Dual PanelAtoran to minaa anna torro masero
1Ma’kadami tu PUANG lako Musa Nakua: Ma’kadako lako mintu’ to minaa, anakna Harun kumua: Moi misa’ to minaa da naruttakki kalena dio lu to mate sangbangsana,
2sangadinna sangdadian marengke’na iamotu indo’na, ambe’na, anakna muane, anakna baine sia siulu’na muane,
3sia anak daranna, tu tae’pa nakemuane sia marengke’ lako kalena, tu tang napobainepa tau – bannang iamoto nanii urruttakki kalena.
4Iatu to minaa, tu mendapo’mo da naruttakki kalena dio lu sangbangsana tete dio bainena, napourungi umpadadi kalena tang masero.
5Da nagalettungi tu ulunna sia da naku’ku’i tu randan danggo’na ba’tu da natori’-tori’i tu kalena.
6La masero tu tau iato mai dio oloNa Kapenombanna sia da napamatunai tu sanganNa Kapenombanna, belanna tau iato mai umpennoloan pemala’ pantunu, dipemalaran lako PUANG, iamotu kinandeNa Kapenombanna; iamoto sipatu la masero tu tau iato mai.
7Da napobaine misa’ baine kadake gau’, ba’tu baine mangkamo lao siri’na, ba’tu baine natantang muanena, belanna iatu to minaa masero dio oloNa Kapenombanna.
8La mubilang masero, belanna umpemalaran kinandeNa Kapenombammu; iamoto sipatu la mupamasero, belanna maseroNa’, Aku tu PUANG umpamaserokomi.
9Iamoto, iake denni misa’ anakna baine to minaa ma’gau’ sala, tete iato nanii umpamatuna ambe’na; manassa la ditunu mampu’ tu baine iato.
10Na iatu to minaa mandu kapua dio lu siulu’na, dibolloi minna’ pa’tokkoan tu ulunna sia ditokko belanna dipapakei pakean masero, iatu tau iato tae’ nama’din mangrundun ba’tu usserek-serek pakeanna.
11Moi misa’ to mate da nareke’i moi diona ambe’na ba’tu indo’na da naruttakki kalena.
12Da natampei tu inan maindan, kumua da napamatunai tu inan maindanNa Kapenombanna, belanna kaditokkoanna minna’ pa’tokkoanNa Kapenombanna dao ulunna: Akumo tu PUANG.
13Sia iapi tu anak dara la napobaine.
14Da napobainei tu to balu ba’tu baine ditantang, ba’tu baine mangka lao siri’na ba’tu baine kadake gau’na, iatu mintu’na te da napobainei, sangadinna misa’ anak dara dio mai sangbangsana tu la napobaine,
15kumua da napamatunai tu bati’na dio lu sangbangsana, belanna Akumo tu PUANG, tu umpamaseroi.
16Ma’kadami tu PUANG lako Musa Nakua:
17Kuako lako Harun, kumua: Minda-minda tu bati’ siosso’mu tu tattan kalena tae’ nama’din mareke’ la umpemalaran kinandeNa Kapenombanna.
18Belanna iatu mintu’ to tattan moi misa’ da namareke’, iamotu mai to buta, to kupi’, to karobe ba’tu to kalandong limanna ba’tu lentekna,
19ba’tu to le’to lentekna ba’tu limanna,
20ba’tu to bukku’, ba’tu to marangke kale ba’tu to ma’mata gara’, ba’tu to karresan, ba’tu to masaki kuli’, ba’tu to sanggang kamuaneanna.
21Iatu mintu’ bati’na Harun, to minaa, minda-minda tu tattan kalena, tae’ nama’din mareke’ la umpennoloan pemala’ pantunu, dipemalaran lako PUANG; den tattanna, iamoto natae’ nama’din mareke’ umpennoloan kinandeNa Kapenombanna la umpemalaranni.
22Iatu kinandeNa Kapenombanna, dio mai tu tarru’ maindanna sia dio mai maindanna, ma’din nakande.
23Apa tae’ nama’din sae lako to’ kulambu sia tae’ nama’din urreke’ inan pemalaran belanna tattan tu kalena, kumua da napamatunai tu mintu’ inan maindanKu, belanna Akumo tu PUANG, tu umpamaindanni.
24Susimoto tu Musa umparampoi tu mintu’ kada iate lako Harun sia lako anakna sia lako mintu’ to Israel.