Dual PanelPatiro mendeata diona domba laki sia bembe’ laki
1Iatonna ma’tallung taunmo ma’parenta tu datu Belsazar dipapayanmi lako kaleku, te aku Daniel, tu misa’ patiro mendeata, tonna mangkamo tu patiro mendeata dolo payan lako kaleku.
2Kutiromi lan patiro mendeata, – diona’ kota Susan ditambakuku dio propinsi Elam, tongku tiroi tu iannato, – kutiro lan patiro mendeata iato, kumua, diona’ biring salu Ulai.
3Iatongku bangunammi tu matangku, kutiromi, tonganna den misa’ domba laki kutiro bendan sambalinna lu salu; den tu tandukna da’dua, kalando dua tu tandukna, iatu misa’ mandu kalando na iatu misa’na, iatu kalandona undi tuo.
4Kutiro tu domba laki iato messendok ma’palulako matampu’, sia ma’palurekke sia ma’palusau’, tae’ misa’ olo’-olo’ ungkulle untanananni; sia tae’ misa’ tau ungkullei merrampanan lan mai limanna, sia umpogau’ bang lalan penaanna sia umpalayuk kalena.
5Apa iatongku marassan umpemarangai, kutiromi tu misa’ bembe’ laki sae dio mai rampe matampu’ umpasitarru’-tarru’ mintu’ kuli’na padang, tang ullese padang; na iatu bembe’ laki iato misa’ tu tandukna kalle-kallean tuo lan mai kasiallaran matanna.
6Saemi lako to’ domba laki, ketanduk patomali, tu kutiro bendan sambalinna lu salu, nama’dondo lako situang kamasarrangan mawatangna.
7Kutiromi mengkareke’ tarru’ lako domba iato, sengkean tongan ussendokki, nale’toi tu tandukna patomali, naurunganni tae’mo kamabukuanna tu domba la bendan unneai; napembassanammi tu domba rokko padang, anna lullu’ bannangi, na moi misa’ tau tae’ urrampananni lan mai kuasanna.
8Iatu bembe’ laki umpatarompo’ tongan kalena, apa iatonna paamo, le’tomi tu tanduk kapua, anna tuo tu a’pa’ tanduk kalle-kallean dio inanna, tu tingo lako a’pa’ mata angin dao langi’.
9Iato misa’na mentaruk misa’ tanduk lan mai, tu pamulanna bitti’, apa tarru’ mengkapua ma’palusau’, ma’palulako rampe matallo sia ma’palulako Padang ballo.
10Satarompo’-rompo’nami sae langngan ma’dandan maritik dao langi’, nadao mai tu ma’dandan maritik, iamotu mai bintoen, naronnosan ba’tu pira-pira rokko lino, anna lullu’i.
11Umpatarompo’ duka kalena unnea arungna ma’dandan maritik, sia naputtai tu pemala’ allo-allo lako Puang sia nasongkan tu inan maindanNa.
12Sia patodo-tintingmo, belanna umpondok misa’ kamenomban, anna umputtai pemala’ allo-allo; sia untibe kamanapparan rokko padang, na apa duka tu napogau’ umpabu’tuanni kamauparan.
13Kurangimi tu misa’ to masero ma’kada, namisa’ to masero senga’ ma’kada lako tu to mangkamo ma’kada nakua: La sangapa dadi tu apa ditiro lan patiro mendeata iate, diona tu pemala’ allo-allo sia kapatodo-tintingan metakuran, inan maindan tae’ nadipamaindan sia iatu ma’dandan maritik dilullu’.
14Ma’kadami lako kaleku nakua: Sae lako penduang sa’bu ntallu ratu’ makaroen sia melambi’, namane dipemeloi sia dipasirundunan sule.
15Iatongku tiroi, te aku Daniel, tu patiro mendeata iato sia moraimo’ la unnissanni tu battunanna, pakalan bendanmi dio tingayoku tu misa’ tau tu susi bang misa’ muane.
16Sia kurangi tu gamara tau daona lu Ulai, tu nakua: E Gabriel! battuananni lako tau iate tu patiro mendeata iato.
17Saemi dio tu kuninna bendan; iatonna saemo, tirambanmo’ angku tukku rokko padang, apa ma’kada lako kaleku nakua: Tandai, e ma’rupa tau, kumua iate patiro mendeata iate umpatu attu ma’katampakanna lino.
18Iatonna marassan ma’kada lako kaleku, limpumo’ sia lumbang rokko padang; apa naremme’na’ anna pabendanna’ sule,
19sia ma’kada nakua: Manassa la kupokadangko tu apa la dadi, ke katampakanna kare’dekan ara’, belanna iatu patiro mendeata iato umpatu manassana attu ma’katampakanna.
20Iatu domba laki, tu mangka mutiro, da’dua tandukna, umpatu datu Media sola Persia.
21Na iatu bembe’ laki, kalando bulunna, iamo datu Yunani, na iatu tanduk kapua dio pararra’ matanna, iamo bunga’ datunna.
22Le’tomi tu tanduk kapua iato, nabu’tu a’pa’ sondana, iamotu a’pa’ kadatuan la bu’tu lan mai bangsa iato, apa tae’ anna matoto’ susi datu bunga’na.
23Iake tampaknami kadatuanna tu tau iato mai, ke ma’kalolokannami tu gau’na to bulituk, la bendan misa’ datu, tu matoro lindona sia lando pa’du.
24Iatu kamawatanganna la matoto’ – apa tae’ natete dio kamawatanganna kalena – sia la metakuran tu kapasangganganna, sia apa tu napogau’ umpabu’tuanni kamauparan; la nasanggang tu mintu’ to paa, sia ia duka tu mintu’ bangsa to masero.
25Sia tete dio kabulitukanna anna palaloi tu pa’pakenanna; la napakapua tu penaanna, sia nasanggangi buda tu to tae’ namangea. Sia la pabali-bali duka lako Arungna mintu’ arung, apa la sabu’ ia tang narumbu lima.
26Na iatu patiro mendeata diona makaroen sola melambi’, iatu apa mangka disa’bu’ dionato, tang balle. La mubuni bang tu patiro mendeata, belanna budapa allona namane sae.
27Sia aku te, Daniel, langga’mo’ sia ba’tu pirang-pirang allomo’ masaki; undinnato milikmo’, angku pengkaranganni tu datu. Napussakkimo’ te patiro mendeata iate, apa moi misa’ tau tae’ untandai.