Alkitab Mobile SABDA
[VER] : [TORAJA]     [PL]  [PB] 
 <<  Kejadian 16 >> 

Diona Sarai sola Hagar

1Iatu Sarai, bainena Abram tae’ nama’dadian tau. Denmi misa’ kaunan baine dio mai Mesir nakurinni, disanga Hagar.

2Nakuami Sarai ungkuan Abram: Tonganna tang Napoelo’na’ PUANG la ma’dadian tau, iamoto melo ke sangampa’komi kaunanku, napadenan siana’ manii bati’. Napasituru’mi Abram tu pa’palakunna Sarai.

3Iatonna sangpulomo taunna tu Abram, untorroi tondok Kanaan, naalami Sarai tu Hagar, kaunanna dio mai Mesir, nabenni Abram muanena la napobaine.

4Sangampa’mi Abram tu Hagar, anna ma’tambuk. Iatonna sa’dingmi tu kalena kumua ma’tambukmo, natapa’mi tu puangna.

5Ma’kadami Sarai lako Abram: Iatu siri’ku diong riammi; kusorongmo tu kaunanku mati’, na randukna naissan tu kalena kumua ma’tambukmo, natapa’mo’, iamoto PUANG la umpaolaiki’ salunna.

6Nakuami tu Abram lako Sarai: Iatu kaunanmu poissanmu, pogau’i lako umba tu pa’poraiammu. Naa’ga asumi Sarai anna male mallai.

7Nakabu’tuimi Malaeka’Na PUANG sikandappi’ misa’ kalimbuang lan padang pangallaran, iamotu sikandappi’ kalimbuang dio to’ lalan lako tondok Syur.

8Nakuami: E Hagar, kaunanna Sarai, bu’tu umbako nii naumba la muola? Mebalimi: Mallaimo’ dio mai puangku Sarai.

9Nakuami tu Malaeka’Na PUANG lako: Suleko lako puangmu sia mengkanorongko lako.

10Sia Nakua polepa tu Malaeka’Na PUANG lako: La Kupopemba’ka’ tongan tu bati’mu, naurungan tang dikemba’ bilanganna.

11Sia Nakua pole siapa tu Malaeka’Na PUANG lako: Tonganna ma’tambukko sia la undadiangko misa’ pia muane, ammu sangai Ismael, belanna Natanannimoko talinga PUANG lan kamaparrisammu.

12Iatu pia iato la susi keledai lampung, sia la unnea mintu’ tau, anna mintu’ tau la unnea dukai: la ma’tondok sitingoan naninna mintu’ siulu’na.

13Nagente’mi Hagar tu PUANG, tu mangka ma’kada lako kalena: Kapenomban metiro lumbang, belanna nakua tu Hagar: Tonganna inde dukaraka te kunii untiroi tu Puang, tu untiro lumbangna’?

14Iamoto anna sangai tu kalimbuang iato: kalimbuang Lahai-Roi; tu lan kasiallaranna Kadesh, anna Bered.

15Napadadiammi Hagar misa’ pia muane tu Abram, anna iatu anakna Abram tu nadadian Hagar, nasangai Ismael.

16Iatonna attu undadian Ismael tu Hagar, karuamo pulona nnannan taunna tu Abram.


  Share Facebook  |  Share Twitter

 <<  Kejadian 16 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel