Dual Panel1Minda-minda tu ungkamali’ peada’, iamo ungkamali’ kapaissanan; apa minda-minda tu ungkabiri’ peta’tan, iamo tobaga.
2Iatu to melo penaanna Naposende PUANG, apa iatu to ma’tangnga’ kadake bang, Nara’ta’ la diukung.
3Tae’ tu bantang, ke tang mekaalukki, apa iatu uaka’na to malambu’ tang tibendon.
4Misa’ baine ma’inaa tongan, iamo napomakota muanena, apa iatu baine umpabu’tu siri’ susito saki lan lu buku lampana.
5Iatu pa’timbanganna to malambu’ iamo tongan, apa iatu pa’tangnga’na to tang mekaaluk iamo pa’pakena.
6Iatu kadanna to tang mekaaluk mangodo’-odo’ bang undaka’ lalan la umpatibollo rarana tau, apa iatu lilana to bulo lollong umpamakarimman kalena.
7Iatu to tang mekaaluk disongkammo anna rabun, apa iatu banuanna to malambu’ la bantang ia.
8Iatu tau dipangke’ sitinaya tangnga’ kinaanna, apa iatu to leko’ penaanna la dipamatuna.
9Melo ke iatu tau disanga to tang mala’bi’ apa den tu to ma’parakana, na iake ma’gau’ to la’bi’ anna moi kandena tang silambi’.
10Iatu to malambu’ umpalan penaa katuoan patuoanna, apa iatu kamamaseanna to tang mekaaluk makarra’ tongan.
11Minda-minda tu umbuak padang, iamo la dipedia’i; apa minda-minda unnula’ apa tae’ gai’na, iamoto tang unnampui tangnga’ melo.
12Iatu to tang mekaaluk morai bang umpoya apa kadake, apa iatu uaka’na to malambu’ mentaruk.
13Iatu puduk ma’kada sala nanii pepoya kadake, apa iatu to malambu’ tilendok lan mai kapussakan.
14Diona buangan kadanna tau, anna dipedia’i kameloan, sia iatu saro ra’ta’na sule lako kalena.
15Iatu lalanna to baga tongan ia dio pentirona, apa iatu to umperangii pa’pakilala, iamoto kinaa.
16Iatu to baga ta’pa napokada bang tu napomapa’di’na penaanna, apa iatu to manarang ussamboi siri’.
17Minda-minda tu ma’kada tongan, umpasombo malolona, apa misa’ to sa’bi tang tongan umpasombo pa’pakena.
18Iatu tau ma’kada punala bang, patossok susi tobok, tu kadanna, apa iatu pudukna to kinaa umpaden kamatanan.
19Iatu puduk ma’kada tongan la tontong sae lakona, apa iatu lila pa’pakena melo sakkattu’ bangri.
20Iatu to untampa bang kadake, pa’pakena lan penaanna, apa iatu to ma’pakilala diona kamarampasan unnampui kaparannuan.
21Tae’ narampoi kamandasan tu to malambu’, apa iatu to tang mekaaluk kamatilakan manna urruai.
22Iatu puduk umpokada bang mo’rang Nakagalli PUANG, apa iatu to umpogau’ bang kamarurusan iamo Napopaiman.
23Iatu to manarang ullamun bang kapaissananna, apa iatu to baga untaleran bang kada baganna.
24Iatu limanna to matutu la ma’parenta, apa iatu kamatukkunan naposandang tau.
25Iatu kamarittukan unno’ton penaanna tau, apa iatu kada melo umpaparannu penaanna.
26Iatu to malambu’ natandai tu to ungkadakeanni penaa, apa iatu to tang mekaaluk napapusa pasiruanna.
27Iatu to tukkunan tae’ naalai tu pangula’na, apa iatu to birisan la umpotaa ianan mala’bi’.
28Dio lu lalan kamaloloan dinii ungkabu’tui katuoan, apa iatu lalan kasalan mebaa lako kamatean.