Dual PanelDiona pa’duruk la dipa’pabendanan Banua Kabusungan
1Mangkato ma’kadami tu datu Daud lako mintu’ kombongan, nakua: Iatu anakku Salomo, tu Natonno’mo Puang Matua misa-misai mangurapa sia malolle’pa, anna iate pengkarangan kapua, belanna iate tambakuku tangia inan tolino, sangadinna inanNa PUANG Kapenomban.
2Iamoto kupengkullei tonganni umpasilolongananni banuanNa Kapenombangku te, iamotu bulaan digaraga pareanan bulaan, salaka digaraga pareanan salaka, tambaga digaraga pareanan tambaga, bassi digaraga pareanan bassi, kayu digaraga pareanan kayu, sia parimata ake’ maido sia batu dipa’parimatan, parimata malotong sia parimata pantan rupa, ma’rupa-rupa parimata sia buda batu marmar.
3Ondongpi, belanna kukamali’ tu banuanNa Kapenombangku, iamoto kualai tu ianan kaleku, kusorongan banuanNa Kapenombangku, iamotu bulaan sia salaka, senga’pi tu apa kuparandanan inan maindan:
4tallungsa’bu talenta bulaan, bulaan dio mai Ofir na pitungsa’bu talenta salaka massang la disapuranni tu rindingna mintu’ banua;
5iatu bulaan la digaragai pareanan bulaan na iatu salaka la digaragai pareanan salaka sia iatu mintu’ apa la nagaragai to pande. Na totemo mindara tu malangngo’ penaanna la umpennoloan pamengan lako PUANG.
6Attu iato mangakumi kumua malangngo’ penaanna tu mintu’ pangulu rapu, mintu’ pangulu sukunna to Israel, mintu’ kamandangna to sangsa’bu sia kamandangna to saratu’ sia pangulunna mintu’ to mengkarangna datu.
7Napennoloammi tu apa la dipoparea lan banuanNa PUANG limangsa’bu talenta bulaan na sangpulo sa’bunna darik, sangpulo sa’bunna talenta salaka, sangpulo karua sa’bunna talenta tambaga na saratu sa’bunna talenta bassi.
8Minda-minda unnampui parimata, nasorongi to nadipatama pangnannan ianan banuanNa PUANG, natarimai Yehiel, to Gerson.
9Parannumi penaanna tu to buda diona kamasorokan penaanna tu tau iato mai, belanna tete dio penaa lollong sia masorok nasorongi tu pamenganna lako PUANG; sia ia duka tu datu Daud lendu’ kapuanna parannunna.
Pa’pudi-pudianna Daud
10Attu iato napudi-pudimi Daud tu PUANG dio tingayona kombongan, sia nakua Daud: Mintu’ kadipudian lu lako Kalemi, o PUANG, Kapenombanna Israel, nene’ to doloki, tempon dio mai landa’ lako attu situran.
11Kamumo, o PUANG, unnampui kapasareonganan sia kamatotoran, kamala’biran, kadipangkeran sia kabarre-alloan. Kamuri tu unnampui tu mintu’na apa dao langi’ sia lan lino; Kamuri tu unnampui kadatuan, o PUANG, sia Kamu unnampui kapaan undaoanni mintu’ apa.
12Belanna iatu kasugiran sia iatu kamala’biran bu’tu dio mai Kalemi, sia Kamumo umparentai tu mintu’na sia lan limamMi tu kamatotoran sia kamawatangan, sia Kamuri unnampui kuasa la umpatarompo’ sia umpamatoto’ mintu’ tau.
13Totemo, o Kapenombangki, kipudi-pudiKomi, sia kipakala’bi’ tu sanga madatumMi.
14Belanna mindara’ te na mindara tu bangsaku, angki appa’ kamatotoran ussorongi situang kamasorokan penaangki tu pamengan susite? Belanna mintu’na te lu dio mai Kalemi, angki sorongangKomi tu apa lu dio mai limamMi.
15Belanna kami te to sae sia to mentiruran dio oloMi, susi mintu’ nene’ to doloki; iatu allo katuoangki susi bayo-bayo dao kuli’na padang, tae’ nadiranuan.
16O PUANG, Kapenombangki, iate mintu’ kasugiran lallang, tu kirampun, la umbangunanKomi misa’ banua sia sanga maseroMi, lu dio mai limamMi; mintu’na te apamMi nasang.
17Kuissan, o Kapenombangku, kumua Kamu tu ussudi penaa sia nakalo’ penaamMi tu kamaloloan, – bulo lollong penaangku ussorongangKomi te mintu’ apa iate; totemo parannu penaangku untiroi, kumua iatu taumMi, tu limbong totemo indete, ussorongan, dukaKomi pamengan sisola kamalangngoran penaanna.
18O PUANG, Kapenombanna Abraham, Ishak na Israel, nene’ to doloki, pamanda’i te pa’inaan iate lan penaanna taumMi sae lakona sia popengkaolai tu penaanna tau iato mai lako Kalemi.
19Sia kamaseanni anakku Salomo tu penaa bulo lollong la ungkaritutui tu pepasanMi sia pangadaramMi sia iatu apa Mipondok sia la unturu’i tu mintu’na sia la umbangunni tu tambakuku, tu kupasakka’mo oonganna.
Salomo ditokko dadi datu sia Daud sisarak angin natambuk
20Mangkato nakuami Daud lako mintu’ kombongan: Pudimi tu PUANG, Kapenombammi. Napudimi mintu’ kombongan tu PUANG, Kapenombanna nene’ to dolona, anna malinguntu’ sia tukku menomba dio oloNa PUANG sia dio olona datu.
21Masiang dio mai napemalarammi tau iato mai lako PUANG tu pemala’ pangrere’ sia napennoloan lako PUANG tu pemala’ ditunu pu’pu’, iamotu sangsa’bu sapi laki, sangsa’bu domba laki, sangsa’bu domba sola tu pemala’ pantedokna, sia pemala’ pangrere’ lendu’ budanna, anna pomeloi mintu’ to Israel.
22Kumandemi sia mangiru’ tu tau iato mai dio oloNa PUANG situang kaparannuan kapua, ma’penduanna unnangka’ Salomo, anakna Daud, dadi datu, anna tokkoanni PUANG dadi arung, na Zadok dadi to minaa.
23Unnisungmi tu Salomo dao isungan kapayunganNa PUANG susi datu ussonda Daud, ambe’na, sia maupa’, naurungan naperangii mintu’ to Israel.
24Mintu’ pangulu sia mintu’ pa’barani na mintu’ tu anakna muane datu Daud mangaku la maruru’ sia mengkaola lako datu Salomo.
25Mandu Napatarompo’mi PUANG tu Salomo dio pentirona mintu’ to Israel, sia naben kadatuan kabarre-alloan, tu tae’ bangpa naden dolona misa’ datu dio lu to Israel, tu susi kamala’biranna to.
26Iatu Daud, anakna Isai mangkamo umparenta mintu’ to Israel;
27na iatu attu nanii umparenta to Israel patangpulo taunna, iamotu dio Hebron pitung taun na dio Yerusalem tallungpulo ntallu taunna.
28Iatonna mandu matessekmo sia sebo kasugiranna sia kamala’biranna, sisarakmi angin natambuk tu datu, anna sondai Salomo, anakna muane, dadi datu.
29Iatu tuna’na Daud, la iatu dolona la iatu undinna, tisura’mo lan tuna’na Samuel, to patanda-tandan, sia nabi Natan sia Gad, to patanda-tandan,
30sola mintu’ kadatuanna sia kuasanna sia iatu mintu’ apa urrampoi datu sia Israel na mintu’ kadatuan dio lu padang senga’.