Dual PanelPatiro mendeata bunga’na, iamotu batik
1Susite tu apa Napatiroanna’ Puangta PUANG, iamotu umpadadi batik, tonna randuk tuo tu riu tuo undi. Manassa iamoto tu riu tuo undi, tonna mangka disasaran datu tu riu tuo dolo.
2Iatonna sidi’mora anna imbakan nasangi tu apa tuo diong mai padang, ma’kadamo’ kukua: O Puangta PUANG, pagarri’mi! Umbara nakua tu Yakub ungkullei torro bendan, belanna bitti’?
3Napenassannimi PUANG tu iannato. Tae’ anna la dadi tu iannato, kadanNa PUANG.
Patiro mendeata ma’penduanna, iamotu api ma’kande
4Susite tu apa Napatiroanna’ Puangta PUANG: Manassa untambai api la umpalalo ukungan. Api iato napamarangke tu uai kapua sia la nakande duka tu pa’pa’lakan.
5Apa ma’kadamo’ kukua: O Puangta PUANG, paradanmi! Umbara nakua tu Yakub ungkullei torro bendan, belanna bitti’?
6Napenassannimi PUANG tu iannato. Tae’ duka anna la dadi tu iannato, kadanNa Puangta PUANG.
Patiro mendeata ma’pentallunna, iamotu batu petimbang
7Susite tu apa Napatiroanna’ Puang, iamotu bendan tu Puang dio to’ rinding tembo’ malolo, sitangke batu petimbang.
8Attu iato ma’kadami tu PUANG lako kaleku Nakua: Apara mutiro, e Amos? Ma’kadamo’ kukua: Misa’ batu petimbang. Ma’kadami tu Puang Nakua: La Kupalako taungKu, to Israel, tu batu petimbang; tae’mo Kula ullendu’i lenni.
9Sangadinna iatu inan madaona Ishak la disanggangi sia iatu mai inan maindanna Israel la diro’pok, sia la ke’de’Na’ unnukungi tu bati’na Yerobeam la umparampoi pa’dang.
Amos diula’i male
10Ta’kala mesuami tu Amazia, to minaa dio Betel mennolo lako Yerobeam, datu Israel, nakua: Iatu Amos umpaden misa’ kasipakulu-kuluan la unneakomi dio lu mintu’ to Israel; tae’mo nabelai tondok la umpassanni tu mintu’ kadanna.
11Belanna susite tu kadanna Amos nakua: Iatu Yerobeam la mate nakande pa’dang sia iatu to Israel manassa la male dipali’ lan mai tondos-
12Undinnato ma’kadami tu Amazia lako Amos nakua: E to patanda-tandan! mallaiko madoi’ lako tondok Yehuda; inde to dio la munii ungkande roti sia ma’nubua’.
13Apa dio Betel da’mo muma’nubua’, belanna iate inan iate inan maindanna kadatuan sia inan kemenombanna tondok.
14Mebalimi tu Amos lako Amazia nakua: Tangiana’ nabi sia tangiana’ anak nabi sangadinna misa’na’ to manglaa sia to ungkaduttu’ bua ara pangala’.
15Apa Naalamo’ PUANG dio mai boko’ domba, sia ma’kada tu PUANG lako kaleku, Nakua: Maleko ammu ma’nubua’ diona ukungan diparampo lako taungKu Israel.
16Iamoto, perangii tu kadanNa PUANG. Ma’kadako mukua: Da muma’nubua’ diona ukungan diparampo lako Israel sia da mupalolong kada diona ukunganna bati’na Ishak.
17Iamoto inde sia tu kadanNa PUANG Nakua: Iatu bainemu la pasandak salu lako rampanan kapa’ lan lu kota, iatu anakmu muane sia anakmu baine la songka nakande pa’dang, sia iatu pa’lakmu la ditaa-taa ulang pesuka’, na iko kalena la mate dio to’ padang tang masero, sia iatu to Israel manassa la male dipali’ lan mai tondokna.