan penaammu la umbangunanni banua tu sangangKu, melo to, belanna den bu’tu susito lan penaammu.
19Apa tae’ nala iko la umbangunni tu banua iato, sangadinna anakmu muane tu bu’tu dio mai kalemu, iamo la umbangunanni banua tu sangangKu.
20Naparampo randannamo PUANG tu kada mangka Napokada, belanna tunannangmo’ ussonda Daud, ambe’ku, sia unnisungmo’ dao isungan kapayunganna Israel, susitu kadanNa PUANG, sia iate banua iate kubangunammo sanganNa PUANG, Kapenombanna to Israel.
21Sia kupasakkarammo misa’ inan tu patti, tu nanii basseNa PUANG, tu Natanan sola nene’ to dolota, tonna solanni tu tau iato mai tassu’ lan mai tondok Mesir.
Passambayangna Salomo
22Bendanmi tu Salomo dio tingayo inan pemalaranNa PUANG sitingoan mintu’ kombongan to Israel, anna mempala’ langngan langi’.
23Sia ma’kada nakua: O PUANG, Kapenombanna to Israel, tae’ tu Kapenomban senga’ sangadinna Kamu manna, la lan langi’ dao la dao kuli’na padang diong, tu umpalanda’ basseMi sia kamasokanamMi lako taumMi, tu lantuk penaanna lolang dio oloMi.
24Sia tu umpalanda’i lako taumMi Daud, ambe’ku, tu apa mangka Mipokadanni, ondongpi Mipasundunmo tu apa mangka nasa’bu’ randan dipudukMi, susite allo totemo.
25Na totemo, o PUANG, Kapenombanna to Israel, palanda’mi tu apa mangka Mipokada lako taumMi Daud, ambe’ku, kumua: Tae’ anna ka’tu len tu bati’mu dio oloKu la unnisungi isungan kapayunganna Israel, podo ke ungkaritutui lalanna tu anakmu muane sia lolang dio oloKu susi kalolangammu dio oloKu.
26Na totemo, o Kapenombanna to Israel, denno upa’ narampo randanna tu kada, tu mangka Mipokada lako taumMi Daud, ambe’ku.
27Apa tongannaraka tu Puang Matua torro dao kuli’na padang? Iatu langi’, moi na iatu langi’ ma’iringanna dao, tae’ anna kullei unnalaKomi, apa pole’pa te banua iate tu mangka kubangun.
28Sailei te passambayangna sia pengkamoyana taumMi, o PUANG, Kapenombangku, sia perangii tu petamba sia passambayang, tu napennoloan taumMi dio oloMi;
29kumua Mitiroi allo bongi te banua iate, iamotu inan tu mangka Mipokada kumua: Iatu sangangKu la inde to dio – amMi perangii tu passambayang, tu la napennoloan taumMi lan inan iate.
30Perangii tu pengkamoyana taumMi sia taumMi to Israel, tu la napennoloan lan inan iate. Manassa la Miperangii sia lan mai inan Minii torro, iamotu dao suruga; sia iamMi rangimi, la Mipa’dei tu kasalangki.
31Iake denni misa’ tau kasalan lako solana, anna suai solana menggata, kumua naruai tampak ropu sia sae menggata dio tingayo inan pemalaramMi lan banua iate,
32la Miperangii dao mai suruga, sia Mipogau’i to sia la Mipaolai salunna tu taumMi, amMi pasalai tu to sala sia Mipasule langngan botto ullunna tu penggauranna, amMi sanda-tonganni tu to tongan sia Mipapakkanni sitinaya kamalamburanna.
33Iake nataloi ualinna tu taumMi to Israel, belanna kasalan tu tau iato mai lako Kalemi, anna mengkatoba’ lako Kalemi unnaku sangamMi sia massambayang sia mengkamoya lako Kalemi lan banua iate,
34la Miperangii dao mai suruga sia pa’dei tu kasalanna taumMi to Israel sia pasulei tu tau iato mai tama tondok, tu mangka Mikamasean nene’ to dolona.
35Iake titutu’i tu langi’, naurunganni tae’ uran sae, belanna kasalammo tu tau iato mai lako Kalemi, anna massambayang lan inan iate unnaku sangamMi sia natobaran tu salana, belanna Mipopengkadiongammo,
36attu iato la Miperangii dao mai suruga sia la Mipa’dei tu kasalanna taumMi sia taumMi to Israel – belanna Mipatuduan lalan melo tu tau iato mai tu sipatu la naolai – sia Mipasaean uran tu padang, tu mangka Mikamasean taumMi la napomana’.
37Iake ra’pak padangi lan tondok iato ba’tu denni ropu, ba’tu pasianni ba’tu langkoi tu gandung, ba’tu denni batik sola nango; ba’tu napapusa’i ualinna tu tau iato mai lan lu mintu’ kota dio lu tondokna, ke saei tu sala umbanna parri’ ba’tu saki,
38ba’tu umba-umbanna passambayang ba’tu ia duka tu pengkamoya tu la napennoloan ba’tu minda-mindannai tu mintu’ taumMi to Israel, belanna pantan natandai tu kapussakanna penaanna, naurunganni mempala’ lan banua iate,
39perangii dao mai suruga, inan matontongamMi sia pa’dei kasalanna sia da Mipopa’elo’na bangi sia pantan Mipapakkanni sitinaya mintu’ kedona, saba’ Mitandai tu penaanna – belanna Kamu manna untandai tu penaanna mintu’ ma’rupa tau –,
40anna kataku’Komi tu tau iato mai lan mintu’ allo angge tuona lan tu tondok, tu Mikamasean nene’ to doloki.
41Ia duka tu to sae, tu tangia taumMi to Israel, ke saei dio mai tondok mambela belanna sangamMi,
42– belanna narangi tau tu sanga pasareongamMi sia lima matoto’Mi sia takia’ tiangka’Mi –, sia iake saei massambayang lan banua iate,
43la Miperangii dao mai suruga inan matontongamMi, sia pasituru’i tu mintu’ apa napengkamoyai tu to sae lako Kalemi, anna mintu’ bangsa dao kuli’na padang untandai tu sangamMi, naurunganni umpangke’Komi tu tau iato mai, susi taumMi to Israel, sia anna tandai, kumua sangamMimo tu disa’buranni te banua iate, tu mangka kupabendan.
44Iake sunni tu taumMi la sirari ualinna lako lalan Mipapatuanni sia massambayang lako PUANG mentingo lako kota iate, tu mangka Mipilei langsa’, sia lako banua iate, tu mangka kubangunan sangamMi,
45perangii dao mai suruga tu passambayangna sia pengkamoyana sia sandatonganni.
46Iake kasalammi tu tau iato mai lako Kalemi – moi misa’ tau tae’ tang kasalan – anna re’dek ara’Mi lako tau iato mai sia Misorong lako ualinna, naurunganni nabaa male tu tau iato mai la napali’ tama tondokna, la mambelanna, ba’tu la mandappi’na,
47sia iake napalan penaai tau iato mai tu apa iato lan tu tondok dinii male umpali’i, anna mengkatoba’ sia mengkamoya lako Kalemi lan tondokna tu to umpali’i sia ma’kada nakua: kasalammokan, umpogau’mokan kakadakean sia tang mekaalukmokan,
48sia iake lantukki tu tau iato mai mengkatoba’ situang mintu’ deatanna lan tondokna mintu’ ualinna tu umpali’i, sia iake massambayangi lako Kalemi mentingo lako tondok iate, tu mangka Mikamasean nene’ to dolona, sia lako kota iate, tu mangka Mipilei langsa’ sia lako banua iate, tu mangka kubangunan sangamMi,
49attu iato la Miperangii dao mai suruga, inan matontongamMi, tu passambayangna sia pengkamoyana tau iato mai amMi sanda-tonganni.
50Sia la Mipa’dei tu mintu’ kasalan napogau’ taumMi lako Kalemi, sia kapatodo-tintinganna ullendai pepasanMi sia pabu’tuanni kamamasean lan penaanna tu to umpali’i naurunganni ungkamasei tu tau iato mai.
51Belanna iatu tau iato mai taumMi sia mana’Mi, tu mangka Misolan tassu’ lan mai Mesir, lan mai to’ dapo’ bassi.
52Iamoto la Mitiro tu pengkamoyana taumMi sia pengkamoyana taumMi to Israel sia la Miperangii pempiran-piranni meongli’ lako Kalemi.
53Belanna Mipamarimbanganammo Kalemi tu tau iato mai dio mai mintu’ bangsa dao kuli’na padang, susitu mangka Mipokada nalopian Musa, taumMi, tomMi solanni tu nene’ to doloki tassu’ lan mai Mesir, o Puangki PUANG.
Passakke sola kadipudianNa PUANG
54Iatonna upu’mo tu Salomo umpakendekki langngan PUANG te mintu’ passambayang sia pengkamoya iate, bendanmi dio tingayo inan pemalaranNa PUANG, tonna soro’ malinguntu’ sia mempala’ langngan langi’,
55sia bendan anna passakkei tu mintu’ kombongan to Israel, nametamba nakua:
56Mintu’na kadipudian lu langngan nasang PUANG, tu umpa’kamasean kamarampasan lako to Israel, taunNa, susitu mintu’ apa mangka Napokada; moi sangbuku kada tae’ tu tang landa’ dio mai tu mintu’ kada melo, tu mangka Napokada, nalopian Musa, taunNa.
57Lalasia manii anNa rondongki’ PUANG, Kapenombanta, susitu Ia mangka urrondong nene’ to dolota; sangapaoi upa’ da Natampeki’ sia da Natumpuki’.
58Sangadinna la Napamalang lako Kalena tu penaanta anta turu’i tu mintu’ lalanNa sia ungkaritutui tu pepasanNa sia apa Napondok sia Napa’parentan tu mangka Napepasanan lako nene’ to dolota.
59Lalasia manii na iate mintu’ kadangku, tu kupennoloan lan pengkamoyaku lako PUANG, la mareke’ keallo sia kebongi dio oloNa PUANG, Kapenombanta, anna sanda-tonganni tu taunNa sia to Israel, taunNa, kiallo-kiallo.
60Anna issanni mintu’ bangsa dao kuli’na padang, kumua PUANGmo tu Kapenomban, tae’ senga’na,
61sia anna iatu penaammi mengkara’pa lako PUANG, Kapenombanta, la lolang umpengkaolai tu mintu’ apa Napondok sia ungkaritutui pepasanNa, susite allo totemo.
Pemala’ urrara Banua kabusungan sia pa’pakarayan
62Napemalarammi datu sola mintu’ to Israel tu pemala’ pangrere’ dio oloNa PUANG.
63Iatu pemala’ kasalamaran tu napemalaran Salomo lako PUANG, duangpulo ndua sa’bunna tu sapi sia saratu’ duangpulo sa’bunna tu domba sola bembe’. Susimoto tu datu sola mintu’ to Israel urrarai tu banuanNa PUANG.
64Allo ia bangsiamoto anna pamarimbanganni datu tu tangnga tarampak tu dio tingayo banuanNa PUANG, belanna inde to dio nanii umpasakka’i tu pemala’ ditunu pu’pu’ sia kande dipemalaran sia lompo pemala’ kasalamaran, belanna iatu inan pemalaran tambaga tu bendan dio oloNa PUANG tarru’ bitti’, tang naala tu pemala’ ditunu pu’pu’ sia kande dipemalaran sia lompo pemala’ kasalamaran.
65Attu iato napakarayami Salomo sola mintu’ to Israel tu allo kapua, iamotu misa’ kasirampunan kapua, randuk dio mai lalan lu lako Hamat sae lako salu’-salu’ Mesir, dio oloNa PUANG, Kapenombanta, lan pitung allo sia pitu pole’pa allona, sangpulo a’pa’ allona mintu’.
66Iatonna allo ma’pengkaruamo nasuami male tu to buda, anna palakuanni tau iato mai kamasakke-sakkean tu datu, namane sule lako tendana, parannu sia sende-sende diona kameloan, tu Napogau’ PUANG lako Daud, taunNa, sia lako to Israel, taunNa.