Dual Panel1Iatu timbangan sala Napomagalli PUANG, apa iatu batu timbangan tongan Naposende.
2Iake saei tu kamatampoan, la sae duka tu siri’, apa iatu to umpamadiong penaanna narondong kakinaan.
3Iatu kamalamburanna to bulo lollong iamo unnanta’ meloi, apa iatu penaa leko’na to tang maruru’ la naposanggang.
4Iatu kasugiran tae’ gai’na, ke attu kasengkeanNa Puang, apa iatu kamaloloan melendokan dio mai kamatean.
5Iatu kamalamburanna to sallo’ umpamarante lalanna, apa iatu to tang mekaaluk tobang natumang katangmekaalukanna.
6Iatu kamaloloanna to bulo lollong iamo la ullendokanni tu tau iato mai, apa iatu to tang maruru’ natingkan kamailuanna kalena.
7Iake matemi tu to tang mekaaluk puttamo to tu pa’rannuananna sia iatu apa naanga’ to kadake la pa’de.
8Iatu to malambu’ la dirampanan lan mai kapussakan, na iatu to tang mekaaluk tama ussondai.
9Tete dio pudukna to bulituk anna sanggangi padanna ma’rupa tau, apa tete dio kapaissanan anna lendokan kalena tu to malambu’.
10Mintu’ pa’tondokan umpoparannui tu kamauparanna to malambu’, apa iake sanggangi tu to tang mekaaluk, unnarrak-arrak tu mintu’ tau.
11Bannang dio kadipamasakkeanna to bulo lollong anna dipamarua’ tu kota, apa buntu tumangna pudukna to tang mekaaluk, anna disanggang tu kota.
12Minda-minda ullo’bo padanna ma’rupa tau, tae’ naampui tangnga’ kinaa; apa iatu to unnampui tangnga’ kinaa ma’pakappa.
13Minda-minda tu ma’palele kadake, iamoto manglo’do’ rasia, apa minda-minda tu maruru’, iamo ussamboi tu apa mangka dadi.
14Iake tae’i pa’timbangan melo, la sanggang tu bangsa, apa dipotilendok tu kabudanna pa’bisara.
15Minda-minda tu unnindo’i indanna to tama sae, manassa la narampoi kamasussan, apa minda-minda tu untoyangan kalena dio mai massala’pa la torro manaman.
16Misa’ baine mabalele unnappa’ kadipangkeran, susi duka tu to lalong unnappa’ kasugiran.
17Iatu to masokan umpogau’ kameloan deatanna, apa iatu to toro, umpandasa kalena.
18Iatu to tang mekaaluk ungkabu’tu’i saro tang ma’pamaupa’, apa iatu to unnambo’ kamaloloan, ungkabu’tui saro matontongan.
19Iatu kamaloloan tongan umpatu katuoan, apa minda-minda tu untuntun bang kakadakean, umpadenan kalena kamatean.
20Iatu to leko’ penaanna Nakagalli PUANG, apa iatu to malolo gau’na iamo Naposende.
21Tonganna, iatu to kadake gau’ tae’ natilendok len dio mai ukungan, apa iatu to naala bilanganna to malambu’ la tilendok.
22Susitu sissin bulaan dio kasube bai, susi dukato tu baine ballo tu tang unnampui tangnga’ melo.
23Iatu apa naanga’ to malambu’, kamauparan manna napaden; apa iatu apa narannuan to tang mekaaluk kasengkean manna napaden.
24Den tu tau mangambo’, nabuda pole’ nakabu’tui; den tu tau ungkanengkengi tongan iananna, apa kapu’duran duka sia.
25Iatu penaanna to ma’pamasakke la dipaliu manaman, sia minda-minda mamase, la dikamasei duka.
26Minda umpatadang gandung, la natampakki ropu to buda; apa iatu rongko’ songlo’ dao ulunna to ma’baluk gandung.
27Minda-minda tu untuntun melona, undaka’ kapaimanan; apa minda-minda unnanga’ bang kadakena, la narampoi duka kakadakean.
28Minda-minda tu umposande’ kasugiranna, la tobang; apa iatu mintu’ to malambu’ la mentaruk susi daun mangura.
29Minda-minda tu umpopa’elo’na bang banuanna, la umpomana’ angin; sia iatu to baga la dadi kaunan lako to kinaa.
30Iatu buanna to malambu’ iamo sangto’ kayu katuoan sia minda-minda tu kinaa, ungkadamak tau.
31Tonganna, iatu to malambu’ la dipakkan dao kuli’na padang, ondong pole tu to tang mekaaluk sia to kadake gau’na.