Dual PanelDiona mintu’ apa diparandan la umbangun Banua Kabusungan
1Mesuami Salomo la umbangunanni misa’ Banua Kabusungan tu sanganNa PUANG sia umpabendanan kalena misa’ tongkonan layuk kadatuan.
2Napamanassami Salomo tu bilanganna to mamulle pitungpulo sa’bu, na to ma’pa’ batunna dao lu padang ma’buntunna karua pulona sa’bunna na tallungsa’bu nnannanratu’ tau ungkapalai tau iato mai.
3Nasuami Salomo tu pesua lao umpennoloi Huram, datu Tirus, kumua: (Melo ke sikaeloki), susi kasikaeloammi Daud, ambe’ku, mipa’peanni kayu arasi’, anna pabendan banuanna, tu ma’din nanii torro.
4Manassa, inang la kupabendanan misa’ banua tu sanganNa PUANG, Kapenombangku, la umpamaindananNi, la dinii umpennoloanni dio oloNa tu dupa busarungngu’, roti dipennoloan tang la ka’tu sia pemala’ ditunu pu’pu’, kemelambi’ sia kekaroen, lan allo katorroan, bunga’ sombona bulan, sia allo kapuanNa PUANG Kapenombangki. Iamote tu misa’ atoran dipapassanan to Israel tontong sae lakona.
5Iatu banua, tu la kupabendan, la kapua, belanna iatu Kapenombangki pasareongan na iatu mintu’ deata.
6Mindara tu la ma’din umpabendananNi misa’ banua, belanna iatu langi’ moi iatu langi’ ma’iringanna dao, tae’ nakullei ulluangI. Minda todara’ te, angku la ma’din umpabendananNi misa’ banua, ke tae’i nala diniiri untunu pemala’ dio oloNa?
7Totemo la misuanna’ misa’ tau, tu manarang manggaraga bulaan, salaka, tambaga, bassi, bannang lango-lango makaseda, karamisi na lango-lango, sia manarang unggaragai passura’ sisola mintu’ pande, tu dio kaleku lan Yehuda sia Yerusalem, tu naparandananni Daud, ambe’ku, tu pa’diaman iato.
8Sia la mipa’peanna’ kayu arasi’ sia sendana sia algummin dio mai Libanon, belanna kuissan kumua iatu mintu’ taummi manarang ullelleng kayu dao Libanon. Manassa iatu mintu’ taungku la untundui taummi,
9la umparandananna’ pa’kayuan buda, belanna iatu banua la kubangun, la kapua sia memangngan.
10Tonganna iatu la sonda sara’na to manglelleng, tu ullelleng kayu, la kuben la napokande taummi, iamotu gandung duangpulo sa’bu koro’, dalle sisikan duangpulo sa’bu koro’, uai anggoro’ duangpulo sa’bu ba’, na minna’ duangpulo sa’bu ba’.
11Nabalimi Huram, datu Tirus, lan misa’ sura’ napa’pean Salomo, nakua: Belanna Nakamasei PUANG tu taunNa, iamoto Naangka’komi datu umparentai tu tau iato mai.
12Sia nakuapa tu Huram: Mintu’na kadipudian lu lako PUANG, Kapenombanna to Israel, tu mangka umpadadi langi’ sola lino, tu mangka ungkamasean datu Daud misa’ pia muane kinaa, tu diben kamanarangan sia kamatarrusan, tu la umpabendanan PUANG misa’ banua kabusungan sia nabangun tu misa’ tongkonan layukna.
13Totemo kusuamo lako kalemi tu misa’ to manarang, tu diben kamatarrusan, iamotu Huram-Abi,
14anakna misa’ baine dio mai bati’na baine Dan; iatu ambe’na misa’ to Tirus; iamo misa’ to manarang manggaraga bulaan, salaka, tambaga, bassi, batu, kayu, bannang lango-lango makaseda, lango-lango, lenang melo, na karamisi, manarang unggaragai ma’rupa-rupa passura’, sia manarang unggaragai pandirinna ma’rupa-rupa panggaraga tu dipokadanni sisola mintu’ to pandemi sia to pandena puangku Daud, ambe’mi.
15Iatu mintu’ gandung sola dalle sisikan, minna’ sia uai anggoro’, tu mangka napokada puangku, la napa’peammo taunna.
16La ullellengmokan kayu dao Libanon pada tu miparalluinna, angki rakisangkomi diong tasik lako Yafo; ammi baai langngan Yerusalem.
17Nabilangmi Salomo tu mintu’ to mentiruran lan tondok Israel, tonna mangka tu Daud, ambe’na, unnia’i; anna ditandai tu bilanganna saratu’ limangpulo ntallu sa’bunna nnannanratu’ tau.
18Anna tau iato mai napopamulle pitungpulo sa’bu na karuapulona sa’bu la ma’pa’ batu dao buntu na tallungsa’bu nnannanratu’ la ungkapalai tau iato mai la untiroi tu pengkaranganna.