Dual PanelPa’pangada’ diona gau’ unturu’ kakinaan
1Inde sia tu Sarambu peada’na Salomo. Iatu misa’ pia kinaa umpaparannu penaanna ambe’na, apa iatu pia baga umpamasussa penaanna indo’na.
2Iatu ianan bu’tu tete dio katangmekaalukan tae’ gai’na, apa iatu kamaloloan melendokan dio mai kamatean.
3Tae’ Naeloranni PUANG kumua iatu to malambu’ la tangdia’, apa iatu kamaduanganna to tang mekaaluk Nasuale pala’ PUANG.
4Iatu limanna to matukkun mengkarang ma’pakalala’, apa iatu limanna to birisan mengkarang ma’pasugi’.
5Minda-minda mangrampun bura padang, ke pealloanni iamo pia unnampui tangnga’ kinaa, apa iatu to mamma’ ke pegandunganni, iamo pia ma’gau’ matuna.
6Iatu to malambu’ undudung upa’na, apa iatu pudukna to tang mekaaluk nasitutu’i kamasa’garan.
7Dinanna batu silambi’ tu to malambu’ la napomaupa’ tau, apa iatu sanganna to tang mekaaluk la bubosi.
8Minda-minda tu ma’penaa kinaa la untarima pepasan, apa minda-minda tu ma’kada baga, la sanggang.
9Minda-minda tu bulo lollong lumingka, iamo lumingka masampa’, apa minda-minda umpasepang senga’ lalanna, la kaissanan.
10Minda-minda tu ma’kidi’-kidi’ mata, la umpabu’tu kamasussan, sia minda-minda tu ma’kada baga, la sanggang.
11Iatu puduk to malambu’, iamo mata uai umpabu’tu katuoan, apa iatu pudukna to tang mekaaluk nasitutu’i kamasa’garan.
12Iatu kamabirisan umpabu’tu kasigagan, apa iatu pa’kaboro’ ussamboi mintu’ kasalan.
13Dio pudukna to unnampui tangnga’ kinaa diappa’ tu kakinaan, apa dio boko’na to tang unnampui tangnga’ melo sipatu narampoi pebamba ue.
14Iatu to kinaa unnanna penaa kapaissanan, apa iatu pudukna to baga nareke’ bang kasanggangan.
15Iatu iananna to sugi’ napokota ditambakuku, na iatu kakalalaranna to bongko napomandasa.
16Iatu pandakaranna to malambu’ napotuo; apa iatu pa’pabu’tunna to tang mekaaluk napokasalan.
17Minda-minda tu umpalan penaai tu pa’pakilala iamo napolalan tau lako katuoan, apa minda-minda tang undampang peta’tan iamo umpapusa tau.
18Minda-minda tu umbuni kamabirisan, iamoto ma’puduk mo’rang, sia minda-minda tu ma’palele beko, iamo misa’ to baga.
19Lan kabudanna kada dipokada tae’ natang den tu sala, apa minda-minda unta’tan lilana, iamo misa’ to unnampui tangnga’ melo.
20Iatu lilana to malambu’, susito salaka massang, apa iatu penaanna to tang mekaaluk sidi’ri angga’na.
21Iatu pudukna to malambu’ umpamakarimman buda tau, apa iatu to baga umpomate kataeranna tangnga’ kinaanna.
22Iatu kamasakkean dio mai PUANG mepasugi’, tang narangnganni kaparrukan mengkarang.
23Iatu ma’gau’ mesirisan susi bang paningoan lako to baga, susi dukato tu to unnampui tangnga’ kinaa umpalolang kakinaan.
24Iatu apa nakataku’ to tang mekaaluk, iamo la urrampoi, apa Puang umpa’kamasean apa nakabarii to malambu’.
25Iake saei tu talimpuru’ nalendu’ ma’kasanggang, la pa’de tu to tang me-kaaluk, apa iatu to malambu’ bendan butung misa’ parandangan maton-tongan.
26Susi sukka urrua isi sia susi rambu urrambu mata, susi dukamoto tu to tukkunan lako to ussuai.
27Kamatakuran lako PUANG umpamalambe’ sunga’, apa iatu taun katuoanna to tang mekaaluk la dipakondi’.
28Iatu pa’rannuanna to malambu’ la umpabu’tu kasendean, apa iatu sissareanna to tang mekaaluk la putta.
29Iatu lalanna PUANG napopentirerungan to bulo lollong, apa dadi kasanggangan lako mintu’ tau umpogau’ kadake.
30Iatu to malambu’ tae’ nala tibendon len sae lakona, apa iatu to tang mekaaluk tae’ nala untorroi kuli’na padang.
31Iatu pudukna to malambu’ umpabu’tu kakinaan, apa iatu lila ma’kada bulang leko’ la disanggang.
32Iatu pudukna to malambu’ untandai tu apa dipopaiman, apa iatu pudukna to tang mekaaluk ussa’bu’ manna kada bulang leko’.