Alkitab Mobile SABDA
[VER] : [TORAJA]     [PL]  [PB] 
 <<  1 Samuel 14 >> 

1Den sangallo nama’kada Yonatan, anakna Saul lako pa’takinna, nakua: Maiko talamban lian lako surodadu pa’kampana to Filistin, tu sambalinna lu. Apa iatu iannato tae’ napokadanni ambe’na.

2Iatu Saul torro dio tampak Gibea diong garonto’ dalima tu dio Migron. Na iatu mintu’ to nasolan agi-agi annan ratu’.

3Iatu Ahia, anakna Ahitub, siulu’na Ikabod, anakna Pinehas, anakna Eli, iamotu to minaanNa PUANG dio Silo, ma’pake epo’. Tae’ natandai to buda tu diona Yonatan kumua malemo.

4Diong alla’ aa’ tu la nalendu’i Yonatan rampo lako surodadu pa’kampana to Filistin, den buntu batu massura, misa’ indena mai namisa’ diona lu; misa’ disanga Bozes namisa’ disanga Sene.

5Iatu buntu batu misa’ bendan malolo rampe rekkena sitingoan Mikhmas na iatu misa’na rampe sau’na sitingoan Geba.

6Ma’kadami tu Yonatan lako pa’takinna nakua: Talamban lian pa’kampan surodadunna tu to tang disunna’. Den sia manii upa’ Natunduiki’ PUANG, belanna tae’ Nakasuliranni PUANG la umpa’bengan kadirampanan umpobannang kabudan ba’tu kasidiranna tau.

7Mebalimi tu pa’takinna lako, nakua: Pogau’mi mintu’ tu naalanna penaammi; turu’ bangmi tu pa’poraiammi; angku undi duka ussisolangkomi umba-umba tu miporai miola.

8Nakuami Yonatan: La lambanki’ lako tau iato, anta pa’petiroan kaleta lako.

9Ianna kuai tu tau iato mai: Kampaipi dolo, kiurunganni rampo lako kalemi melo ke torroki’ bendan dio inanta, da takendek umpessitammui tu tau iato mai.

10Apa ianna kuai tu tau iato mai: Kendekkimokan mai! takendekkimi, belanna Nasorongmo PUANG tama limanta. Iamote tu la dadi tanda lako kaleta.

11Iatonna pa’petiroammo kalena sola duai lako surodadu pa’kampana to Filistin, nakuami tu to Filistin: Tassu’mo tu to Ibrani lan mai kalo’tok, tu naninna membuni.

12Mebalimi tu surodadu pa’kampa lako Yonatan sia lako pa’takinna, nakua: Kendekkimokan mai, angki benkomi taami. Ma’kadami Yonatan lako pa’takinna, nakua: Kendekmoko mai unturu’na’, belanna Nasorongmo PUANG tama limanna to Israel.

13Ma’dangkanmi kendek tu Yonatan, naturu’ pa’takinna. Tibambangmi tu tau iato mai dio tingayona Yonatan, naundi tu pa’takinna dio mai boko’na umpatei.

14Lan te kapasaburan bunga’na, tu napogau’ Yonatan sola pa’takinna, den agi-agi duangpulo tau mate, dio misa’ inan landona agi-agi sangtangnga kadaang lalan tengko sangayoka sapi lan sangpolo allo.

15Dadimi misa’ katirambanan lan lu to’ tenda surodadu sia dio lu padang sia dio lu to’ to buda; sia tiramban duka tu surodadu ma’kampa sia ia duka tu mai surodadu mangrampa sangbaanan; ondong pissanpi tigega’ tu mintu’ tondok, naurungan susi misa’ katirambanan dio mai Puang Matua.

16Iatu surodadu pa’kampana Saul dio Gibea lan lili’ Benyamin, tonna tiroi kumua den tu kamarukkan kapua dio to Filistin, naurunganni tu tau iato mai pada male sisarak-sarak,

17ma’kadami tu Saul lako tu to nasolan, nakua: Bilangi tu mintu’ to buda sia paressai mindamora tu messarak dio mai kaleta. Dibilang nasangmi tu tau mintu’, o! Yonatan sola pa’takinna tu tae’ dio.

18Ma’kadami tu Saul lako Ahia, nakua: Baai mai tu pattinNa Puang Matua; belanna attu iato iatu pattinNa Puang Matua dio lu to Israel.

19Iatonna marassan bangsiapa tu Saul ma’kada lako to minaa iato, sakerangngan-rangngannami tu kamaramban dio to’ tenda surodadu to Filistin, iamoto anna ma’kada pole’o tu Saul lako to minaa, nakua: Torroimi.

20Sirampunmi tu Saul sola mintu’ to nasolan anna tama pa’telangan kasirarian, pakalan napa’dangna kalenamo to Filistin silaoan solana, lendu’ tongan marukkanna.

21Ondong pole’pi den to Ibrani, tu masaimo torro sola to Filistin sia male bang sola surodadunna tiku lao: tau iato mai sita’pamo to Israel tu sola Saul sia Yonatan.

22Iatonna rangimi mintu’ to Israel tu membuninna dao lu buntu Efraim, kumua mallaimo tu to Filistin, turu’ dukami mangula’ parari.

23Susimoto tu to Israel Narampanan PUANG allo iato. Tarru’ bang tu kasirarian iato sae lako nalendu’i tu Bet-Awen.

24Iatonna dipakapussakan tu to Israel allo iato, napa’parentammi Saul lako to buda tu ullaoanni kada, nakua: Tampakan ropu tu to ullepa’ apa, ke tae’pi namakaroen sia ke tae’pi kupabala’i tu ualingku. Iamoto anna tae’ bangi misa’ tu to buda ullepa’ kande.

25Iatu to buda male nasang tama pangala’ anna dio padang lappa’ iato den tani’ enoan.

26Iatonna rampomo tu to buda tama pangala’, denmi inde to tu tani’ enoan sebo, apa moi misa’ tau tae’ umparampo limanna lako pudukna, belanna ungkataku’ laoan kada.

27Apa tae’ narangii Yonatan tonna pa’parentan laoan kada tu ambe’na lako to buda. Napa’dulluammi tu tampak tekken dio limanna naotonni tama tani’ enoan; iatonna parapa’mi tu limanna lako pudukna, masiangmi natiro.

28Ma’kadami misa’ dio mai tu to buda lako kalena, nakua: Mandu liu napa’parentan ambe’mi tu laoan kada lako tu buda, nakua: Tampakan ropu, tu to ullepa’ apa lan allo iate. Iamoto anna bo’yok liumo tu to buda.

29Nakuami Yonatan: Ambe’ku umpamandasai tu tondok! Tiromi matumbai mase’rokna matangku tongku lepa’i sidi’ tu tani’ enoan.

30Ondong pole’pi tu to buda, kenna la ma’din lan allo iate ma’lalan inaanna ungkandei tu pangrampa uali naappa’. Ia dukamo bannangnato anna tae’ nakapua tu kapataloanna to Israel lako to Filistin.

31Allo ia dukato nataloi tu to Filistin randuk dio mai Mikhmas sae lako Ayalon, naurunganni lendu’ mata’ka’na tu to buda.

32Iamoto nalaoimi to buda tu pangrampa; naalami tu domba sia sapi sia anak sapi, natunui dao kuli’na padang, anna kandei sola rarana.

33Naparampomi tau lako Saul, nakua: Tonganna iatu mintu’ to buda kasalanmo langngan PUANG, belanna tau iato mai ungkande duku’ sola rarana. Ma’kadami Saul nakua: Untengkaimokomi parentaNa PUANG; lolinanna’ misa’ batu kapua mai.

34Sia nakua duka Saul: Malekomi ullelei lan lu te to buda, ammi pokadanni, kumua: Pada baakomi sapimmi sia dombami mai, mitunui inde te, mikandei. Apa da mikasalan lako PUANG, belanna ungkande duku’ sola rarana. Bongi ia dukato pantan ia kalenami tu to buda urrendenni tu sapinna la natunu dio.

35Napabendanammi Saul misa’ inan pemalaran tu PUANG; iamote tu inan pemalaran bunga’na napabendanan PUANG.

36Mangkato ma’kadami Saul: Maikomi tamengkalao unnula’i tu to Filistin ke bongii sia tapangrampai sae lako berre’na allo sia da tapatorroi moi misa’ duka. Mebalimi tu tau iato mai, nakua: Pogau’mi tu mintu’na misanganna melo dio pentiromi. Apa nakua tu to minaa: Tamenomba lako Puang Matua indete.

37Mekutanami tu Saul lako Puang Matua, nakua: Ma’dinra’ka mengkalao unnula’i tu to Filistin? La Misorong siaraka tama limanna to Israel? Apa iatonna allo iato tae’ Napebalii.

38Ma’kadami Saul nakua: Maikomi sola nasang, e kamu mintu’ pangulu to buda, la miparessa ammi issanni, kumua umba nanii bu’tu tu kasalan iato.

39Belanna la lelukrika tuona PUANG, tu urrampanan to Israel, moi anna bu’tu dio anakku Yonatan tu kasalan, inang la dipatei. Moi misa’ tu mintu’ to buda tae’ umpebalii.

40Mangkato ma’kadami tu Saul lako mintu’ to Israel, nakua: Kamu sola nasang la ma’misa sangsese, anna aku sola anakku sangsese. Mebalimi tu to buda lako Saul, nakua: Pogau’mi tu misanganna melo dio pentiromi.

41Ma’kadami tu Saul lako PUANG, nakua: O Kapenombanna Israel, papayanni tu pangra’ta’ malolo. Yonatanmi sola Saul nakanna, anna tilendok tu to buda.

42Ma’kadami tu Saul, nakua: Biangikanni sola dua, aku anna anakku Yonatan. Yonatanmi nakanna.

43Nakuami Saul lako Yonatan: Pokadanna’, apara tu penggaurammu. Napokadammi Yonatan lako, nakua: Uai tani’ manna kulepa’ sidi’, kutossok tampak tekken kutoe. Inde siana’: tae’ kupomatana’i tu la mate.

44Nakuami Saul: La Nasanggangina’ Puang Matua, sia la Narangngannipa, ke tae’i mudipatei, Yonatan.

45Apa mebali tu to buda lako Saul, nakua: Ma’dinraka la dipatei tu Yonatan, tu umpadenmo kapataloan kapua dio lu to Israel? Toyang mambela iato! La lelukrika tuoNa PUANG, anna la rondonra tu beluakna sanglamba’ dao mai ulunna rokko padang. Belanna diona pa’tunduanNa Puang Matua anna pogau’i tu mintu’ apa iato lan allo iate. Susimoto tu kanarampananna mintu’ tau tu Yonatan, naurunganni tae’ nadadi dipatei.

46Sulemi tu Saul natorroimo unnula’ to Filistin, anna iatu to Filistin sule lako inanna.

47Iatonna manda’ untoe kadatuan tu Saul dio to Israel, narariimi tu mintu’ ualinna tiku lao: Iamotu to Moab, sia to Amon, sia to Edom, sia mintu’ datu to Zoba sia to Filistin. Sia umba-umba tu nanii male parari, inde dukato nanii unnappa’ kapataloan.

48Napalalongmi tu gau’na, nataloi tu to Amalek sia narampanan tu to Israel dio mai limanna mintu’ to umpangrampai.

49Iatu muane anakna Saul iamotu Yonatan sia Yiswi sia Malkisua na iatu anakna baine da’dua disanga Merab tu pa’bunga’na, na Mikhal tu tampakna.

50Iatu bainena Saul disanga Ahinoam, anakna Ahimaas sia iatu pa’baraninna disanga Abner, iamo anakna Ner, pa’amberanna datu.

51Na iatu Kish, ambe’na Saul, sia Ner, ambe’na Abner, anakna dua Abiel.

52Lan mintu’ allo katuoanna Saul tae’ upu’na tu rari maparrang unnea to Filistin; iamoto anna rampunni Saul lako kalena tu mintu’ to barani sia lalong natiro.


  Share Facebook  |  Share Twitter

 <<  1 Samuel 14 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran