Dual Panel1Iatu mai kakinaanna baine umbangun banuanna, apa tete dio kabaganna, nalimanna kalena urrondonni.
2Minda-minda ma’kedo bulo lollong, ungkataku’ PUANG, apa minda-minda tu unnola lalan kelok tang umpakala’bi’ Puang.
3Lan sadangna tobaga den pebamba la unnukungi tu – kamatampoanna, apa iatu to kinaa pudukna ia ungkaritutui.
4Iake tae’i tu sapi, lo’bang tu inan kandena, apa iatu kamatotoranna sapi dipa’tengkoan, umpabuda bura padang.
5Iake sa’bi tongan tae’ nakamorang-morang, apa minda-minda umpenaan buttok, iamo misa’ sa’bi tang tongan.
6Iatu to patelle-telle undaka’ kakinaan, apa tae’ nakabu’tui, apa iatu to unnampui tangnga’ kinaa, tang masussa unnappa’ kapaissanan.
7Toyanganko kalemu dio mai to baga belanna tae’ mukabu’tui dio tu kada kinaa.
8Iatu kakinaanna to manarang, iamotu untandai kalena lalanna, apa iatu kabaganna to tang paissan pa’pakena manna pa’rampoananna.
9Iatu pengkalossoran untelle-telle to baga, apa dio lu to bulo lollong naala penaanNa Puang Matua.
10Penaanna kalena tu tau untandai karossoanna, sia iatu kaparannuanna tae’ nabelai to senga’ umperasai sola.
11Iatu banuanna to tang mekaaluk la disanggangi, apa iatu tenda to bulo lollong la menta’bi membunga.
12Den tu lalan malolo nasanga tau, apa katampakanna mebaa lako kamatean.
13Moi anta metaa ma’din duka tasa’ding tu karossoan penaa, sia dio katampakanna kaparannuan ma’din bu’tu kamasussan.
14Iatu to pabali-bali umpodia’ lalan penaanna, apa iatu to melo penaanna umpodia’ apa dio kalena.
15Iatu to tang paissan umpatongan mintu’ kada, apa iatu to manarang ungkanandai tengkana.
16Iatu to kinaa mataku’ sia toyang dio mai kakadakean, apa iatu to baga untengkai bang salunna, apa napomanaman duka.
17Minda-minda tu madoi’ bang sengke, iamo umpogau’ kabagan, sia iatu umparinaa bang kakelokan la dikabiri’.
18Iatu to tang paissan umpotaa kabagan, apa iatu kapaissanan napomakota to manarang.
19Iatu tokadake la tukku menomba dio olona tomelo penaa, sia iatu to tang mekaaluk la tukku dio to’ babanganna to malambu’.
20Iatu tobongko moi padanna rupa tau ungkagi’gi’ dukai, apa iatu tosugi’ buda ia sangmanena.
21Minda-minda tu ullo’bo padanna rupa tau, iamo umpogau’ kasalan; apa minda-minda ungkamasei to makario-rio, la maupa’.
22Tang la pusaraka tu to umpogau’ bang kadake? Apa sikambi’ ia pa’kaboro’ sia kamarurusan tu to umpogau’ kameloan.
23Mintu’ kamara’takan la nanii bu’tu kamauparan, apa iatu gau’na to ma’kada punala bang mebaa lako kabongkoan.
24Iatu makotana tokinaa napokasugiran; iatu kabaganna tobaga tontong napobaga.
25Iatu tosa’bi tongan iamo ungkarimmanni tau, apa minda-minda umpenaan buttok, iamo naponnoi pa’pakena.
26Kamatakuran lako PUANG iamo garonto’na karapasan sia kabattaran penaa, namoi anakna den duka pentilindunganna.
27Kamatakuran lako PUANG iamo misa’ kalimbuang katuoan marendeng, la tilendok dio mai poyana kamatean.
28Kamapuluranna pa’tondokan iamo kamala’biranna datu, apa kamadaranganna taunna iamo kasangganganna to paa.
29Iatu to kalando pesuka’ maluangan tu tangnga’ kinaanna, apa iatu to madomi’ narampoi palla penaa iamo umpasipapa’ kabagan.
30Iatu penaa ma’tan napomanaman kaleta, apa iatu kapangimburuan napomasaki buku lampata.
31Minda-minda tu umpakario-rio to bongko, iamo umpamatuna Totumampana apa minda-minda ungkamasei tu to mase-mase, iamo umpakala’bi’ Puang.
32Iatu to tang mekaaluk disongkan lan kamandasanna, apa iatu to malambu’ moi nala ka’tu sunga’na den duka pentilindunganna.
33Lan penaanna to unnampui tangnga’ kinaa nanii torro kakinaan, moi dio lu to baga natandai duka tu iannato.
34Iatu kamaloloan napomala’bi’ misa’ bangsa, apa iatu kasalan napotattan to sangpetayanan.
35Iatu kamasokananna datu lu lako to diala parea tu unnampui tangnga’ kinaa, apa iatu kare’dekanna ara’na lu lako to ma’pakasiri’.