Dual PanelPa’pakilalanna rasulu’ diona kamatotoranna Kristus lan kombongan
1Iamote tu ma’pentallunna kasaeangku lako kalemi. Sipatu tu mintu’na apa la napakatua kada sun dio pudukna da’dua ba’tu tallu to sa’bi.
2Mangkamo kupokada dolo, na kupokada dolo pole’omi, – susi tongku dio ren tonna ma’penduanna, totemo te tae’ kudio ren –, lako tu to umpogau’ bang kasalan pirambongi’ sia iatu mintu’ to senga’, kumua iangku sae pole’, tae’mo tau kukatirinnai;
3anna mituntun bang tanda manassana tu Kristus kusumbungan kadanNa, tu tang mipolangga’, sangadinna mipomatoto’.
4Belanna inang dia’ta’ diona kalanggaran, apa tuo sule diona kamatotoranNa Puang Matua. Kami te kipolangga’ duka tu kalanggaranNa, apa la tuokanni sola diona kamatotoranNa Puang Matua, tu dipamanassa lako kalemi.
5Paressa kalenai tu kalemi, ba’tu lan siakomi kapatonganan, ontongpi sudi kalenai tu kalemi. Ba’tu tae’raka miissanni kumua Narondongkomi Yesu Kristus? Bokoranna ke attangangkomi.
6Apa kurannuan la miissan kumua kami te tae’ angki attangan.
7Apa kipalaku langngan Puang Matua dikua anna tae’ kakadakean mipogau’, tae’ kumua angki payanan tang attangan, sangadinna dikuari ammi pogau’ kameloan, moi angki butung to attangan.
8Belanna tae’ kima’din umpogau’i tu untingoinna kamanapparan, sangadinna situru’nari kamanapparan.
9Belanna parannukanni, to ke langga’kanni, anna kamu batta’. Ia duka te iannate kipalakuangkomi tu la miposielle’na.
10Iamo patunna to angku sura’i te iannate, su’ding mambelapa’, kumua iangku diomo ren, tae’mo kumanggi’ ullaoan makarra’i situru’ kakuasan tu Napa’kamasean Puang lako kaleku, iamotu ma’pabendan, tangngia la massongkan.
Pa’pakilala sia pangandona rasulu’
11Ma’katampakanna, e kamu siulu’ku, parannukomi, tuntunni tu miposielle’na, alakomi pa’pakilala, sanginaakomi, sikaelokomi. AnNa Puang Matuamora tu oto’na kamamasean sia kamarampasan urrondongkomi.
12Pada sisalama’komi mipasituru’i pangudung masero.
13(13-12b)Mintu’ to masallo’ umparampo salama’na lako kalemi.
14(13-13) Anna kamaturu-turuanNamora Puang Yesu Kristus na pa’kaboro’Na Puang Matua na kasiturusanNa Penaa Masallo’ urrondongkomi sola nasang.