Dual PanelTo Gibeon untuntun bati’na Saul la dipatei
1Iatonna linona Daud denmi karorian pannang situru’-turu’ bang tallung taun; iamoto anna masambayang tu Daud umpekutananni langngan PUANG. Napebaliimi PUANG Nakua: Iamo tu Saul, sola bati’na kaindanan rara bangsia, belanna mangka umpatei to Gibeon.
2Natambaimi datu tu to Gibeon anna ma’kada lako kalena. – Iatu to Gibeon tae’ nasangbilangan to Israel, sangadinna sangbilangan tu to Amori disesannapa; moi namangkamo sibasse sia sisumpa to Israel tu tau iato mai, apa undaka’ lalan tu Saul la ussanggangi tu tau iato mai, belanna kamatutturanna tu la napomelona to Israel sia to Yehuda –.
3Nakuami Daud lako to Gibeon: Apara la ma’din kupogaurangkomi sia apara la kunii umpaden pengkalossoran, ammi passakkei tu mana’na PUANG?
4Nakuami tu to Gibeon lako datu: Tae’ra kituntun bulaan sia salakana Saul sia bati’na la kipopengkalossoran sia tae’ra kisipatu la umpatei misa’ to Israel. Nakuami datu: Apara tu miporai la kupogaurangkomi?
5Nakuami tu tau iato mai lako datu: Iatu to ussanggangkanni sia ma’tangnga’ la ussabu’ikan, kiurunganni tang sumalimbayo lan lu mintu’ lili’na Israes-
6la mibenkanni pitu tu anakna muane, angki tokeranni PUANG dio Gibeon Saul, to Natonno’ PUANG. Nakuami datu: La kubenkomi.
7Apa tang namasean penaa datu tu Mefiboset, anakna Yonatan, anakna Saul, belanna mangkamo umposumpa PUANG, tu unnarra’i sola duai iamotu Daud na Yonatan, anakna Saul.
8Naalami datu tu anakna Rizpa, anakna Aya, da’dua pia muane, tu napadadian Saul, iamotu Armoni sia Mefiboset, sia iatu anakna Merab, anakna Saul, lima pia muane, tu napadadian Adriel, anakna Barzilai, to Meholati.
9Nasorongi tu tau iato sola nasangi lako to Gibeon, anna toke’i dao buntu dio oloNa PUANG. Susimoto tu kadisabu’iranna tu tau sola pitui sia dipatei tonna mane pedalle sisikan, iamotu bunga’na allo pedalle sisikan.
10Naalami Rizpa tu sampin karung nasamboanni kalena dao buntu batu randuk dio mai bunga’na pedalle sisikan sae lako nato’doinna uran dao mai langi’; tang naeloran tu tau iato mai narandan manuk-manuk dao langi’ ke allona sia olo’-olo’ masuru ke bonginna.
11Naparampomi tau lako Daud tu penggauranna Rizpa, anakna Aya, gundi’na Saul.
12Malemi tu Daud unnalai tu bukunna Saul sia bukunna Yonatan, anakna, dio mai pa’tondokan to Yabesh dio Gilead, tu naala buni pirambongi’ dio pasa’ dio Bet-San, inan nanii untoke’i to Filistin, tonna patei to Filistin tu Saul dao Gilboa;
13nabaami datu dio mai tu bukunna Saul sia bukunna Yonatan, anakna, narampun dukai tu bukunna mintu’ tu to ditoke’.
14Nalamunmi tu bukunna Saul sia Yonatan, anakna, dio padangna Benyamin dio Zela, lan panglamunanna Kish, ambe’na. Iatonna mangkamo tau umpogau’i susitu mintu’ kadanna datu, maneri Puang Matua ungkaturu-turui sule tu tondok iato.
Kasirarianna Daud na to Filistin
15Den pole’omi pissan kasirarianna to Filistin na to Israel; ke’de’mi tu Daud sola mintu’ surodadunna, anna sirari to Filistin, naurunganni mandu tonganmo bo’yo’ tu Daud.
16Denmi dio tu Yisbi-Benob, tarukna Rafa –, iatu magasanna dokena talluratu’ sikele’ tambaga anna ma’bayu kararran bassi ba’ru – la morai umpatei Daud.
17Apa sae tu Abisai, anakna Zeruya untundui tu datu, naba’tai tu to Filistin iato, anna mate. Mangkato napalaku tongan-tonganmi mintu’ surodadunna Daud sia umpalao sumpa lako datu, nakua: Damo mitassu’ ussolangkanni lao parari, da napa’dei puangki tu palitanna Israel.
18Undinnato den pole’omi misa’ kasirarian lako to Filistin dio Gob; attu iato napateimi Sibkhai to Husati, tu Saf, tarukna Rafa.
19Sia den pole’omi kasirarian to Filistin dio Gob, anna patei Elhanan, anakna Yaare-Oregim, to dio mai Betlehem tu Goliat, to Gat; na iatu batang dokena sama tandaan to ma’tannun.
20Sia den pole’omi kasirarian dio Gat; den misa’ muane dio tu tarru’ malangka’ sia iatu mai tangkena rundun siannanan tu rakka’na patomali, mintu’na duangpulo nna’pa’; tau iato tarukna Rafa.
21Natapa’ tu to Israel, apa napatei Yonatan, anakna Simea, kakanna Daud.
22Iatu tau a’pa’ iamo tarukna Rafa dio Gat; matemo tu tau iato mai napatei Daud sola mintu’ surodadunna.