Alkitab Mobile SABDA
[VER] : [TORAJA]     [PL]  [PB] 
 <<  1 Tawarikh 28 >> 

Daud mepasan lako Salomo la umbangun Banua Kabusungan

1Narampunmi Daud lako Yerusalem tu mintu’ pangulu to Israel, iamotu pangulunna mintu’ suku, pangulunna mintu’ golongan tu mengkaola lako datu, kamandangna sangsa’bu tau, kamandangna saratu’ tau sia pangulunna mintu’ apa sia patuoanna datu sia anakna muane, sisola mintu’ to mase’ponna datu, pa’barani sia mintu’ to malinta’ parari.

2Bendanmi tu datu Daud nama’kada nakua: Perangiina’, e mintu’ siulu’ku sia taungku; den bu’tu lan penaangku la umbangunanni misa’ banua nanii mari’pi tu patti basseNa PUANG sia bangku pelleseanNa Kapenombanta; sia kupasakka’ tu mintu’ apa dipake la umpabendanni.

3Apa ma’kada tu Puang Matua lako kaleku, Nakua: Tae’ muma’din umpabendanan misa’ banua sangangKu, belanna misa’ko pa’barani sia umpatibollo rara buda.

4Moi nasusito, Natonno’ dukana’ PUANG, Kapenombanna to Israel, dio mai mintu’ rapungku la tontong undatui to Israel; belanna Natonno’ tu Yehuda dadi misa’ arung, na lan mai suku Yehuda iamo rapungku, na dio mai mintu’ anakna ambe’ku aku tu Napopaiman, Naurunganni unnangka’na’ datu undatui mintu’ to Israel.

5Dio mai mintu’ anakku muane – belanna Nakamaseina’ PUANG buda pia muane – Natonno’ tu anakku muane Salomo la unnisung dao isungan kadatuanNa PUANG umparenta to Israel.

6Ma’kadami lako kaleku Nakua: Iatu Salomo, anakmu, iamo la umbangunni tu banuangKu sia tarampakKu, belanna Kutonno’mo dadi anakKu muane sia Aku dukamo la napoAmbe’.

7Sia la kupabantang tu kadatuanna sae lakona, ke tontongi ungkaritutui tu pepasanKu sia atorangKu susite allo iate.

8Iamoto, dio pentirona mintu’ to Israel, iamotu kombonganNa PUANG sia dio pa’peranginNa Kapenombanta, (kukua lako kalemi): Karitutui sia paressa meloi tu mintu’ pepasanNa PUANG, Kapenombammi, ammi poapai te padang melo, sia la miben bati’mi napomana’ undinna tontong sae lakona.

9Na iko, e Salomo, anakku, la mutandai tu Kapenombanna ambe’mu sia ponno penaammu sia masorok ba’tengmu la umpengkaolai, belanna Nasudi PUANG tu mintu’ penaa sia Natarru’ tu mintu’ apa ditangnga’, Iake mudaka’I tu Puang, inang la Naelorangko unnappa’I, apa iake muboko’I, la Natibeko sae lakona.

10Pengkilalai meloi kumua Natonno’ko PUANG la umbangun misa’ banua dipoinan maindan; pabatta’i tu penaammu sia pogau’i to.

11Nasorongmi Daud lako Salomo, anakna muane, tu pandiri tarampak sola mintu’ bilikna, iamotu bilik pangnannan, bilik mengkadaoan sia bilik lanna lu sia bilik nanii tutu’ pebase kasalan.

12Sia ia duka tu pandiri diona tu mintu’ apa natangnga’ lan ba’tengna, iamotu mintu’ tarampakna banuanNa PUANG, mintu’ bilik tiku lao sia bilik pangnannan lan banuanNa Puang Matua sia pangnannan mintu’ apa dipamarimbangan,

13sia inan golonganna mintu’ to minaa sia to Lewi, sia inan pentoean kamenomban lan banuanNa PUANG, sia inanna mintu’ pareanan kamenomban lan banuanNa PUANG.

14Sia nasorongan bulaan pada timbanganna tu napake lako mintu’ pareanan lan simisa’-misa’ kamenomban sia salaka pada timbanganna tu napake lako mintu’ pareanan lan simisa’-misa’ kamenomban;

15iamotu timbangan bulaan digaragai tongkonan palita bulaan sia palita bulaan, sitinaya timbanganna simisa’-misa’ tongkonan palita sola palitanna sia timbangan salaka digaragai tongkonan palita salaka, sitinaya timbanganna mintu’ tongkonan palita sola palitanna susi kadipakeianna simisa’-misa’ tongkonan palita;

16sia timbangan bulaan tu digaragai meda roti pennoloan, sia timbangan salaka tu digaragai meda salaka;

17sia bulaan massang tu digaragai petossok, pindan pa’pi’pikan sia sere’, sia iatu digaragai irusan bulaan, sitinaya timbanganna simisa’-misa’ irusan, sia salaka tu digaragai irusan salaka sitinaya timbanganna simisa’-misa’ irusan;

18sia bulaan massang digaragai inan pemalaran pantunuan dupa sitinaya timbanganna; sia bulaan digaragai rapang-rapang kareta, iamotu karubion, tu tiballa’ pani’na, la ussamboi patti basseNa PUANG.

19Mintu’ te (kadanna Daud) disura’ lan misa’ sura’, ditarima dio mai limanNa PUANG, tu Nanii umpa’patuduanna’ tu diona mintu’ garaganna unturu’ pandiri.

20Ma’kadami Daud lako Salomo, anakna, nakua: La matoto’ko sia batta’ko sia pogau’i to; da mumataku’ sia da mutiramban, belanna PUANG Kapenomban, iamotu KapenombangKu, la urrondongko. Tae’ Nala toyang dio mai kalemu sia tae’ Nala umpopa’elo’nako sae lako mangkanna tu mintu’ pengkarangan diona kamenomban lan banuanNa PUANG.

21Manassa iatu golonganna mintu’ to minaa sia to Lewi inang sakka’ bangmo la untoe mintu’ pentoean kamenomban lan banuanNa Puang Matua, sia sakka’ lako kalemu tu to masorok penaanna sia to manarang lan ma’rupa-rupa pengkarangan la ungkarangi tu mintu’ rupanna pengkarangan, sia mintu’ pangulu sia mintu’ to buda diparandan la umpogau’i tu mintu’ parentamu.


  Share Facebook  |  Share Twitter

 <<  1 Tawarikh 28 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2018
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran