Alkitab Mobile SABDA
[VER] : [TORAJA]     [PL]  [PB] 
 <<  Amsal 3 >> 

Iatu Kakinaan umpabu’tu kamauparan

1E anakku, da mutang kilalai tu pa’pangada’ku sia la nakaritutui penaammu tu mintu’ pepasanku,

2belanna iamo la urrangnganni mintu’ allomu sia taun katuoammu, sia umpopemba’ka’i tu karapasan penaammu.

3Da nasalaiko tu pa’kaboro’ sia kamarurusan! Pomanikki lan barokomu tu iannato sia sura’i dio papan penaammu,

4iake susito, la unnappa’ko pa’kamasean sia kadiporaian dio pentirona Puang Matua sia tolino.

5La ponno penaammu urrannuan PUANG sia da musande’ lako pakita penaammu.

6Kasiri’i tu Puang dio lu mintu’ lalanmu, na Ia la umpamarantei tu lalanmu.

7Da musande’ lako kakinaammu, sangadinna kataku’i tu PUANG sia patoyangko kalemu dio mai kakadakean,

8anna popedampii issimmu sia napopaya bukummu.

9Pakarayai tu PUANG mupennoloan kasugirammu, sia mintu’ bunga’ daka’mu,

10iake susito iatu mintu’ alangmu la ponno sae lako tang langnganna sia iatu to’ pa’parrammu la lempan uai anggoro’ ba’ru.

11E anakku, da musayui tu peada’Na PUANG sia da mukasorroi tu ukunganNa.

12Belanna Naukung PUANG minda-minda tu Nakamasei, ondongpi susi misa’ ambe’ lako anak naala penaanNa.

13Maupa’ tu to unnappa’ kakinaan, sia iatu to ullolongan tangnga’ melo;

14belanna iatu sarona mandu melo anna saroan salaka, sia iatu apa napabu’tu mandu melo na bulaan.

15Mandu melo ia na merdan, sia mintu’ tu muporaianna tae’ dipasusianni.

16Dio lima kananna nanii tu kamalamberan sunga’, dio lima kairinna nanii kasugiran sia kamala’biran.

17Iatu batattana iamo batatta manaman, na iatu mintu’ lalanna iamo lalan marampa’.

18Iamo napooto’ katuoan minda-minda tu untoei, sia minda-minda tu ulla’ka’i la dipudi kumua to maupa’.

19Iatu PUANG umparandanganni kakinaan te lino, sia ullangda’i tangnga’ melo tu langi’.

20Diona kapaissananNa anna tipa’dua tu mandalanna tasik sia iatu gaun umpapini-pini ambun.

21E anakku, da natoyang dio mai matammu tu iannato, karitutui tu pa’timbangan sia pa’timbang melo,

22iake susito iatu iannato la napotuo deatammu, sia la napobelo baro-komu.

23Ammu ola marampa’i tu lalanmu sia tae’ nala titodo tu lette’mu.

24Iake matindoko tae’ mula tiramban, sangadinna la matindoko anna mammi’ mamma’mu.

25Da mukataku’i tu katirambanan tang mukapang-kapang, sia kasangganganna to tang mekaaluk, ke saei.

26Belanna PUANG tu la muposande’, sia Iamo la ungkampai tu lette’mu da naalai poya.

27Da mupatadangi tu barang apa to sipatu la unnappa’i ke denni lan kuasammu la umpogau’i tu iannato.

28Da muma’kada lako padammu tolino, kumua: Malemoko musae pole’mora masiangpa kubenko – anna denmo dio kalemu.

29Da mutampanni kadake tu padammu tolino, tu ungkadamak meloko sia ussangako malolo.

30Da musigaga moi misa’ tau ke tae’i bannangna, sia iake tae’i napogau’ kadake lako kalemu.

31Da mukemburui tu to masa’ga’ sia da mupilei la umpeolai moi misa’ tu lalanna,

32belanna Nakagi’gi’ PUANG tu to leko’, apa iatu to bulo lollong Naposangmane tongan.

33Iatu tampak ropunNa PUANG lan lu banuanna to tang mekaaluk, apa iatu inan nanii torro to malambu’ Napamasakke.

34Iake denni to pa’tellean, Naissan Ia kalena untelle-tellei, apa Nakaturu-turui tu to umpamadiongan pena-anna.

35Iatu to kinaa la umpomana’ kamala’biran, apa iatu to baga la ungkabu’tui siri’.


  Share Facebook  |  Share Twitter

 <<  Amsal 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel