Dual Panel1Minda-minda untoyangan kalena iamo unturu’ lalan pa’poraianna, sia karede-redean, unnea mintu’ pa’tangngaran melo.
2Iatu to baga tae’ naporai pa’inaan melo, sangadinna naporai bang untale’ apa diong penaanna.
3Umba-umba nanii sae tu to tang mekaaluk, inde dukato nanii sae tu kadipamatunan, sia kapassayuan naturu’ siri’.
4Iatu kada sun dio pudukna misa’ tau susito uai mandalan, sia salu’-salu’ tikula’dak-la’dak sia kalimbuang umpabu’tu kakinaan.
5Iake umpalosongangki’ to tang mekaaluk sia ussualeki’ to malambu’, ke ma’paolai saluki’ manassa salaki’.
6Iatu pudukna to baga umpaden kasigagan, sia iatu sadangna umpetamban kadibamban.
7Iatu sadangna to baga iamo umbaai lako kasanggangan, sia iatu pudukna umpoya kalena.
8Iatu kadanna to ma’kada boko’ susito kande marasa, tang tigaruntu lendu’ tama inan penaa.
9Iatu to tukkunan mengkarang, massiulu’mo to pasanggang.
10Iatu sanganNa PUANG sangtinti to menara matoto’; iatu to malambu’ mallai lako natang matumba-tumba dio.
11Iatu iananna to sugi’ napokota matoto’ sia napobenteng tembo’ matande nasanga.
12Iatu kamadaoan penaanna tau undoloan katobangan, apa iatu kamadiongan penaa undoloan kadipangkeran.
13Minda-minda mebali dolo namane ma’perangii napobaga sia naposayuan.
14Iatu kabattaranna tau ussande’i lan kamaparrisanna, apa iatu penaa bonnong mindara la umpakatanai?
15Iatu penaanna to unnampui tangnga’ kinaa, ungkabu’tui kapaissanan, sia iatu talinganna to kinaa undaka’ kapaissanan.
16Iatu pamengan napa’bengan tau umpakalua’ lalanna sia umpopennoloi dio olona to kapua.
17Iake den kasikara-karan ditonganni tu to ma’kada dolo, apa undinna ma’kadaomi tu balinna sia umpebalii tu kadanna.
18Iatu pa’loterei untorei kasigagan sia umpasisarak to paa.
19Iatu siulu’ tang taben katongananna tang tatamamo tu penaanna losong na iatu kota ditambakuku, sia iatu kasigagan susimo salli’ babangan benteng.
20Iatu bua kadanna tau napodia’ tambukna; sia napedia’i bura pudukna.
21Iatu kamatean sia katuoan lan kuasanna lila, minda-minda unturusanni la nakande tu buanna.
22Minda-minda umpobainemo misa’ baine, iamo ungkabu’tui ianan ballo, sia unnappa’ kamaturu-turuan dio mai PUANG.
23Ma’kada mengkamoya-moya tu to bongko, apa iatu to sugi’ mebali to’do’.
24Iatu to buda punala bangri tau naposola naposanggang, apa den duka sipissan na iatu sangmane, maruru’ sia marengke’ tongan, na iatu siulu’.