Dual PanelSamuel ma’kada-kada lako to Israel, tonna la umpatorro toena
1Ma’kadami tu Samuel lako mintu’ to Israel, nakua: Manassa kuperangii nasangmo tu mipokadanna lako kaleku sia kutokkoammokomi misa’ datu.
2Totemo, tiromi tu datu iato ullopiangkomi. Apa iatu aku te matuamo’ sia ubanammo’; iatu anakku muane da’dua iti’ sia misisolan; iatu aku randuk dio mai mangurangku ullopiangkomi sae lako allo iate.
3Totemo ma’diorenmo’. Pamatu’tunmi lako kaleku dio oloNa PUANG sia dio olona to Natokko, kumua: mindamora sapi kuala, mindamora keledai kuala sia mindamora kupakario-rio sia mindamora tu tang kupaolai salunna? Sia mindamora lima kunii untarima pappe’ kuurunganni untutu’ matangku diona kara-karana? Iake denni susinnato la kusondai sule lako kalemi.
4Mebalimi tu tau iato sola nasangi, nakua: Tae’ mipakario-riokan sia tae’ mipaolaikan tang salunna sia tae’ra mitarima apa dio mai misa’ duka tau.
5Nakuami Samuel: Allo iate PUANGmo dadi sa’bi lako kalemi sola nasang sia iatu to Natokko la sa’bi duka allo iate, kumua moi misa’ sala tae’ miappa’ dio kaleku! Mebalimi tu tau iato mai, nakua: Na Iamora sa’bi.
6Ma’kada dukapa tu Samuel lako to buda, nakua: PUANGmo tu unnangka’ Musa sola Harun sia tu mangka ussolan nene’ to dolomi lan mai tondok Mesir.
7Totemo maimokomi ammi bendan melo, angku mangra’ta’ umpaissannikomi dio oloNa PUANG mintu’ penggauran malambu’, tu Napogau’ PUANG lako kalemi sia lako nene’ to dolomi.
8Iatonna rampomo tu Yakub lako Mesir sia metamba-tamba tu nene’ to dolomi lako PUANG, Nasuami PUANG tu Musa sola Harun, tu ussolan nene’ to dolomi tassu’ lan mai Mesir, anna paunnisungi dao inan iate.
9Apa naboko’imo tu PUANG, Kapenombanna, iamoto anNa sorongi tu tau iato mai tama limanna to Filistin sia tama limanna to Moab, anna sirari tau iato mai.
10Attu iato metamba-tambami lako PUANG, nakua: Kasalammokanni, belanna kitampemo tu PUANG angki menomba lako mintu’ Baal sia Astoret; melo ke Milendokammokan totemo lan mai limanna ualingki, angki menomba lako Kalemi.
11Nasuami PUANG tu Yerubaal sia Barak sia Yefta sia Samuel, ullendokangkomi lan mai limanna mintu’ ualimmi tiku lao, miurunganni torro marampa’.
12Iatommi tiroi tu Nahas, datu to Amon sae ullaoikomi, ma’kadakomi lako kaleku, mikua: Moi umba nakua, inang la den misa’ tu datu umparentakan; anna inang PUANG, Kapenombammi, tu datummi.
13Totemo tiromi tu datu, tu mitonno’ sia mipalaku. Tonganna Naangkarammokomi PUANG misa’ datu tu umparentakomi.
14Iake mikataku’i tu PUANG sia mengkaolakomi lako Kalena sia miperangii tu kadanNa sia tae’ mibali-bali tu parentanNa, sia menturu’ lako PUANG, Kapenombammi, la kamu la datu tu umparentakomi, manassa la Napasalama’komi.
15Apa iake tae’ miperangii tu kadanNa PUANG, sangadinna mibali-bali tu parentaNa, manassa PUANG la unneakomi, susitu nene’ to dolomi Naea.
16Torropokomi sattu’, ammi tiroi tu apa kapua tu Napogau’ PUANG dio tingayomi.
17Tang pegandunganraka te totemo? La meongli’na’ langngan PUANG, anNa pasae guntu’ sia uran. Ammi issanni sia mitiroi kumua kapua dio oloNa PUANG tu kakadakean mipogau’, iamotu umpalakuangkomi kalemi misa’ datu.
18Meongli’mi tu Samuel lako PUANG, na allo ia dukato Napasaei PUANG tu guntu’ sia uran, anna mandu mataku’ tu to buda lako PUANG sia lako Samuel.
19Ma’kadami tu mintu’ tau lako Samuel, nakua: Pengkamoyammi te mintu’ taummi lako PUANG, Kapenombammi, kumua da angki mate. Belanna senga’mi tu kasalangki, kirangnganni pole’omi kakadakean, iamotu umpalaku misa’ datu.
20Ma’kadami tu Samuel lako to buda, nakua: Da mimataku’; moi ammi pogau’mi te mintu’ kakadakean iate, apa totemo damo mimemboko’ dio mai PUANG, sangadinna la kalebu tu penaammi mengkaola lako PUANG.
21Da misepang unturu’ apa tang kebattuan, tu tae’ gai’na sia iatu tae’ nabelai patunduan, belanna tang kebattuan.
22Apa tae’ Natibei PUANG tu taunNa, belanna sanga kapuaNa. Inang Nakaelo’i PUANG umpadadikomi taunNa.
23Na iatu aku kurannuan tongan la dipamambela dio mai kaleku umpogau’i te kasalan iate lako PUANG, iamotu la tadang umpengkamoyangkomi; sangadinna la kuada’ikomi tu lalan melo sia tongan.
24PUANG manna tu la mikataku’ sia mipengkaolai situang kamarurusan sia penaa kalebummi, belanna tiromi tumbai kapuana tu apa Napogau’ lako kalemi.
25Apa iake inang umpogau’komi kadake, manassa la diputtaikomi sola datummi.