Dual Panel1Inde sia tu mintu’ bangsa, tu Napatorropa PUANG, kumua Napolalanni untobai tu to Israel, iamotu to Israel tang untandaipa kapararian la unnala Kanaan.
2Ia manna napobannang to, kumua iatu ossoranna to Israel la melada’ parari, belanna Napopa’biasa Puang, tu mintu’ to tang manakkapa parari pirambongi’.
3Torropa tu lima arungna kota to Filistin na mintu’ to Kanaan sia to Sidon sia to Hewi, tu untorroi buntu Libanon, randuk dio mai buntu Baal-Hermon sae lako batatta ma’palulako Hamat.
4Iatu bangsa iato mai Napamanassa Puang Nanii untobai tu to Israel kumua anNa issanni, ba’tu naturu’ siai tu pepasan Napasan PUANG lako nene’ to dolona nalopian Musa.
Diona to parengnge’ Otniel
5Ma’tondokmi tu to Israel dio lu to Kanaan, to Het, to Amori, to Feris, to Hewi na to Yebus;
6napobainemi to Israel tu anakna tau iato mai sia napakemuane tu mai anakna lako anakna tau iato sia napengkaolai tu deatanna.
7Napogau’mi to Israel tu apa kadake dio pentiroNa PUANG, tang nakilalaimo tu PUANG, Kapenombanna, sia umpengkaolaimo mintu’ Baal sia Asyera.
8Ma’lulu-lulu tonganmi tu kasengkeanNa PUANG lako to Israel, anNa sorongi tama kuasanna Kusyan-Risyataim, datu Aram lan lili’na Mesopotamia, anna mengkanorong tu to Israel lako Kusyan-Risyataim karua taunna.
9Attu iato meongli’mi tu to Israel lako PUANG, Napatulangdananni PUANG tu to Israel misa’ to mangrampanan, la urrampananni, iamotu Otniel, anakna Kenas, adinna Kaleb.
10Narampoimi PenaanNa PUANG tu Otniel, iamoto narengnge’i tu to Israel, anna tassu’ parari. Nasorongmi PUANG tu Kusyan-Risyataim, datu Aram, tama limanna, naurungan ussau’i tu Kusyan-Risyataim.
11Marampa’mi tu tondok iato lan patangpulo taunna. Na iatu Otniel, anakna muane Kenas, matemo.
Diona to parengnge’ Ehud
12Apa napogau’ pole’omi to Israel tu apa kadake dio pentiroNa PUANG; iamoto Napamawatangmi PUANG tu Eglon, datu Moab, ussau’ to Israel, belanna napogau’ tu apa kadake dio pentiroNa PUANG.
13Sipakulu-kulumi Eglon tu to Amon sia to Amalek, anna male parari; natalomi tu to Israel, naalai tu kota Koroma napa’tondokki.
14– Lumbang baka direngnge’mi tu to Israel lako Eglon, datu Moab, sangpulo karua taunna.
15Meongli’mi tu to Israel langngan PUANG, Napatulangdananni PUANG misa’ tu to mangrampanan, iamotu Ehud, bati’na Gera, suku to Benyamin, misa’ to kairi. Biasa nasua to Israel lao umbaa pa’kasian lako Eglon, datu Moab.
16Nagaragammi Ehud kalena tu misa’ pa’dang mataran patomali, agi sangsiku landona, natakinni lanna lu pakeanna dio pupu kananna.
17Nabaami tu pa’kasian lako Eglon, datu Moab. Iatu Eglon to maloppok.
18Iatonna mangkamo Ehud umpennoloanni tu pa’kasian iato, nasolammi tassu’ tu to mamulle pa’kasian.
19Sulemi misa-misai dio mai to’ inan batu dipa’ dio Gilgal, anna ma’kada nakua: Den sangbuku kada la kupokada buni lako olomi, o puangku. Nakuami tu datu: Kappako. Iatu mintu’ to umpennoloi, tassu’ lako salian.
20Tamami tu Ehud mennolo lako datu, tonna unnisung tu datu lan inan mengkadaoan iamotu inan pentuanginan, tu nanii misa-misa. Ma’kadami Ehud nakua: Den kadanNa Puang Matua la kuparampo lako puangku. Ke’de’mi tu datu dao mai isunganna.
21Naangka’mi Ehud tu lima kairinna, nanonokki tu pa’dang dio pupu kananna, natobokki tu tambukna datu,
22naurungan iatu mata pa’dang lambun nasang tama sola ulunna, napatibangkoi lompo tambukna tu mata pa’dang, belanna tae’mo nadu’dukki lan mai tambukna. Namane tassu’ unnola ba’ba dio boko’.
23Tamami tu Ehud dio tangdo’, tonna mangkamo untutu’i dolo tu ba’ba bilik mengkadaoan sia nagonting.
24Mane ra’pa’ tassu’ to saemi tu mai to mase’ponna natiroi iatu ba’ba bilik mengkadaoan tigontingmo; ma’kadami nakua: Manassa ma’to’kayupa tu datu lan inan pentuanginan.
25Masaimo tu tau iato mai ma’kampa sae lako kasirisan, apa tae’ duka nabungka’i datu tu ba’ba bilik mengkadaoan; pakalan naalami tu gonting nabungka’i tu ba’ba; mangngami, iatu puangna sumpandanmo mate.
26Iatonna marassan ma’peagi-agi tu tau iato mai, lussu’mi tu Ehud; nalendu’i tu inan batu dipa’, anna rampo mana’pa lako Seira.
27Iatonna rampomo lako, napannonimi tu napiri tanduk pua dao buntu Efraim, anna solo’ tu mintu’ to Israel dao mai nasolan, anna ia undoloanni.
28Ma’kadami lako nakua: Undikomi urrundu’na’, belanna Nasorongmo PUANG tu ualimmi, to Moab, tama limammi. Solo’mi tu tau iato mai, undi urrundu’i, naalami tu kalambananna Yordan tu ma’palulako Moab na moi misa’ tau tae’ naeloranni lamban lian.
29Attu iato napateimi tu to Moab agi-agi sangpulo sa’bu to malapu’ nasang sia to mawatang, moi misa’ tae’ lussu’.
30Susimoto tu Moab nalese lu rokko to Israel attu iato, anna marampa’ karuapulona taunna tu tondok Israel.
Diona to parengnge’ Samgar
31Undinnato den pole’omi bu’tu tu Samgar, anakna muane Anat; napateimi pebamba sapi ma’duri bassi tu to Filistin annan ratu’; susi dukamoto nanii urrampanan to Israel.