Dual PanelAbraham torro dio Gerar
1Ke’de’mi inde to dio mai tu Abraham nama’palusau’ Padang lo’na lu, torromi dio kasiallaranna tondok Kadesh anna Syur sia mempue dio tondok Gerar.
2Napokadami Abraham tu diona Sara, bainena nakua: siulu’ku. Mesuami tu Abimelekh, datu Gerar umbaai sae tu Sara.
3Apa sae tu Puang Matua lako Abimelekh bongi iato lan tindona ma’kada kumua: Tonganna tongan la mateko, bannang dio te baine mangka muala, belanna bainenamo tau!
4Apa tae’pa narumbu lenni Abimelekh, iamoto anna ma’kada nakua: O Puang, la Mipateiraka tu bangsa tang sala?
5Tang Abraham kalenaraka umpokadanna’ susite, kumua: Iate baine, siulu’ku? sia ia duka kalenamo tu baine iato ma’kada susite kumua: Iate muane siulu’ku. Mangkamo kupogau’ tu iannato naturu’ bannang pute sia lima mapindanku!
6Ma’kadami tu Puang Matua lako kalena lan tindo: Kuissan sia kumua bannang pute tu penaammu mangka umpogau’i to, sia mangkamoko Kugagai umpogau’ kasalan lako kaleKu, iamoto angKu tang untangga’ko urrumbui tu baine iato.
7Totemo pasuleanni tu bainena muane iato, belanna nabi tu muanena, anna passambayangangko, mumarendeng, apa iake tae’i ammu pasuleanni, issan bangmi, tae’ tang matemu sola tu mintu’ solamu!
8Millikmi tu Abimelekh tonna melambi’, anna tambai tu mintu’ solana lan banuanna, napokadai te mintu’ kada lako tau iato mai, lendu’mi mataku’na sola nasangi tinde tau.
9Natambaimi Abimelekh tu Abraham, nama’kada nakua: Penggauran apara te migaurangkan sia apara salaku lako kalemi, ammi pabu’tuanra’ kasalan kapua sola to kuparenta? mangkamo mipogau’ lako kaleku ba’tu pira-pira penggauran tang sipatu dipogau’.
10Sia nakua siapa tu Abimelekh lako Abraham: Apara tu nakita penaammi, ammi pogau’ri tu susinna to?
11Mebalimi tu Abraham: Belanna iatu passangangku, iake tae’i lan tondok iate tu to ungkataku’ Puang Matua, manassa la napateina’ diona baineku.
12Tonganna anak darangku duka sia, anakna ambe’ku, apa tangia anakna indo’ku, na iamo kupobaine.
13Susimoto, tonna suana’ Puang Matua tassu’ lan mai banuanna ambe’ku male lako padang tau, kukuami lako: Inde tu tanda kamamaseammu lako kaleku, tu la mupasomboanna’ umba-umba tu inan tarampoi, pokadai kumua siulu’muna’.
14Nasusi to naalami Abimelekh tu ba’tu pira-pira domba sia sapi sia muane sabua’ sia baine sabua’, nabenni Abraham sia iatu Sara, bainena Abraham napasule dukamo.
15Ma’kadami Abimelekh nakua: Tiroi, iatu padangku nata’pai nasang matammi, umbanna tu naala penaammi iamo minii torro.
16Nakuami lako Sara: Iatu siulu’mi mangka kuben sangsa’bu sikele’ salaka la misamboan siri’mi lako mintu’ to misisolan anna payan kumua tae’ misala.
17Napassambayangammi Abraham tu Abimelekh sola ma’baine sia mintu’ baine sabua’, anna kianak pole sule.
18Belanna napapirri’ PUANG tu inan taunna mintu’ baine lan banuanna Abimelekh, belanna pa’katumanganna Sara, bainena Abraham.