Alkitab Mobile SABDA
[VER] : [TORAJA]     [PL]  [PB] 
 <<  2 Tawarikh 33 >> 

Kadatuanna Manasye

1Iatu Manasye sangpulo duamo taunna tonna dadi datu, anna ma’parenta dio Yerusalem limangpulo llima taunna.

2Napogau’mi tu apa kadake dio pentiroNa PUANG, susitu penggauran megallianna mintu’ bangsa tu Naula’i PUANG dio mai tingayona to Israel.

3Napabendan sule tu inan madao dinii memala’, tu mangka narondonni Hizkia, ambe’na, sia nabangunan inan pemalaran tu mintu’ Baal, sia nagaragai tu lentong dipodeata, sia tukku menomba dio tingayona mintu’ ma’dandan maritik dao langi’ sia mengkaola lako.

4Nabangun duka tu ba’tu pira-pira inan pemalaran dio banuanNa PUANG, tu diona a’ganna mangkamo Napokada PUANG, Nakua: Lan Yerusalem la nanii tu sangangKu sae lakona.

5Sia napabendanan ba’tu pira-pira inan pemalaran tu mintu ma’dandan maritik lan to da’dua tarampak banuanNa PUANG.

6Ondong pissanpi api napamaindananni tu mai anakna muane diong lombok Ben-Hinom, sia umpalalo ma’biangi sia kapakita-kitan sia balik mata, sia napaden tu to sola bombo sia to sola deata. Sia buda napogau’ tu apa kadake dio pentiroNa PUANG, tu umpa’dikki penaanNa.

7Napabendan duka tu misa’ rapang-rapang batu dipodeata, tu mangka nagaragai, lan banuanNa Puang Matua, tu mangka Napokada Puang Matua a’ganna lako Daud sia lako Salomo, anakna muane, Nakua: Lan te banua indete Yerusalem, tu Kupilei langsa’ dio mai mintu’ suku to Israel, la Kunii umpaunnisung sangangKu tontong sae lakona.

8Tae’mo Kula umpatengkai tu lette’na to Israel lan mai tondok mangka Kupamanassan nene’ to dolomi napomana’, podo ke nakaritutui tu mintu’ apa Kupasananni, iamotu mintu’ sukaran aluk sia apa dipondok sia mintu’ atoran, tu mangka naparampo Musa lako kalena.

9Napapusa Manasye tu to Yehuda sia iatu to lan Yerusalem, naurunganni umpogau’i tu apa mandu kadake na penggauranna mintu’ bangsa, tu Nasabu’i PUANG dio tingayona to Israel.

10Ma’kadamo tu PUANG lako Manasye sia lako taunna, apa tae’ naperangii.

11Iamoto Napasaei PUANG tu mintu’ kamandang surodadunna datu Asyur lako tau iato mai, natingkanni pekadang tu Manasye sia napungo da’dua rante tambaga anna baai lako Babel.

12Apa iatonna lan kapussakan, undaka’mi kamaturu-turuanNa PUANG, Kapenombanna, sia umpamadiongan tongan kalena dio oloNa Kapenombanna nene’ to dolona;

13anna massambayang lako Puang. Attu iato Natanannimi talinga Puang tu passambayangna sia Naperangii tu pengkamoyana, anNa pasulei lako Yerusalem sia tama kadatuanna. Naakumo Manasye, kumua PUANG tu Kapenomban.

14Undinnato nabangunammi misa’ benteng tembo’ salian tu kotana Daud, dio rampe matampu’na Gihon, diong lombok, ma’palulako Babangan-Bale, sia napareangi tu Ofel, anna pamalangka’ tonganni. Sia napaden duka tu kamandang surodadu lan mintu’ kota ditambakuku lan Yehuda.

15Naalaimi tu mintu’ rapang-rapang napodeata bangsa senga’ sia rapang-rapang batu dipodeata lan mai banuanNa PUANG, susi duka tu mintu’ inan pemalaran, tu napabendan dao buntu, nanii banuanNa PUANG sia dio Yerusalem, anna tibei lako salian kota.

16Napabendanmi sule tu inan pemalaranNa PUANG, sia dao inan iato nanii umpemalaranni tu ba’tu pira-pira pemala’ kasalamaran sia pemala’ pa’pudian, sia nasua tu to Yehuda la umpengkaolai PUANG, Kapenombanna to Israel.

17Apa iatu to buda tontong siapa memala’ dao inan madao, apa lako mannamo PUANG, Kapenombanna.

18Iatu tang dipokadannapa tu mintu’ tuna’na Manasye, sia passambayangna lako Kapenombanna sia iatu mintu’ kada napokada to patanda-tandan lako kalena tete dio sanganNa PUANG, Kapenombanna to Israel, manassa iate mintu’na te tisura’mo lan sura’ tuna’na mintu’ datu Israel.

19Na iatu passambayangna sia umba Nakua Puang untananni talinga tu passambayangna, sia mintu’ kasalan sia katangmarurusanna, sia iatu mintu’ inan, to nanii umbangun inan madao sia umpabendan lentong dipodeata sia iatu mai rapang-rapang dipodeata, tonna tae’pa napamadiongan kalena, manassa iate mintu’na te tisura’mo lan sura’ Kada to patandan-tandan.

20Iatu Manasye malemo tama batu dilobang sola nene’ to dolona, anna lamunni tau dio to’ tongkonan layukna, anna Amon, anakna muane, ussondai dadi datu.

Kadatuanna Amon

21Iatu Amon duangpulomo ndua taunna, tonna dadi datu, anna ma’parenta dio Yerusalem duang taun.

22Napogau’mi tu apa kadake dio pentiroNa PUANG, susitu napogau’ Manasye, ambe’na, belanna iatu Amon umpemala’i rapang-rapang dipodeata, panggaraganna Manasye, ambe’na, sia napenombai.

23Apa tang umpamadiongan kalena dio oloNa PUANG, susi Manasye, ambe’na umpamadiongammo kalena, sangadinna sanarangngan-rangnganninnaora Amon tu salana.

24Sipakulu-kulumi tu to mase’ponna unneai, anna patei tu datu lan tongkonan layukna.

25Apa napatei pa’tondokan tu mintu’ to sipakulu-kulu unnea datu Amon. Anna angka’i pa’tondokan tu Yosia, anakna muane, ussondai dadi datu.


  Share Facebook  |  Share Twitter

 <<  2 Tawarikh 33 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel