Alkitab Mobile SABDA
[VER] : [TORAJA]     [PL]  [PB] 
 <<  Bilangan 18 >> 

Passanan tengkona sia saro ra’ta’na to Lewi

1Ma’kadami tu PUANG lako Harun, Nakua: Iatu iko sia anakmu sia rapummu la pada mipassan tu kakadakean untodo inan maindan: sia iatu iko sia anakmu la mipassan tu kakadakean, tu mipogau’ lan katominaan.

2Ia duka tu mai siulu’mu, tu suku Lewi, tu sukunna ambe’mu, suai ammu mengkareke’ sola, anna turu’ko sia la natunduiko sia ungkamayaiko, la iko la iatu mai anakmu, dio tingo Kema Kasa’bian:

3anna pogau’i tu passanan tengkona untunduiko, sia ia duka tu passanan tengkona diona mintu’ kamayana tenda; apa da namengkareke’ lako pareanan maindan sia inan pemalaran, da namate la tau iato la kamu.

4Sia anna turu’ko sia la natunduiko sia umpogau’ passanan tengkona diona Tenda Kasitammuan unturu’ mintu’ pentoean tenda; apa iatu to tang sipatu mengkareke’, da napengkareke’ikomi.

5Apa iatu kamu la mipogau’ tu passanan tengkomi dio inan maindan sia inan pemalaran, kumua damo nanii kare’dekan ara’Na Puang tu to Israel.

6Manassa Aku Kalena unnalai tu siulu’mi, iamotu to Lewi dio mai to Israel, butung to misa’ pamengan lako kalemi, belanna to disorong lako PUANG tu tau iato la untoe pentoean dio Tenda Kasitammuan.

7Apa iatu iko sola tu mai anakmu, la musisolan untoe katominaammi lan mintu’ apa sipatu dipogau’ dio lu inan pemalaran sia diona tu mai apa dio boko’ kulambu, sia la mentoekomi dio. Susito misa’ pentoean, tu dipa’kamasean, Kukamaseikomi katominaan tu mitoe; apa iatu to tang sipatu mengkareke’, ke mengkareke’i, la dipatei.

8Ma’kadami tu PUANG lako Harun, Nakua: Manassa Aku kalena umbenko tu kamakaritutuan diona pa’duruk lako Kaleku; iatu mintu’ pamengan maserona to Israel, Kukamaseangko sola anakmu la mipotaa masero, iamotu misa’ aluk dipondok matontongan.

9Iatu pamengan tarru’ masero, tang ditunu, inde sia tu la mupotaa: mintu’ pamengan pemala’na la iatu mintu’na dipokande dipemalaran la iatu mintu’na diposuru’ pengkalossoran sia mintu’na diposuru’ pangakuan sala, tu napemalaran lako Kaleku, iamoto tu pamengan tarru’ masero la mupotaa sola anakmu.

10La mukande susito apa tarru’ masero; mintu’ muane la ungkandei; iatu iannato sipatu mupoapa masero.

11Inde sia tu la mupotaa, iamotu dipotaa dipamarimbangan dio mai mintu’ pemala’ disorong ditarima sule, tu napennoloan to Israel; Kubenko sia Kuben duka tu mai anakmu muane sia tu mai anakmu baine, misa’ aluk dipondok matontongan; minda-minda masero tu to lan banuammu, ma’din ungkandei.

12Iamotu mintu’ melona dio mai minna’ sia mintu’ melona dio mai uai anggoro’ ba’ru sia gandung, tu bunga’na dipennoloan PUANG, la Kubenko.

13Iatu bunga’ pealanna dio mai mintu’na bura padang, tu dipennoloan lako PUANG, la mupotaa; minda-minda masero tu to lan banuammu ma’din ungkandei.

14Mintu’ tu apa pepayuammo dio lu to Israel, la mupoapa.

15Mintu’ tu bunga’na urrubak pa’tambukanna indo’na dio mai kepenaanna, tu dipennoloan lako PUANG, dio mai ma’rupa tau ba’tu dio mai patuoan, la mupotaa; sangadinna iatu anak pa’bunga’na tolino sipatu la mula’bak, sia ia duka tu anak bunga’na patuoan maruttak sipatu la mula’bak.

16Iatu la’bakna la muben ke sangbulanmi dadinna sitinaya dianggaranni, iamotu lima sikele’, situru’ sikele’ maindan, tu duangpulo gera angga’na.

17Apa iatu bunga’na anak sapi, domba ba’tu bembe’ da mula’bakki; belanna apa masero; iatu rarana la mupi’pikan inan pemalaran sia iatu lompona la mutunu dipopemala’ pantunu, la dipobau busarungngu’ lako PUANG.

18Apa iatu duku’na la mupotaa, susito tu dada pemala’ disorong ditarima sule sia pesese kananna la mupotaa dukato.

19Iatu mintu’ pa’duruk dio mai pamengan masero, tu napennoloan to Israel dipopa’duruk lako PUANG, la Kubenko sia la Kuben tu mai anakmu muane sia anakmu baine, tu misa’ aluk dipondok matontongan, iamotu misa’ basse sia matontongan dio oloNa PUANG lako kalemu sia bati’mu.

20Ma’kadami tu PUANG lako Harun, Nakua: Iatu tondokna tau iato mai tae’ ammu la umpotaa mana’i lan, sia pa’lak sangtempe’ tae’ mula umpotaai. Akumo tu la mupotaa sia mupotaa mana’ dio lu to Israel.

21Apa iatu to Lewi, manassa la Kuben tu mintu’ pissanna taa sangpulona bura padang sia patuoan lan Israel la napotaa mana’ belanna diona pentoean natoe, iamotu pentoean dio Tenda Kasitammuan.

22Belanna iatu to Israel tae’mo na la urreke’ Tenda Kasitammuan, naurungan untanggungi tu kasalan, anna mate.

23Sangadinna iatu to Lewi la untoe pentoean lan Tenda Kasitammuan sia la umpassanni tu kasalanna, iamotu misa’ aluk dipondok matontongan nasiosso’i sia tang ketaa mana’ dio lu to Israel.

24Belanna iatu to Lewi la Kuben pissanna taa sangpulona, tu napopa’duruk to Israel lako PUANG; iamoto angKu ma’kada diona tau iato mai kumua tae’ na la ketaa mana’ dio lu to Israel.

25Ma’kadami tu PUANG lako Musa, Nakua:

26La ma’kadako lako to Lewi sia kuanni kumua: Iake mutarimai tu pissanna taa sangpulona bura padang sia patuoan dio mai to Israel, tu Kuala dio mai tau iato, angKu benkomi, la mipotaa mana’, la mipennoloan la dipopa’duruk lako PUANG tu pissanna taa sangpulona dio mai taa sangpulona bura padang sia pissanna patuoan.

27Na iatu kamu la disanga pa’durukmi, dipasusito gandung diala dio mai panglulluran sia iatu dialanna dio mai pa’parran bua anggoro’.

28Sia ia duka tu kamu la mipennoloan lako PUANG tu pa’duruk dio mai mintu’ pissan taa sangpulona bura padang sia patuoan, tu mitarima dio mai to Israel, sia iatu pa’duruk iato, tu dipennoloan lako PUANG, la miben to minaa Harun.

29Dio mai mintu’ apa napa’bengan tau lako kalemi, la mipennoloan tu mintu’ pa’duruk iato lako PUANG, iamotu taa dipamaserona diala dio mai mintu’ apa melo.

30Sia la ma’kadako lako tau iato mai, kumua: Iammi pennoloanni tu melona dio mai apa iato la dipopa’duruk, ke to Lewi, la dipapada gandung dio mai panglulluran sia iatu dialanna dio mai pa’parran anggoro’ tu iannato.

31La mikande sola to lan banuammi tu apa iato dio lu mintu’ inan, belanna la miposaro diona pentoeammi dio Tenda Kasitammuan.

32Tae’ mila umpassan kasalan tu iannato, podo ke mipennoloanni tu melona dio mai apa iato. Iake susito tae’ mila umpakasarembanganni tu pamengan maserona to Israel, kumua da mimate.


  Share Facebook  |  Share Twitter

 <<  Bilangan 18 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2019
Alkitab.SABDA.org

Android.SABDA.org
SABDA.mobi
Bantuan
Dual Panel

Laporan Masalah/Saran