Dual PanelPa’tendeng pa’kurre-sumangasanna Daud
1Naparampomi Daud langngan PUANG tu mintu’ buena sengo iate, tonna rampananni PUANG dio mai mintu’ ualinna sia dio mai Saul.
2Nakua: O PUANG, buntu batungku, sia tambakuku matoto’ku, sia To urrampananna’.
3Kapenombangku sia Buntu batungku, tu kunii mentirerung, Iamo kupobalulang, sia tanduk kasalamarangku, sia benteng matoto’ku. Sia pentilindungangku, sia pela’bakku; tu mangka ullendokanna’ dio mai pa’pakario-rio.
4Metambana’ kukua: Sipatu tu PUANG dipudi! Tu belanna tilendokmo’ dio mai mintu’ ualingku.
5Iatu bombang kamatean untikuina’, sia natu’ba’na’ darra’ kasanggangan.
6Naerrena’ mintu’ pearra’ lino to mate, sia la naalana’ mintu’ poya kamatean.
7Iatongku lan kamatakuran, meongli’na’ langngan PUANG, sia mengkamoyana’ lako Kapenombang- ku. Iatu gamarangku Narangimo tama inan kapayunganNa. Sia rampomo tama talinganNa tu pengkamoyaku.
8Lino’mi tu padang sia tigega’, sia mintu’na parandangan langi’ tiseno, sia tigega’ belanna kare’dekanna ara’Na.
9Sun tu rambu dao mai illongNa, sia api lan mai sadangNa ma’pamampu’, sia iatu ruaya napopa’lulu-lulu.
10Napalempemi tu langi’ anNa mengkalao. Na iatu lillinan parrak diongna lu lentekNa.
11Ussakeimi karubion Namettia’, sia payan dao pani’ angin.
12Iatu malillin Naa’ga pentirerungan untikui, iamotu uran pittuk sia salebu’ makamban.
13Iatu arrang dio oloNa umpopa’lulu-lulu ruaya.
14Gumalugumi tu PUANG dao mai langi’, sia umpopemanna gamaranNa tu Puang Patodoranna.
15Napa’panan tu tinaran anNa pasisarak-sarakki tu tau iato mai. Sia Napasilalle-lalle tu kila’, anNa patirambanni tu tau iato mai.
16Iato attu iato payanmi tu mintu’ sali tasik, sia mintu’ parandangan lino sombo duka, tu belanna pegarrakNa PUANG, sia belanna pa’pamurru’na penaanNa dao mai illongNa.
17Naulumi tu limanNa dao mai unnalana’, Nariu’na’ lan mai uai luang.
18Narampananna’ dio mai mintu’ uali lalongku, sia dio mai to ungkabiri’na’, belanna nasau’na’ tu tau iato mai.
19Iatongku maparri’ narukka’na’ tu tau iato mai, apa PUANG ussande’na’.
20Nasolammo’ sun lako inan malona’, sia Narampananna’, belanna Napopai- manna’.
21Napapatuimo’ PUANG sitinaya kamaloloangku, sia Napapakkannina’ sitinaya kamaseroanna limangku,
22belanna kuturu’mo tu mintu’ lalanNa PUANG, sia tae’ bangpa angku sala’ kedo, sepang dio mai Kapenombangku.
23Belanna mintu’ atoranNa tontong kupalan ara’, sia tae’ angku sepang dio mai tu Napondokna.
24Sangadinna bulo lollong tu penaangku lako Kalena, sia ungkaritutuina’ kaleku dio mai kakadakean.
25Iamoto anNa papakkannina’ PUANG sitinaya kamaloloangku, sia sitinaya kamaseropindanangku dio oloNa.
26Lako to maruru’, Mikaruru’i duka, sia lako to tang sayuanna Mipemaloloan penaa,
27sia lako to masallo’, Mikasallo’i duka, apa lako to leko’ penaanna, Miuali,
28sia Mirampanan tu bangsa dipandasa, apa iatu matamMi unde’de’i mintu’ to matampo, amMi popengkadionganni.
29Belanna Kamumo palitangku, o PUANG, sia PUANG umpopembali maseroi tu kamalillinangku.
30Belanna Kamuri angku laoi sangkaponan surodadu, sia Kapenombangkuri angku leanni benteng batu.
31Iatu Kapenomban sundun tu lalanNa, iatu kadanNa PUANG tang kabissikan. Iamo napobalulang mintu’ to umposan- de’i.
32Belanna mindara senga’na tu Kapenomban, ke tang PUANG, sia mindara laenna tu buntu batu, ke tang Kapenombanta?
33Puang Matuamo tu tambakuku matoto’ku, sia Iamo umpamarante lalanku.
34Napaten to lentek donga birang tu lentekku, sia Napatulangdanna’ dao inan matan- deku.
35Napopa’biasa tu limangku parari, Naurunganni malute tu limangku unggittingan ulang pana tambaga.
36Mikamasean dukamo’ balulang kadikarimmanan lu dio mai Kalemi. Belanna Mipasiolamo tu pengkamoyaku, angku pomala’bi’i.
37Mipamalona’mo tu kuninna mentengka, natae’ natiparedok tu pa’gallangangku.
38Kuula’ sumpumo tu ualingku angku sanggangi, sia tae’ kusule, ke tang kumangsanni nasangpi.
39Mangkamo kusanggangi, angku sabu’i, naurunganni tang malimbangunmo sule, sia tibambang diong to’ lentekku.
40Belanna mangkamoKomi umpatambeke’ina’ kamabukuan la parari, sia mangkamo Mipatunduk lako kaleku tu mintu’ to unneana’.
41Mipopemboko’mo mallai tu mintu’ ualingku, sia kumangsannimo tu mintu’ to ungkabiri’na’.
42Mentiro-tiro bang tu tau iato mai, apa tae’ misa’ tau untundui, ummanta-mantai PUANG, apa tae’ Napebalii.
43Kunisak-nisak tu tau iato mai butung to barra’-barra’ dio lu padang, kulullu’-lullu’ sia kupolungganak ten to so’mak dio lu lalan.
44MangkamoKomi urrampananna’ dio mai kasipakkanna bangsaku. Misande’mo’ angku tontong umpangului to sangpetayanan; iatu bangsa tang kuperambu sae duka mengkaunan lako kaleku.
45Iatu to salian bangsa naangga’-angga’i mengkanorong lako kaleku, mane narangi tu diona a’gangku, naturu’mi tu parentaku.
46Iatu to salian bangsa moro’mo tu kamatotoranna, anna ma’parondo sun lan mai tambaku- kunna.
47Iatu PUANG tuo sia mintu’na kadipuadian lu lako nasang Puang Buntu batungku, sia anna dipekalangka’i tu Puang Matua, oto’na kasalamarangku.
48Iamotu Puang Matua mangka umpopembala’na’, sia umpopengkanorong ba’tu pira-pira bangsa lako kaleku,
49tu urrampananna’ dio mai mintu’ ualingku. Ondongpi Kamu duka umpamadoanna’ na iatu mintu’ to umbalina’, sia Kamumo tu ullussuranna’ dio mai to masa’ga’.
50Iamoto angku la umpudiKomi, o PUANG, dio lu mintu’ bangsa, sia la kupenanian pa’pudian tu sangamMi.
51Iamo umpakapua kadirampananna datunNa, tu umpa’pekitanan kamarurusan lako to Natokko, iamotu Daud sia bati’na tontong sae lakona!