Dual Panel1Inde sia tu kadanNa PUANG Nakua: Belanna tallu tu kapatodo-tintinganna Moab, ondongpi belanna a’pa’, iamoto natae’ Kula undampai to. Belanna natunumo tu bukunna datu Edom napadadi kapu’,
2iamoto angKu la umpasae api tama Moab, naurungan unnimbakanni tu bentengna Keriot; sia la mate tu Moab lan rukka kasirarian naturu’ arrak kasirarian sia oni tarompe’,
3sia la Kusabu’i tu to ma’parentana lan mai sia la Kupatei tu mintu’ arungna sola to ma’parentana, – kadanNa PUANG.
4Inde sia tu kadanNa PUANG Nakua: Belanna tallu tu kapatodo-tintinganna Yehuda, ondongpi belanna a’pa’, iamoto natae’ Kula umpasalai ukungan. Belanna natumpu tu Sukaran alukNa PUANG sia tae’ nakaritutui tu mintu’ apa Napondok Puang, sangadinna napapusamo deata mo’rangna tu naturu’mo nene’ to dolona,
5iamoto angKu la umpasae api lan Yehuda, naurungan unnimbakanni tu bentengna Yerusalem.
6Inde sia tu kadanNa PUANG, Nakua: Belanna tallu tu kapatodo-tintinganna Israel, ondongpi belanna a’pa’, iamoto natae’ Kula undampai umparampoi ukungan. Belanna ungkamorai doi’ anna balukanni tu to malambu’ sia nabalukan tu to bongko sangpasang sepatu.
7Nakaduangi ke nasamboi barra’-barra’ tu ulunna to bongko sia ulleko’ lalanna to tang pa’bela; sia misa’ tu pia muane sola ambe’na male ma’gau’ sala lako misa’ baine mangura, la umpamatuna sanga madatungKu.
8Umbambangan kalena mamma’ diong pakean ditoe dio to’ la’pekna mintu’ inan pemalaran sia unniru’ uai anggoro’na to didosa lan banuanna kapenombanna.
9Moi mangkamo Kusabu’i tu to Amori dio tingayona, moi anna pada lando kayu arasi’ sia pada buku kayu jati, ondongpi Kusabu’i tu buanna dao mai sia uaka’na diong mai.
10Sia mangkamokomi Kusolan lan mai tondok Mesir sia Kuanta’komi lan padang pangallaran patangpulo taunna, kumua ammi pomana’i tu tondok to Amori.
11Na iatu anakmi muane Kupadadimo nabi, na iatu to mangurammi Kupadadimo nasiri. Tang susiraka to, e to Israel? KadanNa PUANG.
12Apa mipairu’mo uai anggoro’ tu mai nasiri sia mipokadan tu mai nabi, kumua da mima’nubua’.
13Manassa la Kupasikanetekan diong to’ lentekmi susito kareta sikanetekan len, ke ponnoi dao tu pa’kutu’ gandung.
14Attu iato iatu mai to malinta’ tang nabelamo umpallaian kalena, iatu to mawatang tang nakullemo umpalalo kamabukuanna sia tu to lalong tae’mo nakullei ullendokan sunga’na.
15Ia duka tu mai to ma’pana tang naattamo bendan sia to matipa lumingka tae’mo nalussu’ sia pakkanarang tae’mo nalendokan sunga’na.
16Ondongpi moi to barani tongan dio lu mintu’ to lalong la mallai tang ma’tamangkale attu iato, kadanNa PUANG.