Dual Panel1Da mumassattuan diona tu allo masiang, belanna tae’ mutandai apa tu ma’din napabu’tu allo iato.
2Melo ke to senga’ umpudiko, da napudukmu kalena, sia totama sae, da nakalemu ma’pudi.
3Iatu batu magasa sia iatu karassik mabanda’, apa iatu saki inaa napabu’tu to baga mandu magasa na iatu apa sola duai.
4Masarrang tu kare’dekan ara’na tau sia nakabu’ kasengkeanna, apa iatu kamangimburuanna minda la unnattai?
5Iatu peada’ dipasombo mandu melo na iatu kamamasean dibuni.
6Iake bangkeki’ nabamba sangmaneta, malolo tu penggauran iato, apa iatu pangudungna uali moi mekabu’ tae’ duka natongan.
7Iatu to dia’ nalullu’mo tu tani’ enoan, apa iatu to tangdia’ moi apa mapai’ matanning duka nasa’ding.
8Susito manuk-manuk salamba salao sikambela serangna, susi duka tu to salamba salao sikambela tondokna.
9Iatu minna’ sia pandere’ umpamanaman penaanna tau, susi dukato tu kasisangmanean lantuk diona pa’pakilala malolo.
10Da mutampei tu sangmanemu sia sangmanena ambe’mu, apa da mulese banuanna siulu’mu, ke naruako kamandasan. Mandu melo tu sangbanua mandappi’ na iatu misa’ siulu’ mambela.
11La kinaako, e anakku muane, sia paparannui tu penaangku, angku pebalii tu minda-minda ussayuna’.
12Iatu to manarang, ke natiroi tu kamandasan, male umpentilindungan kalena, apa iatu to tang unnampui tangnga’ melo umpatarru’ bang pa’inaanna anna ruai kamandasan.
13Alami tu bayu lamba’na, belanna iamo unnindo’i indanna to senga’, sia alami ammu potosandangi ussondai tu baine tang ditandai.
14Minda-minda tu mela’bik sae massalama’ lako padanna tolino anna umpekapuai gamaranna, nasanga tau susi bang to sae unggatai tu tau iato.
15Iatu papa rutu’ ke uran kambanni namisa’ baine passigagan pada-pada bang to tu a’ganna.
16Minda-minda morai umparadanni, susito umparadan angin, sia lima kananna susitu la untangke minna’.
17Iatu bassi umpamataran bassi, susi duka tu tau umpamataran to senga’.
18Minda-minda ungkaduttu’ garonto’ ara, la nakande tu buanna, minda-minda ungkaritutui apanna puangna, la dipakaraya.
19Susitu uai nanii ussamminni lindona tau, susi dukato tu penaanna nanii umpeanni a’ganna.
20Iatu lino tomate sia bambana mukkun tae’ bang la mosona, susi dukamo tang mosona tu matanna tau.
21Iatu pa’paredean dinii umpatama salaka sia dapo’ dinii umpatama bulaan, na iatu tau disudi situru’ lelena sanganna.
22Moi anna dilambuk tu to baga sola pare lan issong, inang tae’ nala sisarak tu kabaganna.
23Tiro meloi tu mintu’ bembe’mu sia palan penaai tu dombamu ma’ba-anan.
24Belanna iatu ianan tae’ namarendeng; tontongraka tu makota nasiosso’i tau?
25Iake pu’pu’mi tu riu sia mellolo sule sia dirampunmo tu apa tuo dao buntu,
26attu iato iatu anak domba la umpadenangko pakean sia iatu bembe’ laki la mupangallian misa’ pa’lak,
27sia la silasa tu pangandu’ bembe’ la mukande sia nakande to lan banuammu, sia la napotuo mintu’ ruranammu baine.