Dual PanelDiona kadatuan sia kuasanna Yosafat
1Na Yosafat, anakna muane, ussondai dadi datu. Umpamatoto’mi kalena unnea Israel.
2Napanniimi ba’tu pira-pira surodadu lan tu mintu’ kota ditambakuku dio Yehuda sia surodadu pa’kampa lan tondok Yehuda sia lan mintu’ kota Efraim, tu mangka natalo Asa, ambe’na.
3Narondong PUANG tu Yosafat, belanna unturu’ bang mintu’ bate lalan dolona Daud, nene’ to dolona; sia tae’ nadaka’i tu mintu’ Baal,
4sangadinna Kapenombanna nene’ to dolona; anna lolang unturu’ mintu’ pepasanNa sia iatu penggauranna tae’ nasusi to Israel.
5Napamanda’mi PUANG tu kuasa kadatuan lan limanna Yosafat, na iatu mintu’ to Yehuda pada sae umpennoloan pamengan lako Yosafat, naurunganni sugi’ lallang sia mala’bi’ tongan.
6Batta’mi penaanna unturu’ lalanNa PUANG, ondongpi naputtai tu inan madao sia iatu lentong dipodeata lan mai Yehuda.
7Iatonna taun ma’pentallummo kadatuanna ussuami pangulunna, iamotu Benhail, Obaja, Zakharia, Netaneel sia Mikha, male ma’pangada’ lan lu mintu’ kota Yehuda.
8Sisola tu mai to Lewi, iamotu Semaya, Netanya, Zebaja, Asael, Semiramot, Yonatan, Adonia, Tobia na Tob-Adonia, dio mai to Lewi, sola to minaa Elisama na Yoram.
9Iatu tau iato mai ma’pangada’mo dio lu Yehuda sia nabaamo tu sura’ Sukaran alukNa PUANG sia malemo umpasilamban-lamban kota Yehuda ma’pangada’ lako to buda.
10Sia katirambanan dio mai PUANG urrampoi mintu’ kadatuan lan lu mintu’ tondok untikui Yehuda, naurunganni iatu tau iato mai tae’ nasirari Yosafat.
11Sangborong tu to Filistin umpennoloan pamengan lako Yosafat sia salaka diposima; ia duka tu to Arab umbanni domba sia bembe’, iamotu domba laki pitungsa’bu mpituratu’ sia bembe’ laki pitungsa’bu mpituratu’.
12Samasai-sainna satarompo’-rompo’na tu Yosafat, nabangunmi lan Yehuda tu ba’tu pira-pira benteng sia kota pa’palumpunan.
13Budami panganna naampui lan lu mintu’ kota Yehuda, nalan Yerusalem tu surodadu, pa’barani lalongna.
14Inde sia tu bilanganna tau iato mai unturu’ rapunna; iatu to Yehuda den tu kamandangna to sangsa’bu, iamotu kamandang Adna sola talluratu’ sa’bu pa’barani lalong;
15nadampi’i kamandang Yohanan sola duaratu’ ngkaruapulona sa’bunna tau;
16nadampi’oi Amasia, anakna Zikhri, tu masorok penaanna ussorong kalena lako PUANG, sola duaratu’ sa’bu pa’barani lalong.
17Dio mai Benyamin misa’ pa’barani lalong iamotu Elyada sola duaratu’ sa’bu tau ma’pana sia ma’balulang;
18sidampi’nato iamoto Yozabad sola saratu’ karuapulona sa’bunna tau, ma’passakka’ parari.
19Mintu’nate ma’kamaya lako datu, senga’pi tu mintu’ to napalan datu kota ditambakuku lan mintu’ Yehuda.