Dual PanelKakinaan ma’pamakarimman
1E anakku, iammu tarimai tu kadangku sia umpariba’tengi tu pepasanku,
2naurunganni narangi talingammu tu kakinaan sia mupopa’mirringan tu penaammu lako tangnga’ melo,
3ondongpi, iake metambako lako pakita penaa sia meongli’ lako tangnga’ kinaa;
4iake mudaka’i susi salaka sia musisik susi ianan membuni,
5manassa la mutandai tu diona ungkataku’ PUANG sia unnappa’ kapaissanan diona Puang Matua.
6Belanna PUANG Ia tu umpa’kamasean kakinaan, lan mai pudukNa nanii tassu’ tu kapaissanan sia tangnga’ kinaa.
7Ia umparandananni pa’tunduan tu to bulo lollong, sia Ia napobalulang minda-minda tu to lolang tae’ sayuanna.
8Ia ungkampai tu mintu’ lalan katonganan sia urrinding pala’ lalanna to Nakamasei.
9Attu iato la mutandai tu kamaloloan sia tonganna, sia ia duka tu kamalamburan sia mintu’ lalan melo.
10Belanna iatu kakinaan la tama penaammu sia iatu kapaissanan la napomanaman deatammu.
11Pa’timbang melo la ungkaduttu’ko, tangnga’ melo la urrinding pala’ko,
12anna rampanangko dio mai lalan kadake, sia dio mai to ma’kada leko’,
13dio mai tu to untampe lalan malolo, la unturu’ lalan mapittuk;
14tu parannu umpogau’ kadakena, sia unnarrak diona gau’ ma’bulang leko’, tu umpabu’tu kadake,
15tu ma’lekko-lekko lalanna sia unnola lalanna tu umpapusai,
16anna rampanangko dio mai baine to senga’, dio mai baine, tu tang ditandai tu ma’kada massede,
17tu untampemo muanena tonna mangurapa sia tang ungkilalaimo basse Kapenombanna;
18belanna iatu banuanna solo’ rokko kamatean, sia mintu’ lalanna ma’palulako to’bombo tomate.
19Moi misa’ tu mintu’ to male lako, tae’mo sule, sia tae’mo nalambi’ lalan katuoan.
20Ammu turu’ batattana to melo sia ungkaritutui lalanna to malambu’.
21Belanna iatu bulo lollong la untorroi tondok sia iatu to masallo’ la mareso’ lan,
22apa iatu mintu’ to tang mekaaluk la disabu’i lan mai tondok sia iatu mintu’ to tang maruru’ la ditorakki lan mai.