Alkitab Mobile SABDA
[VER] : [TORAJA]     [PL]  [PB] 
 <<  2 Raja-raja 17 >> 

Diona Hosea, datu Israel

1Iatonna taun ma’pessangpulo dua kadatuanna Ahas, datu Yehuda, dadimi datu tu Hosea, anakna Ela, umparenta to Israel dio Samaria; anna ma’parenta kasera taunna.

2Napogau’mi tu apa kadake dio pentiroNa PUANG, apa tae’ nasusi kadakena tu napogau’ mintu’ datu to Israel tu dolo anna ia.

3Ke’de’mi tu Salmaneser, datu to Asyur, la ullaoi, apa iatu Hosea lumbang baka direngnge’ lako sia umbaya’ sima.

4Apa naapparan datu Asyur tu Hosea umpaden kasipakulu-kuluan, belanna ussua pesua lako So, datu Mesir, sia tang massima dukamo lako datu Asyur, susitu biasanna ke taunoi, iamoto natingkanni datu Asyur sia napattang lan pa’tarungkuan.

5Ke’de’mi tu datu Asyur tarru’ tama mintu’ tondok, sia male ullaoi Samaria, anna patama limbui tallung taun.

6Iatonna taun ma’pengkaseramo kadatuanna Hosea natalomi datu Asyur tu Samaria, anna pali’i tu to Israel lako Asyur, sia napopa’tondok dio Halah, dio biring salu Habor, iamo salu dio Gozan, sia dio lu mintu’ kota to Madai.

Kadiputtaianna to Israel belanna kasalanna

7Ia sia nadipasusito tu to Israel, belanna kasalan lako PUANG, Kapenombanna, tu mangka ussolanni tu tau iato mai lan mai tondok Mesir, dio mai kuasanna Firaun, datu Mesir, sia belanna menomba lako kapenomban senga’,

8sia unturu’ atoranna mintu’ bangsa tu Naula’i PUANG dio mai tingayona to Israel sia mintu’ apa napondok tu mai datu to Israel.

9Natangnga’-tangnga’ to Israel tu apa tang malolo dio pentiroNa PUANG, Kapenombanna; sia napabendan tu inan madao dinii memala’ dio lu mintu’ kota, randuk dio mai menara pa’kampan sae lako kota ditambakuku.

10Napabendanammi kalena ba’tu pira-pira batu dipodeata sia lentong dipodeata dao mintu’ tanete malangka’ sia diong mintu’ garonto’ kayu maluna.

11Indeto dio, dao lu mintu’ inan madao, nanii memala’ tu tau iato mai, susi mintu’ bangsa tu Napali’ PUANG dio mai tingayona tau iato mai; napogau’mo tau iato mai tu apa kadake, tu umpa’dikki penaanNa PUANG.

12Menombami tu tau iato mai lako tu mai rapang-rapang dipodeata, tu nanii PUANG mangka ma’kada diona apa iato, kumua da mipogau’i tu apa susito.

13Napakilalamo PUANG tu to Israel sia to Yehuda nalopian mintu’ nabi sia mintu’ to patanda-tandan, nakua: Mengkatoba’komi dio mai mintu’ penggauran kadakemi sia karitutui tu mintu’ pepasanKu sia iatu apa Kupondok susitu mintu’ sukaran aluk tu mangka Kupepasanan lako nene’ to dolomi, tu Kuparampo lako kalemi nalopian mintu’ taungKu, iamotu mintu’ nabi.

14Apa tae’ naperangii tau iato mai, sangadinna umpamakarra’ penaanna susi nene’ to dolona, tu tae’ nasande’ lako PUANG, Kapenombanna.

15Nasayumo tu apa Napondok sia basseNa tu Natanan Puang sola nene’ to dolona, susi dukato tu mintu’ pa’pakilalaNa tu Naparampo lako tau iato mai; naturu’ bangmo tu apa tang kebattuan, naurunganni dadi tang kebattuan, sia naparundu’i tu alukna mintu’ bangsa untikui, moi anNa mangkamo mepasan tu PUANG lako tau iato mai, kumua da nama’gau’ susito.

16Naboko’i tu mintu’ pepasanNa PUANG, Kapenombanna, anna garaganni kalena tu rapang-rapang dipodeata dipati’no’, iamotu da’dua anak sapi; nagaragai duka tu ba’tu pira-pira lentong dipodeata, sia tukku umpenombai tu mintu’ ma’dandan maritik dao langi’ sia Baal.

17Sia api napamaindananni tu anakna muane sia iatu anakna baine sia pakita-kita sia ma’biangi sia nabalukan tu kalena umpogau’ apa kadake dio pentiroNa PUANG, tu umpa’dikki penaanNa.

18Iamoto anna mandu tu kare’dekanna ara’Na PUANG lako to Israel, naurungan Napatoyang tu tau iato mai dio mai oloNa; tae’ bangmo tinampe sangadi to ma’suku Yehuda mannamo.

19Ia duka tu mai to Yehuda tae’ nakaritutui tu pepasanNa PUANG, Kapenombanna, sangadinna unturu’ mintu’ aluk napoaluk to Israel.

20Iamoto Natumpui PUANG tu mintu’ bati’na Israel. Napamatuna sia Nasorong tama kuasanna to mangrampa, sae lako Nasuale dio mai oloNa.

21Iatonna sarakkimi Puang tu to Israel dio mai bati’na Daud sia iatonna angka’mi tau iato mai tu Yerobeam, anakna Nebat, dadi datu, napatoyangmi Yerobeam tu to Israel dio mai oloNa PUANG sia nasua tu tau iato mai umpogau’ kasalan kapua.

22Iamoto napeolaimi to Israel tu mintu’ kasalan napogau’ Yerobeam; tae’ natorroi,

23sae lako attu Nanii PUANG umpatoyang to Israel dio mai oloNa, susitu mangkamo Napokada nalopian mintu’ taunNa, iamotu mai nabi. Iamoto nadipali’ tu to Israel dio mai tondokna lako tondok Asyur sae lako allo totemo.

Diona to Samaria

24Iatu datu Asyur umpalele tau dio mai Babel sia dio mai Kuta sia dio mai Awa sia dio mai Hamat na Sefarwaim, nasua ma’tondok dio lu mintu’ kota lan lili’na Samaria la ussonda to Israel. Napotondokmi tu Samaria sia natorroi tu mai kotana.

25Iatonna mane ma’tondok dio, tae’ napenombai PUANG tu tau iato mai; iamoto Nasuai PUANG tu ba’tu pira-pira singa lao umpatei tu ba’tu pira-pira tau.

26Iamoto ma’kadami tu tau lako datu Asyur, nakua: Iatu mintu’ to buda tu mipalengka’, ammi suai ma’tondok lan lu kota Samaria, tae’ natandai umba nakua tu sipato’na umpenombai Kapenombanna tondok iato; iamoto Nasuami ba’tu pira-pira singa lako tau iato; anna patei tu tau iato, belanna tae’ natandai umba nakua tu sipato’na umpenombai Kapenombanna tondok iato.

27Mesuami tu datu Asyur nakua: Solanni lako tu misa’ to minaa, tu mipali’ dio mai, anna ma’tondok dio, sia naada’i tu tau iato mai umba nakua la sipatu umpenombai tu Kapenombanna tondok iato.

28Saemi tu tau misa’ dio mai mintu’ to minaa tu napali’ dio mai Samaria, anna ma’tondok dio Betel, sia naada’i, umba la nakua umpenombai PUANG.

29Apa pantan nagaragai duka, ke sisangbangsaoi tu rapang-rapang dipodeatanna, napadioi banua dinii memala’ dao inan madao, tu napabendan to Samaria, ke sisangbangsaoi lan tu kota nanii ma’tondok.

30Iatu to lu dio mai Babel unggaragai rapang-rapang dipodeatanna Sukot-Benot, na to dio mai Kuta unggaragai rapang-rapang dipodeatanna Nergal, na to dio mai Hamat unggaragai rapang-rapang dipodeatanna Asima,

31na iatu to Awa unggaragai rapang-rapang dipodeatanna Nibhas sia Tartak. Na iatu to Sefarwaim untunu anakna, natunuan Adramelekh sia Anamelekh, iamotu deatanna.

32Umpakaraya duka PUANG tu tau iato mai sia pantan tama tau naangka’ tu to minaanna inan madao, tu umpogauranni kamenomban lan banua dinii memala’ dao inan madao.

33Iatu tau iato mai umpakaraya PUANG, apa tontong duka umpenombai deatanna susi alukna mintu’ bangsa, diomora mai dinii umpalengka’i male tu tau iato mai.

34Sae lako allo iate iatu tau iato umpeolaipa aluk dolo. Tae’ napangke’i tu PUANG sia tae’ duka napeolai tu mintu’ apa tipondok sia atoran, sia sukaran aluk sia pepasan, tu Napepasanan PUANG lako bati’na Yakub, tu Nasangai Israel.

35Belanna iatu to Israel Nanii PUANG untanan basse sia mepasan lako Nakua: Da’ mipakaraya kapenomban senga’ sia da’ mipengkaolai sia da’ mipennoloan pemala’ lako.

36Sangadiri PUANG tu ussolangkomi tassu’ lan mai tondok Mesir tete dio kamatotoran kapuaNa sia tete dio lima tie’te’Na, manassa Iamo la mipangke’, sia la minnii tukku menomba sia lakori la minnii umpennoloan pemala’.

37Iatu mintu’ apa dipondok sia atoran sia sukaran aluk sia pepasan, tu Nasurasangkomi, la tontong mikaritutui. Da mipangke’ kapenomban senga’.

38Da mikalupai tu basse tatanan; da mipangke’i tu kapenomban senga’.

39Sangadinna la mipakaraya tu PUANG, Kapenombammi; iake susito Puang duka la urrampanankomi dio mai limanna ualimmi.

40Apa tae’ naperangii tau iato mai, sangadinna tontongpa unturu’ aluk dolona.

41Susimoto tu bangsa iate umpangke’ PUANG sia umpenombai rapang-rapang dipodeatanna. Ia duka tu mintu’ anakna sia ampona umpogau’i sae lako allo iate susi nene’ to dolona.


  Share Facebook  |  Share Twitter

 <<  2 Raja-raja 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel