Dual PanelBati’ senga’na Yehuda
1Iatu anakna muane Yehuda iamotu Peres, Hezron, Karmi, Hur na Syobal.
2Reaya, anakna Syobal, undadian Yahat, na Yahat undadian Ahumai na Lahad; iamote tu pa’rapuanna to Zora.
3Inde sia tu anakna muane Etam, iamotu Yizreel, Isma na Idbas; na iatu anak daranna disanga Hazlelponi;
4sia Pnuel, ambe’na Gedor na Ezer, ambe’na Husa. Iamote tu anakna muane Hur, pa’bunga’na Efrata, ambe’na Betlehem.
5Asyur, ambe’na Tekoa, da’dua bainena, iamotu Hela na Naara.
6Na Naara undadianni tu Ahuzam, Hefer, to Temeni na to Ahastari: iamote tu anakna muane Naara.
7Iatu anakna muane Hela iamotu Zeret, Yezohar na Etnan,
8Kos undadian Anub na Hezobeba, sia ia duka tu bati’na Aharhel, anakna Harum.
9Na ia tu Yabes iamo dikasiri’na na mintu’ siulu’na; nasangaimi indo’na Yabes, belanna nakua: masussa kudadian.
10Meongli’mi tu Yabes lako Kapenombanna to Israel nakua: Ke ma’dinni Mipamasakke tonganna’i sia Mipakalua’ tu lili’ku, sia narondongna’ limamMi, sia patoyangi dio mai kaleku tu kamandasan, naurunganni tae’ naruana’ kamasolangan! Nakamaseammi Puang Matua tu apa napalaku.
11Iatu Kelub, siulu’na Suha, undadian Mehir; iamote tu ambe’na Eston.
12Iatu Eston undadian Bet-Rafa, Paseah na Tehina, ambe’na Ir-Nahas; iamote tu to Rekha.
13Iatu anakna muane Kenas iamotu: Otniel na Seraya; iatu anakna Otniel iamotu Hatat na Meonotai.
14Iatu Meonotai undadian Ofra. Iatu Seraya undadian Yoab, ambe’na mintu’ to umpa’tondokki lombok Pande, belanna iatu tau iato mai pande nasangi.
15Iatu anakna muane Kaleb, anakna Yefune, iamotu Iru, Ela na Naam, na iatu anakna muane Ela iamotu Kenas.
16Iatu anakna muane Yehalelel iamotu Zif, Zifa, Tireya na Asareel.
17Iatu anakna muane Ezra iamotu Yeter, Mered, Efer na Yalon. Inde sia tu anakna Bica, anakna baine Firaun, tu napobaine Mered: nadadianni tu Miryam, Samai na Yisbah, ambe’na Estemoa.
18Na iatu baine, to Yehuda undadian Yered, ambe’na Gedor, Heber, ambe’na Sokho, na Yekutiel, ambe’na Zanoah.
19Iatu anakna muane, bainena Hodia, anak daranna Naham iato tu Abi-Kehila, to Garmi, na Estemoa, to Maakha.
20Iatu anakna muane Simon iamotu Amnon, Rina, Benhanan na Tilon; iatu anakna muane Yisei iamotu Zohet na Ben-Zohet.
21Iatu anakna muane Sela, anakna muane Yehuda iamotu Er, ambe’na Lekha, Lada, ambe’na Maresa, sia bati’na to ma’tannun lenang dio mai Bet-Asybea.
22Sia Yokim na to Kozeba; Yoas na Saraf tu umparenta Moab; na Yasubi-Lehem – iamote tu ulelean dadi dolo-dolona.
23Iatu tau iato mai to ma’tampa kurin, umpa’tondokki Netaim na Gedera; iatu tau iato mai torro sikandappi’ datu sia untoean pengkaranganna datu.
Bati’na Simeon
24Iatu anakna muane Simeon iamotu Nemuel, Yamin, Yarib, Zerah na Saul;
25na iatu anakna muane iamotu Salum, na iatu anakna muane Salum iamotu Mibsam, na iatu anakna muane Mibsam iamotu Misma.
26Na iatu anakna muane Misma iamotu Hamuel, na iatu anakna muane Hamuel iamotu Zakur, na iatu anakna muane Zakur iamotu Simei.
27Iatu anakna muane Simei sangpulo annan muane na annan baine; apa iatu siulu’na muane tae’ nabuda anakna muane. Iatu mintu’ rapu lan pa’rapuanna tae’ namarapuan susi bati’na Yehuda.
28Napa’tondokkimi tau iato mai tu Bersyeba, Molada, Hazar-Sual,
29Bilha, Ezem, Tolad,
30Betuel, Horma, Ziklag,
31Bet-Markabot, Hazar-Susim, Bet-Biri na Saaraim. Mintu’nate, napokota tau iato mai sae lako dadinna datu tu Daud.
32Sia iatu inan napa’tondokki iamotu Etam, Ain, Rimon, Tokhen na Asan, lima kota;
33sia ia duka tu mintu’ inan napa’tondokki tiku lao kota iato sae lako Baal. Iamote mai tu inan nanii torro. Manda’ natoe tau iato mai tu Sura’ ossoranna.
34Na Mesobab, Yamlekh, Yosa, anakna muane Amazia,
35Yoël, Yehu – anakna muane Yosibya, anakna muane Seraya, anakna muane Asiel –,
36Elyoënai, Yaakoba, Yesohaya, Asaya, Adiel, Yesimiel, Benaya,
37na Ziza – anakna muane Sifei, anakna muane Alon, anakna muane Yedaya, anakna muane Simri, anakna muane Semaya –,
38mintu’ tu tau iato mai tu disa’bu’ sanganna, arung lan pa’rapuanna. Iatu bati’na memba’ka’ kalle-kallean;
39iamoto malemi tu tau iato mai ma’palulako rampe matampu’ Gedor sae lako rampe matallona lombok iato, la undakaran inan kariuan dombana sia bembe’na.
40Nakabu’tuimi tau iato mai tu padang malompo sia melo; iatu padang iato maluangan liu, sia manaman sia marampa’, moi na iatu tau untorroi dolona bati’na Ham.
41Iatu mintu’ tau, tu disura’ sanganna, saemo tonna linona Hizkia, datu to Yehuda, nasanggangi tu tendana sia natalo tu to Meunim tu naapparan inde to dio. Nasabu’i tu tau iato mai sae lako allo iate, anna male tama umpa’tondokki tu tondokna, belanna inde to dio silasa tu riu nakande dombana sia bembe’na.
42Sangtaan duka dio mai bati’na Simeon, iamotu limaratu’ tau male langngan buntu Seir, na iatu pangulunna iamotu Pelaca, Nearya, Refaya na Uziel, anakna Yisei.
43Napatei tau iato mai tu to Amalek torronapa, tu lussu’ dolona, anna ma’tondok dio sae lako totemo.