Alkitab Mobile SABDA
[VER] : [TORAJA]     [PL]  [PB] 
 <<  2 Raja-raja 18 >> 

Diona Hizkia, datu Yehuda

1Iatonna taun ma’pentallun kadatuanna Hosea, anakna Ela, datu to Israel, dadimi datu tu Hizkia, anakna Ahas, umparenta to Yehuda.

2Duangpulomo llima taunna, tonna dadi datu, anna ma’parenta duangpulo ngkasera taunna dio Yerusalem. Iatu indo’na disanga’ Abi, anakna Zakharia.

3Napogau’mi tu apa malolo dio pentiroNa PUANG, susitu mintu’ napogau’ Daud, nene’ to dolona.

4Naratoimi tu mintu’ inan madao dinii memala’, sia natesse-tesse tu batu dipodeata sia nalelleng tu lentong kayu dipodeata, sia nanisak-nisak duka tu ula’ tambaga tu nagaragai Musa, belanna sae lako allo iato nanii to Israel memala’. Nasangaimi tau Nehustan.

5Sande’mi tu datu lako PUANG, Kapenombanna to Israel; naurunganni undinna tae’ tu sangtende’na dio lu mintu’ datu to Yehuda, moi dolona anna ia tae’ duka.

6Sia la’ka’ tu datu lako PUANG, tae’ naboko’i sia nakaritutui tu mintu’ pepasan, tu mangka Napepasanan PUANG lako Musa.

7Iamoto Narondongi PUANG; umba-umba tu nanii male, inde to nanii maupa’. Nabalimo tu datu Asyur sia tae’mo napengkaolai.

8Natalomi tu to Filistin sae lako Gaza sia (Nasanggang) tu mintu’ lili’na, randuk dio mai manara pa’kampan sae lako kota ditambakuku.

9Iatonna taun ma’penna’pa’na kadatuanna Hizkia, iamotu taun ma’pempitu kadatuanna Hosea, anakna Ela, datu Israel, ke’de’mi tu Salmaneser, datu Asyur, ullaoi Samaria sia umpatama limbui.

10Natalomi tau iato mai tonna upu’mo tallung taun; iatonna taun ma’pennannan kadatuanna Hizkia, iamotu taun ma’pengkasera kadatuanna Hosea, datu Israel, ditalomi tu Samaria.

11Napali’mi datu Asyur tu to Israel lako Asyur sia nabaa lako Halah, sia lako biring salu Habor, iamotu salu dio Gozan, sia lako tu mai kota to Madai.

12Belanna tae’ naperangii tau iato mai tu PUANG, Kapenombanna, sangadinna natengkai tu basseNa; iamotu mintu’ apa Napepasanan lako Musa, taunNa PUANG; tae’ naperangii sia tae’ napogau’i.

Diona Sanherib umpakarrang to lan Yerusalem ( ; )

13Iatonna taun ma’pessangpulo a’pa’na kadatuanna Hizkia, saemi tu Sanherib, datu Asyur, urrarii mintu’ kota ditambakukunna Yehuda anna taloi.

14Ussuami pesua tu Hizkia, datu Yehuda, lako datu Asyur dio Lakhis, nakua: Salamo’; serekomi dio mai kaleku, na apa-apa tu mipapassananna’ la kupassan. Napapassannimi datu Asyur tu Hizkia, datu Yehuda, tallu ratu’ talenta salaka na tallungpulo talenta bulaan.

15Nasorongmi Hizkia tu mintu’ salaka lan banuanNa PUANG sia lan bilik pangnannanna tongkonan layuk.

16Iatonna iato nakalopakkimi Hizkia tu bulaan dio mai mintu’ ba’ba sia lentong banua kabusunganna PUANG tu napale’ke’ Hizkia, datu Yehuda; anna sorongi lako datu Asyur.

17Mangkato nasuami datu Asyur tu kamandang ma’iringanna sia pangulu to mase’ponna datu sia kamandang lompo dio mai Lakhis sola sangtuntunan surodadu matoto’ lako Yerusalem, lako datu Hizkia. Ke’de’mi tu tau iato mai anna rampo lako Yerusalem. Iatonna rampomo, ma’kaponanmi sikandappi’ saruran limbong iringna dao dio lalan ma’palulakona padang pamusoran sampin bulu domba.

18Iatonna metamba tu tau iato mai kumua nasae tu datu, tassu’mi tu Elyakim, anakna Hilkia, pangulu sandan uai sola Sebna, pangulu to massura’, sia Yoah, anakna Asaf, pa’paelean, lako tau iato mai.

19Ma’kadami tu kamandang lompo lako tau iato mai, nakua: Pokadanni Hizkia, kumua: Susite tu kadanna datu kapua, iamotu datu Asyur: Umbara susitu kapa’rannuanan tu lan penaammi?

20Misangaraka, kumua puduk bangri la dipomanarang sia la dipomatoto’ parari! Mindara miporannuan, ammi balira’?

21Manassa mirannuan tu tekken bulo le’to, iamotu Mesir, anna minda-minda undemme’i, la natossok tu limanna, anna tarru’i; susimoto tu Firaun, datu Mesir, lako mintu’ tu to urrannuanni.

22Apa iake mikua lako kaleku, kumua: Urrannuangkan PUANG, Kapenombangki tangiaraka Ia tu mangka naputtai Hizkia mintu’ inan madaoNa dinii memala’ sia inan pemalaranNa, anna ma’kada lako to Yehuda sia mintu’ issinna Yerusalem, nakua: La tukkukomi menomba dio tingayo inan pemalaran iate?

23Totemo melo ke sitangga’komi puangku, datu Asyur, angku benkomi darang duangsa’bu, ke mibela dukai umpadenni tu pakkanarang la ussakei.

24Umba mikua la umbelai sitingoan sala umbanna misa’i tu to maraya, moi iatu tau madionganna puangku? Apa ma’rannuan lakokomi Mesir belanna mintu’ kareta parari sia mintu’ pakkanarang.

25Iamoto tang pangeloranNaraka PUANG, angku sae ullaoi te kota iate sia ussanggangi? PUANGmo tu mangka ma’kada lako kaleku Nakua: Malemoko ullaoi te tondok iate sia ussanggangi.

26Nakuami tu Elyakim, anakna Hilkia sia Sebna sia Yoah lako kamandang lompo: Melo ke ma’basa Aramkomi umpa’kadaikanni, belanna kitandai sia; ke ma’dinni da mima’basa Yehuda ma’kada lako kaleki dio pa’peranginna mintu’ to buda, tu dao rinding tembo’.

27Apa nakua tu kamandang lompo lako tau iato mai: Nasuara’ka puangku umparampoi te mintu’ kada iate lako puangmi sia lako kalemi? Tang lakoraka tu mintu’ to unno’ko’ dao rinding tembo’ la dinii umparampoi, tu la misisolan ungkande tainna sia unniru’ tenena?

28Malemi lako tingayo tu kamandang lompo, anna metamba umpekapuai gamaranna ma’basa Yehuda, nakua: Perangiimi tu kadanna datu kapua, iamotu datu Asyur.

29Inde sia tu kadanna datu iato: Da napakenakomi Hizkia, belanna tae’ nabelai ullendokangkomi lan mai kuasangku.

30Sia da nanarankomi Hizkia la urrannuan PUANG, kumua: Manassa PUANG la ullendokangki’, naurunganni iate kota iate tae’ nadisorong tama kuasanna datu to Asyur.

31Da miperangii tu kadanna Hizkia, belanna nakua kadanna datu to Asyur: Menombakomi sia ussorongkomi kalemi lako kaleku, ammi pantan ungkandei tu bua anggoro’mi sia bua arami sia pantan unniru’ uai lan mai bubunmi.

32Sae lako kasaeangku umpalelekomi lako misa’ padang tu susi padangmi, iamotu misa’ padang sebo gandungna sia uai anggoro’ ba’runna, misa’ padang sebo rotinna sia pa’lak anggoro’na, misa’ padang sebo kayu saitunna sia minna’na sia tani’ enoanna, kumua ammi tuo, da mimate. Apa da miperangii tu kadanna Hizkia, belanna napapusakomi, tu nakua: PUANG la ullendokangki’.

33Denraka misa’i tu deatanna mintu’ bangsa ma’din urrampanan tondokna lan mai kuasanna datu Asyur?

34Umbara tu mai deatanna Hamat sia Arpad, umbara tu mai deatanna Sefarwaim, Hena sia Iwa? Nakulleraka ullendokan Samaria dio mai kuasangku?

35Dio lu mintu’ deatanna tondok iato, mindara ungkullei ullendokan tondokna lan mai kuasangku, naurunganni ma’din dukao tu PUANG urrampanan Yerusalem lan mai kuasangku?

36Apa kappa bang tu to buda sia tae’ napebalii moi sangbuku kada, belanna napa’parentan datu kumua: Da mibali lenni.

37Saemi tu Elyakim, anakna Hilkia, pangulu sandan uai sia Sebna, pangulu to massura’, sia Yoah, anakna Asaf, pa’paelean, usserek-serek tamangkalena umpennoloi Hizkia, anna parampoi lako datu tu mintu’ kadanna kamandang lompo.


  Share Facebook  |  Share Twitter

 <<  2 Raja-raja 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran