Dual PanelDiona suru’ pengkalossoran
1Ma’kadami tu PUANG lako Musa Nakua:
2Pokadanni to Israel te kada iate: Iake denni tau kasalan natae’ naangga’i diona misa’ apa tu Nagagai PUANG umpogau’i, anna pogau’i tu misa’ apa iato:
3iake to minaa tu mangka dibolloi minna’ kasalan, napotete anna diparampo sala lako mintu’ tau, manassa la napennoloan lako PUANG tu misa’ anak sapi laki, tu tae’ tattanna belanna kasalanna, la diposuru’ pengkalossoran.
4Iatu sapi laki iato la nabaa lako to’ ba’ba Tenda Kasitammuan dio oloNa PUANG sia la naremme’ tu ulu sapi laki iato, anna tunui dio oloNa PUANG.
5Na iatu to minaa dibolloi minna’ la unnalai pira tu rara sapi laki iato, nabaai lako to’ Tenda Kasitammuan.
6Na to minaa iato la unnoton rakka’na tama rara iato, anna pi’pikki pempitu dio oloNa PUANG, dio tingayona kulambu inan maindan iato.
7Sia iatu to minaa iato urrarai tu tanduk inan pemalaran pantunuan dupa, tu bendan dio oloNa PUANG lan Tenda Kasitammuan; iatu mintu’ rara sapi laki tu torronapa la nabolloan diong to’ lette’ inan pemalaran dinii mantunu, tu bendan dio to’ ba’ba Tenda Kasitammuan.
8Mintu’ tu lompona sapi laki diposuru’ pengkalossoran la naalai dio mai, iamotu kampipi’na, sia mintu’ lompo dio tambuk barinni’ iato,
9sia iatu bale’ke’na da’dua sola tu lompo dio, sia iatu lompo aakna sia balaan atena; la naalai sola bale’ke’na,
10susitu diala dio mai sapi pemala’ kasalamaran; anna tunui to minaa dao inan pemalaran dinii mantunu.
11Sia iatu balulang sapi laki sia mintu’ duku’na sola ulunna sia lentekna sia tambuk barinni’na sia tai lanna tambuk barinni’na,
12iamoto mintu’ kalena sapi laki iato la nabaa lako salian to’ tenda, lako to’ inan masero, nanii tau umbolloan au; anna patamai kayu natunui; dio to’ inan dinii umbolloan au, la dinii untunu pu’pu’i.
13Iake kasalanni tu mintu’ kasirampunan to Israel natae’ naangga’i sia kabunian tu apa iato dio pentirona kombongan iato sia patengkan lako misa’ pepasanNa PUANG, tu tae’ nama’din dipogau’, napobannangi kasalan tu tau iato mai,
14manassa, ke nakanassai tu kasalan napogau’, iatu kombongan la umpemalaran misa’ anak sapi laki, tu diposuru’ pengkalossoran sia la nabaa lako tingayo Tenda Kasitammuan.
15Anna mintu’ pekaamberanna kasirampunan iato la urremme’ ulu sapi laki iato dio oloNa PUANG sia la natunu tau tu sapi laki iato dio oloNa PUANG.
16Na iatu to minaa dibolloi minna’ la naala pira tu rara sapi laki iato, nabaai tama Tenda Kasitammuan.
17Na to minaa iato la unnoton rakka’na tama rara iato, anna pi’pikki pempitu dio oloNa PUANG dio tingayona kulambu.
18Sia iatu rara pira la nararan tu tanduk inan pemalaran tu bendan dio oloNa PUANG lan Tenda Kasitammuan; iatu mintu’ rara sapi laki tu torronapa la nabolloan diong to’ lette’ inan pemalaran dinii mantunu, tu bendan dio to’ ba’ba Tenda Kasitammuan.
19Mintu’ tu lompona la naala dio mai sia la natunu dao inan pemalaran.
20La napogau’ lako sapi laki iate, susitu napogau’ lako sapi laki suru’ pengkalossoran; susimo la napogau’ to. Na susito iatu to minaa la umpadenanni kadiseroian kasalan tu tau iato mai, namane dipa’dei tu kasalanna.
21Mangkato la nabaa tu sapi laki lako salian to’ tenda, anna tunu pu’pu’i, susitu kamangkanna untunu pu’pu’ sapi laki, tu dipemalaran bunga’na. Iamote tu suru’ pengkalossoranna mintu’ kombongan.
22Iake kasalanni tu misa’ arung, natae’ naangga’i patengkan lako misa’ pepasanNa PUANG, Kapenombanna, tu tae’ nama’din dipogau’ napobannangi kasalan,
23manassa, iake nakanassai tu kasalan napogau’, la umpemalaran misa’ bembe’ laki, iamotu misa’ bembe’ laki, tu tae’ tattanna.
24La naremme’ tu ulu bembe’ laki iato sia la natunu dio to’ inan, tu dinii untunu pemala’ ditunu pu’pu’ dio oloNa PUANG; iamote tu suru’ pengkalossoran.
25La naoton to minaa tu rakka’na tama to’ rara suru’ pengkalossoran, anna raranni tu tanduk inan pemalaran dinii mantunu; iatu rara torronapa la nabolloan diong lette’ inan pemalaran dinii mantunu.
26Apa mintu’ tu lompona la natunu dao inan pemalaran, susitu lompona pemala’ kasalamaran. Na susito iatu to minaa la umpadenanni kadiseroian kasalan tu tau iato belanna kasalanna, namane dipa’dei.
27Iake kasalanni misa’ tau lan tondok natae’ naangga’i umpogau’ misa’ apa nagagai PUANG anna pobannangi tu tau iato kasalan,
28manassa, iake nakanassai tu kasalan napogau’ la napemalaran tu misa’ bembe’, iamotu misa’ bembe’ birang tae’ tattanna, belanna kasalan napogau’.
29La naremme’ tu ulu suru’ pengkalossoran iato, anna tunui tu suru’ pengkalossoran dio to’ inan dinii untunu pemala’ ditunu pu’pu’.
30La naoton to minaa tu rakka’na tama to’ rara, anna raranni tu tanduk inan pemalaran dinii mantunu; iatu mintu’ rara torronapa la nabolloan diong lette’ inan pemalaran iato.
31Apa mintu’ tu lompona la naala, susito biasanna, ke dialai tu lompona pemala’ kasalamaran, sia la natunu to minaa dao inan pemalaran, la dipobau busarungngu’ lako PUANG. Susimoto tu to minaa la umpadenanni kadiseroian kasalan tu tau iato, namane dipa’dei tu kasalanna.
32Iake umpemalaranni misa’ domba diposuru’ pengkalossoran, la napemalaran tu misa’ domba birang tang tattan.
33La naremme’ tu ulu suru’ pengkalossoran iato, anna tunui diposuru’ pengkalossoran dio to’ inan dinii untunu pemala’ ditunu pu’pu’.
34La naoton to minaa tu rakka’na tama to’ rara suru’ pengkalossoran, anna raranni tu tanduk inan pemalaran dinii mantunu; iatu mintu’ rara torronapa la nabolloan diong to’ lette’ inan pemalaran iato.
35Apa mintu’ tu lompona la naala, susito biasanna, ke dialai tu lompo domba dipopemala’ kasalamaran, sia la natunu to minaa dao inan pemalaran dao pemala’ pantunu, tu dipemalaran lako PUANG. Susimito tu to minaa la umpadenanni kadiseroian kasalan tu tau iato diona tu kasalan napogau’, namane dipa’dei tu kasalanna.