Alkitab Mobile SABDA
[VER] : [TORAJA]     [PL]  [PB] 
 <<  Kejadian 17 >> 

BasseNa Puang Matua lako Abram

1Iatonna ganna’mo kasera pulona ngkasera taunna tu Abram, ombo’mi tu PUANG lako kalena, sia ma’kada Nakua: Akumo Kapenomban Umpoissan angge maritik; la lolangko dio oloKu sia la lantuk tu penaammu.

2La Kutanan tu basseKu lan tangngata, sia Kupopemba’ka’ kalle-kalleangko.

3Malinguntu’mi tu Abram natukku rapa’ rokko padang; ma’kadami tu Puang Matua lako kalena Nakua.

4Iatu Aku manassa tonganna den tu basseKu lako kalemu, sia la napoambe’ko ba’tu sangapa budanna bangsa.

5Iatu sangammu tae’mo anna disa’bu’ Abram, sangadinna Abraham, belanna Kupaambe’namoko ba’tu sangapa budanna bangsa.

6La-Kupopembati’ kalle-kalleangko sia la Kupabu’tu ba’tu pira-pira bangsa dio mai kalemu sia iatu datu-datu la bu’tu dio mai kalemu.

7La Kutanan tu basseKu lan tangngata sia lako bati’ siosso’mu undinna, iamotu misa’ basse matontongan, kumua Aku tu mupoKapenomban sia napoKapenomban mintu’ bati’mu undinna.

8La kukamaseangko sia la Kukamasean bati’mu te padang munii mempue totemo, te mintu’ lili’na padang Kanaan la napopadang tontong sae lakona; na Aku la napoKapenomban.

9Sia Nakuapa tu Puang Matua lako Abraham: Iamoto la mukaritutui tu basseKu, la iko, la bati’ siosso’mu tu undinna na iko.

10Iamote tu basseKu tu pato’ mikaritutui, tu Kutanan lan tangngata sia lako bati’mu undinna, iamotu mintu’ muane la disunna’.

11La misunna’ tu kuli’ kasirisammi la tanda tasikna basse lan tangngata.

12Iatu pia muane karuamo allona dadinna sipatu la disunna’, tu mintu’ muane siosso’mi, sia iatu mintu’ to dadi lan banuammu sia mintu’ to dialli doi’ dio mai to mambela, tu tangianna bati’mu.

13La muane dadi lan banuammu, la iatu dialli doi’na, tae’ anna tang disunna’duka. Anna iatu basseKu lan batang kalemi mendadi misa’ basse matontongan.

14Iatu muane tang disunna’, tu tang la disunna’ tu kuli’ kasirisanna, la disabu’i lan mai bangsana, belanna naputtai tu basseKu!

15Sia Nakuapa tu Puang Matua lako Abraham: Iatu Sarai, bainemu, damo ammu sangai Sarai, sangadinna Sara tu sanganna.

16Belanna la kupamasakke na dio duka mai la Kunii ungkamaseiko misa’ pia muane, tonganna la Kupamasakke, sia la nanii bu’tu ba’tu pira-pira bangsa sia datunna ba’tu pira-pira bangsa la sun dio mai kalena.

17Malinguntu’mi tu Abraham natukku rapa’ rokko padang nametaa, anna ma’kada lan penaanna nakua: Ma’dinraka tu to saratu’mo taunna undadian misa’ pia? Ma’dinraka tu Sara, tu kaseramo pulona taunna la kianakpa?

18Ma’kadami tu Abraham lako Puang Matua nakua: O Puang, Ismael bangmo Mirinding pala’ natuo marampa’.

19Nakuami Puang Matua: Tonganna tongan, iatu Sara bainemu la napadiongko misa’ pia muane, la musangai Ishak, la Kutanan tu basseKu sola, iamotu misa’ basse matontongan, lako mintu’ bati’na undinna.

20Na diona Ismael Kupalalo tu palakummu. Tonganna tongan la Kupamasakke sia Kupopembati’ sia la Kupopemba’ka’ kalle-kallean, sia sangpulo dua tu datu la sun dio mai kalena sia la Kupopendadi misa’ bangsa kapua.

21Apa iatu basseKu la Kutanan lako Ishak tu la napadadiangko Sara ke attu susite taun pole.

22Napayaimi Puang Matua ma’kada lako, Nakendek langngan dio mai inan nanii Abraham.

23Naalami Abraham tu Ismael, anakna sia iatu mintu’ muane tu dadi lanmo banuanna sia iatu mangkanna naalli doi’, iamotu mintu’ muane sola nasangi lan banuanna Abraham, anna sunna’i tu kuli’ kasirisanna tonna allo ia duka bangsiamoto, susitu kadanNa Puang Matua lako kalena.

24Iatonna attu disunna’ tu kuli’ kasirisanna Abraham, kaseramo pulona ngkasera taunna,

25sia iatu Ismael sangpulo tallumo taunna, tonna disunna’ tu kuli’ kasirisanna.

26Misa’ri allo tonna allo ia bangsiamoto dinii ussunna’i tu Abraham sola Ismael, anakna.

27Sia mintu’ muane lan banuanna, iamotu to dadi lanmo banuanna sia mintu’ to dialli doi’ lako to mambela, mintu’naito sangbara’ disunna’ sola.


  Share Facebook  |  Share Twitter

 <<  Kejadian 17 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel