Alkitab Mobile SABDA
[VER] : [TORAJA]     [PL]  [PB] 
 <<  1 Samuel 23 >> 

Daud dio Kehila

1Ta’kala napokadami tau lako Daud, nakua: Iatu to Filistin sirari to Kehila, narampa tu mintu’ apa dio panglulluran gandung.

2Mekutanami Daud lako PUANG, nakua: Ma’dinra’ka la male untaloi tu to Filistin? Nakuami PUANG lako Daud: Malemoko, ammu taloi tu to Filistin, murampananni tu tondok Kehila.

3Apa nakua tu mintu’ to unturu’ Daud: Inde te lan tondok Yehuda, lanmoki’ kamatakuran, apa pole’pi ke la maleki’ lako Kehila, la unnea kaponan surodadu to Filistin.

4Mekutana pole’omi tu Daud lako PUANG, anNa balii PUANG nakua: Ke’de’moko musolo’ rokko Kehila, belanna mintu’ to Filistin la Kusorong tama limammu.

5Malemi tu Daud sola mintu’ solana lako Kehila, anna sirari to Filistin, narambami male tu mintu’ sapinna sia natalo tarru’ tu tau iato mai, naurunganni narampananni Daud tu mintu’ pa’tondokan Kehila dio mai kalena.

6Iatonna mallai tu Abyatar, anakna Ahimelekh, umpellambi’i Daud, lako Kehila, nabaami tu epo’.

7Iatonna mangkamo tau umpokadanni Saul, kumua rampomo tu Daud lako Kehila, nakuami Saul: Nasorongmo Puang Matua tama limangku, belanna tikurungmo, saba’ tamamo kota den ba’bana sia salliranna.

8Nasuami Saul urrampunni tu mintu’ tau la parari, anna solo’ tu tau iato mai rokko Kehila, la umpatama limbu Daud sola mintu’ solana.

9Iatonna issanni Daud, kumua iatu Saul ma’tangnga’ kadake la unneai, ma’kadami lako to minaa Abyatar, nakua: Banna’ mai tu epo’.

10Nakuami Daud: O PUANG, Kapenombanna to Israel, den kareba manassa narangi taumMi, kumua iatu Saul ma’tangnga’ la sae lako Kehila la ussanggang tondok belanna aku.

11La nasorong tonganra’ka to Kehila tama limanna? La solo’ tonganraka tu Saul dao mai, susitu kareba narangi taumMi? O PUANG, Kapenombanna to Israel, pokadanni taumMi tu manassana. Ma’kadami PUANG, Nakua: Tonganna la solo’ dao mai.

12Nakua pole’omi Daud: La nasorong tonganra’ka to Kehila sola mintu’ taungku lako Saul? Ma’kadami PUANG Nakua: La nasorongko tau iato mai.

13Ta’kala ke’de’mi tu Daud sola mintu’ solana, agi-agi annanratu’, tassu’ lan mai Kehila, anna salamba salao lu lako lu dio mai. Iatonna pokadammi tau Saul, kumua tilendokmo tu Daud lan mai Kehila, tae’mi napatarru’ kalingkanna tu datu lako.

Daud lan padang pangallaran Zif

14Torromi tu Daud dio lu padang pangallaran lan lu tambakuku, sia torro dao lu buntu lan padang aak Zif. Nalan mintu’ allo iato nadaka’ Saul, apa tae’ Nasorongi Puang Matua tama limanna.

15Iatonna issanmi Daud, kumua undaka’ lalan tu Saul la umpatei, torromi lan padang pangallaran Zif dio Koresa.

16Ta’kala ke’de’mi tu Yonatan, anakna Saul, anna male sitiro Daud dio Koresa sia umpabatta’ penaanna umposande’ Puang Matua.

17Nakuami lako: Da mumataku’ belanna iatu limanna Saul, ambe’ku, tae’ nala ullambi’ko sangadinna inang iko la undatui Israel na aku ma’penduan dio mai kalemu. Naissan melo ambe’ku Saul tu iannato.

18Sibassemi sola duai dio oloNa PUANG anna torro tu Daud lan Koresa, nasule tu Yonatan lako banuanna.

19Mangkato malemi tu to Zif lu rekke mennolo lako Saul dio Gibea, nakua: Tae’raka miissanni, kumua iatu Daud membuni kisikandappiran lan tambakuku dio Koresa dao tanete Hakhila, rampe sau’na padang talo?

20Totemo, o puang, iake denmi penaammi la male rokko, rokkokomi madoi’; na kami sola nasang untanggungi la ussorongi lako kalemi.

21Ma’kadami Saul, nakua: Napamasakkemorokomi PUANG, belanna mipa’petiroan tu kamamaseammi lako kaleku.

22Totemo malemokomi ma’pasakka’, ammi tiroi sia mipemanassai umba nanii lalan lette’na sia minda tu manassa untiroi dio, belanna iatu mintu’ penggauranna nalaoan kamatarrusan.

23Tiro meloi sia kanassai tu mintu’ pembunian nanii membuni. Mangkato ammi sule lako kaleku umbaa kareba manassa anta mane male sola. Na iake lanni tondok iate, manassa la kudaka’ sakuappa’na lan lu massa’bu-sa’bu to Yehuda.

24Ke’de’mi tu tau iato mai, anna male lako Zif dolo namane Saul. Iatu Daud sola mintu’ taunna dio padang pangallaran Maon, dio padang rampe sau’na padang talo iato.

25Tassu’mi tu Saul sola mintu’ taunna la undaka’i. Iatonna pokadammi tau Daud tu iannato, solo’mi namaneo lu langngan buntu batu, anna torro lan padang pangallaran Maon. Narangimi Saul tu karebanna, naula’i tu Daud lan lu padang aak.

26Unnola indena mai buntu batu tu Saul, na Daud sola mintu’ taunna unnola buntu rampe lakona. Natikara-karaimi tu Daud la undoloi Saul, sia sidi’mora napatama limbui Saul sola mintu’ taunna la untingkanni tu Daud.

27Apa sae misa’ pesua lako Saul, nakua: La madomi’komi male belanna natamaimo to Filistin tu tondok.

28Natorroimi Saul unnula’ Daud, anna sule ullaoi to Filistin. Iamoto anna sangai tau tu inan iato: Buntu Katilendokan.

Daud ungkaturu-turui katuoanna Saul

29(24-1) Malemi tu Daud inde to dio mai, anna torro dio masingki’na dao buntu dio En-Gedi.


  Share Facebook  |  Share Twitter

 <<  1 Samuel 23 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran