Dual PanelDaud diangka’ datu dio Hebron
1Mangkato mekutanami tu Daud lako PUANG, nakua: Ma’dinra’ka ke’de’ inde te lako sala umbanna tondok Yehuda? Mebalimi PUANG lako, Nakua: Ke’de’moko. Nakuami Daud: Tondok umbara tu sipatu la kunii male? Nakuami PUANG: Lako Hebron.
2Mangkato ke’de’mi tu Daud lako sola tu bainena da’dua, iamotu Ahinoam, to Yizreel sia Abigail, tu pura bainena Nabal, to Karmel.
3Sia nasua Daud tu mintu’ tau nasolan male, pantan sibaa repokna, anna torro lan lu mintu’ tondok lan lili’na Hebron.
4Saemi tu to Yehuda anna tokkoi tu Daud dio la dadi datunna suku Yehuda. Napokadammi tau Daud kumua: To Yabesh dio Gilead tu ullamun Saul.
5Mesuami Daud lako to Yabesh dio Gilead, nakua lako: Naparongko’morokomi PUANG, belanna kamaturu-turuan tu mipogau’ lako puangmi, iamotu Saul, tu mangkamo milamun.
6Totemo na PUANGmora umpakitangkomi kamamasean sia kamarurusan sia aku duka la umpakitangkomi kameloan pada tu mipogau’na, belanna mangkamo mipogau’ tu iannato.
7Totemo pamatoto’komi kalemi sia pa’pekitananni tu kapiamuaneammi, moi anna matemo tu Saul, puangmi; ondongpi mangkamo’ natokko rapu Yehuda la undatui.
Diona kasirarianna Daud anna Ishboset
8Apa iatu Abner, anakna Ner, kamandang surodadunna Saul, naala tu Ishboset, anakna Saul, nabaai lamban lian Mahanaim,
9naangka’i datunna mintu’ lili’na Gilead sia Asyuri sia lako mintu’ lili’na Yizreel sia to Efraim sia to Benyamin, iamotu mintu’ to Israel.
10Iatu Ishboset, anakna Saul, tonna ditokko undatui to Israel patangpulomo taunna, ma’parentami duangtaun. Ia manna tu suku Yehuda unturu’ Daud.
11Iatu mintu’ attu kama’parentanna Daud dio Hebron undatui suku Yehuda pitung taun annan bulanna.
12Den pissan tassu’mi tu Abner, anakna Ner, sola surodadunna Ishboset, anakna Saul, dio mai Mahanaim lako Gibeon.
13Tassu’ dukaomi tu Yoab, anakna Zeruya sola surodadunna Daud, anna sitammu dio limbong Gibeon; pada torromi tu tau iato mai, misa’ rampe lakona na misa’ rampe indena mai limbong iato.
14Nakuami Abner lako Yoab: Melo totemo, ke bendanni ba’tu pira-pira pia muane anna siea dio olota. Mebalimi Yoab: Melo.
15Bendanmi tu tau iato mai, anna tassu’ lako tingayo, anna diia’, iamotu dio mai Benyamin sangpulo dua tau bannang dio Ishboset, anakna Saul, na sangpulo dua tau dio mai mintu’ surodadunna Daud.
16Pada natoemi tu ulunna balinna, anna pada umperru’busanni tu pa’dangna tama la’pekna balinna, naurungan pada songka nasang. Iamoto nasangai tau tu inan iato Helkat-Hazurim, tu sikandappi’ Gibeon.
17Tonna allo iato mandu masarrangmi tu kasirarian, anna talo tu Abner sia to Israel dio olona mintu’ taunna Daud.
18Dio duka ren tu tallu muane, anakna Zeruya, iamotu Yoab, Abisai na Asael; iatu Asael malinta’ susi donga dio lu padang.
19Naula’mi Asael tu Abner, sia tang sepang kairi ba’tu kanan dio mai boko’na Abner.
20Messailemi tu Abner, anna ma’kada nakua: Ikoraka Asael te? Mebalimi nakua: Akumo.
21Nakuami Abner lako: Sepang kananko ba’tu kairi, tingkanni misa’ tu to mangura sia rampai tu mintu’ apa dio kalena. Apa manoka tu Asael mallai dio mai boko’na.
22Nakua pole’omi Abner lako Asael: Mallaiko dio mai boko’ku. Apara gai’mu la kusambakki ammu songka rokko padang? Undinna umba la kukua untiroi tu lindona Yoab, kakammu?
23Apa manoka mallai dio mai kalena, anna rokki Abner tampak dokena tu tambukna, natarru’i tu boko’na; songkami inde to anna mate inde bangsiamoto. Mintu’ tu to lendu’ dio mai inan nanii Asael mate, tadang inde to.
24Apa naula’ Yoab sola Abisai tu Abner. Iatonna lambunmo allo, rampomi tu tau iato mai lako tanete Ama rampe matallona Giah, tu ma’palulako padang pangallaran Gibeon.
25Sirampunmi tu to Benyamin dio boko’na Abner anna dadi sangtuntunan nabendan dao misa’ botto tanete.
26Metambami Abner lako Yoab, nakua: Sipaturaka tu pa’dang la kumande tae’ upu’na? Tae’raka muissanni kumua la mapai’ tu katampakanna? Sangapaporoko tang la ussuai sule tu to buda unnula’ siulu’na?
27Mebalimi Yoab nakua: La lelukraka tuoNa Puang Matua, iake mupokada doloi, manassa melambi’pa ina’ natibalik tu to buda unnula’ siulu’na!
28Umpannonimi napiri tanduk tu Yoab anna tadang tu to buda, sia tae’mo naula’i tu to Israel sia tae’ dukamo natarru’ sirari.
29Naolaimi Abner sola mintu’ taunna tu Araba-Yordan iato, situ’turan bongi, anna lambanni Yordan, sia lumingkapa sangpolo allo namane rampo lako Mahanaim.
30Sulemi tu Yoab unnula’ Abner, narampunni tu mintu’ tau; iatu mintu’ taunna Daud pa’de sangpulo kasera, senga’ ia tu Asael.
31Apa iatu to Benyamin nabela’ pa’dang mintu’ taunna Daud, anna dipatei tu taunna Abner talluratu’ annan pulona.
32Naangka’mi tu Asael anna lamunni lan lamunanna ambe’na dio Betlehem. Lumingkami tu Yoab sola mintu’ taunna situ’turan bongi, tibangka’mo masiang tonna rampo lako Hebron.