Alkitab Mobile SABDA
[VER] : [TORAJA]     [PL]  [PB] 
 <<  Kejadian 18 >> 

Kadadianna Ishak dipakatua pole

1Undinna ombo’mi tu PUANG lako Abraham dio to’ kayu tarpin Mamre, sirupang unno’ko’ tu Abraham dio to’ ba’ba tendana tonna sarrang allo.

2Anna bangunan matanna, natiroi den muane tallu bendan dio tingayona; iatonna tiromi, ma’dondomi dio mai to’ ba’ba tendana male untammui tu tau iato mai, anna tukku rapa’ rokko padang.

3Nama’kada nakua: O Puangku, iake denni kamamaseanta lako kaleku, da talendu’i bangna’.

4Da’ito anna baangki’ uai tau sidi’ la tabasean lette’ta, tasissare-sare indete to’ garonto’ kayu.

5La kubaangki’ roti sangsasa’ anna mole tu ta’ka’ta tamane tarru’; inang siappa’ dukamoki’ lempang dio to’ lantangku! Mebalimi tu tau iato: Pogau’mi susitu mupokadanna.

6Sasa-sasami male tama tendana tu Abraham lako Sara, nama’kada nakua: Madomi’ko unnala ta’pung manisak tallung bakku’, la’pa’-la’pa’i ammu rangginai.

7Ma’dondomi tu Abraham lako to’ inan sapi, naalami misa’ tu anak sapi kamalumemme’-memmeranna sia melo rupanna, anna benni solana, nasarra’i natollo’.

8Naalaomi Abraham tu dadi’ sola bumbungan na iatu anak sapi mangka ditollo’, napalenna’i dio tingayona tau iato mai; nabendan diong to’ garonto’ kayu sikandappi’ tau iato mai, tonna kumande tu tau.

9Nakuami tu tau iato mai lako Abraham: Umbami tu Sara, bainemu? Mebalimi nakua: Lan sia tenda.

10Nakuami: Tae’ nasalai tang sae pole’na’ lako kalemu, ketaun pole, attu susite, la denmo pia muane nadadian Sara, bainemu! Iatu kada iato narangi Sara tu bendan dio to’ ba’ba tenda Naboko’i.

11Iatu Abraham sola Sara matuamo, matessek tonganmo, na iatu Sara radanmo tu kanalambiranna bulanna.

12Iamoto anna metaa tu Sara nama’kada lan penaanna nakua: Ma’dinparaka la diong mai penaangku ke tang pa’belamo’ sia iatu muaneku matua dukamo?

13Ma’kadami tu PUANG lako Abraham: Ma’apari anna metaara tu Sara, nakua lan penaanna: Ma’din tonganpara’ka kianak, te matuamo’?

14Denraka apa tang dadi ke PUANG? Iake attu susite taun pole’ la saeNa’ lako kalemu, la denmo pia muane nadadian Sara.

15Meonganmi tu Sara kumua: Tae’ kumetaa, belanna mataku’. Nakuami tu Puang: Tae’, manassa metaako.

Abraham umpengkamoyan tondok Sodom

16Ke’de’mi tu tau sola tallui inde to dio mai anna ma’palulako tondok Sodom, anna male tu Abraham ussolanni.

17Nakuami tu PUANG: Ma’apari angKu la umbunianri Abraham tu apa la Kupogau’?

18Belanna iatu Abraham la dadi misa’ bangsa kapua sia kuasa, tu napobannang dinii umparongko’i tu mintu’ bangsa lan telino.

19Belanna mangkamo Kuturo ta’ba, dikua anna patudui tu mai anakna sia bati’na, la ungkaritutui lalanNa PUANG, la umpogau’ kamaloloan sia kamalamburan anNa palanda’i PUANG lako kalena tu apa mangka Napokadanni.

20Ma’kadami tu Puang Matua nakua: Tu belanna kapuamo tu sarro diong mai Sodom na Gomora sia belanna kakadakeanna tau iato mai lendu’ tonganmo,

21iamoto angKu mengkalao totemo la lao untiroi ba’tu napogau’ nasangmi susitu sarrona rampo lako Kaleku ba’tu tae’i, angKu issanni!

22Sepangmi tu tau sola duai nama’palulako Sodom, apa iatu PUANG torropa sola Abraham.

23Saemi tu Abraham umpentireke’i anna ma’kada nakua: Ma’apari na la umpasisabu’iri PUANG tu to malambu’ sola to kadake?

24Umbai den limangpulo tu to malambu’ lan tondok iato, ma’apari anNa la ussabu’iri Puang, natae’ Nakarimmanni tu tondok iato bannang dio te limangpulo to malambu’ lan?

25Toyang ia tondonna lalan dio mai Puang la umpogau’i tu susinnato, la umpasipatei to kadake tu to malambu’, butung Napasangtinti to kadake tu to malambu’; toyang ia tondonna lalan dio mai Puang to. Ma’apari Ia tu To Ma’paolai salunna te mintu’ lino anna tae’ra Nala umpasalunnai tu salunna?

26Ma’kadami tu PUANG kumua: Iake denni limangpulo to malambu’ Kukabu’tui lan tondok Sodom, manassa Kukarimmanni mintu’ tondok iato bannang dio tau iato.

27Ma’kada polemi tu Abraham nakua: Tonganna tongan losso’ sia barubuk balingku, kupengkabatta’imo sipa’kada Puang.

28Umbai iato limangpulo to malambu’ sosso’ lima, ma’apai anNa la ussanggangi dukai Puang tu tondok iato, belanna sosso’ lima tau? Nakuami Puang: Iake denni Kuappa’ patangpulo llima lan, tae’ angKu sanggangi tu tondok iato.

29Napasilambi’mi Abraham ma’kada lako Puang: Umbai den patangpulo tu to malambu’ lan. Mebalimi Puang Nakua: Tae’ angKu la umpogau’i belanna bannang dio to tau patangpulo.

30Ma’kada tu Abraham nakua: Da Naposengkei Puang te kadangku: Umbai den tallungpulo tu to malambu’ lan. Nakuami Puang: Iake denni tallungpulo tau Kuappa’ lan, tae’ angKu la umpogau’i.

31Ma’kadami tu Abraham: Umpengkabatta’i tonganmo’ kaleku ma’kada lako Puang: Umbai den duangpulo to malambu’ lan. Ma’kadami Puang: Belanna bannang dio to duangpulo tau, tae’ angKu la ussanggangi.

32Nama’kada pole tu Abraham, nakua: Da Naposengkei Puang te kadangku ia mannamo te pissan: Umbai den sangpulo tau lan. Nakuami Puang: Belanna bannang dio to sangpulo tau, tae’ angKu ussanggangi.

33Iatonna upu’mo kadanNa lako Abraham, malemi tu PUANG; sulemi tu Abraham lako inanna.


  Share Facebook  |  Share Twitter

 <<  Kejadian 18 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel