Dual PanelKamateanna sia kadipelianganna Sara
1Iatu Sara saratu’ duangpulo mpitu taunna, iamo angge tuona Sara.
2Matemi tu Sara dio Kiryat-Arba, iamotu Hebron lan lili’ Kanaan; anna sae tu Abraham umbatingi sia untangi’i.
3Bendanmi tu Abraham dio mai to’ batang rabukna bainena, anna sipa’kada to Het, nakua:
4Iatu aku te to saena’ sia to mentiruranna’ lan tondokmi; benna’ dikka’ liang kupomana’ dio tondokmi, angku sisi’i tu to mateku.
5Mebalimi tu to Het lako Abraham nakua:
6Perangii tu kadangki, puang! kamumo tu misa’ datu tarompo’ tongan lan tondokki; umbanna tu liangki mala’bi’, iamo minii umpeliangi tu to matemi; tae’kan misa’ tang la umpa’bengan liangna la dinii umpeliangi tu to matemi tama.
7Ke’de’mi tu Abraham anna tukku dio to’ tingayona to sipopadang padang iato, iamotu to Het.
8Sipa’kadami Abraham tu mai tau iato, nakua: Iake miringnganni tu naala penaammi angku sisi’i tu to mateku, perangiina’, sia tulungna’ mipalakuanna’ lako Efron, anakna Zohar:
9anna benna’ tu lo’ko’ Makhpela, tu lo’ko’na dio randan pa’lakna, anna benna’ pada tu allinna siamo, la kupoliang mana’ lan tondokmi!
10Iatu Efron dio duka unno’ko’ sola to Het. Nabalimi Efron, to Het, narangii talinga ma’dandanna to Het sia mintu’ to tama sun lan kota iato, nakua:
11Tae’ nasusi to! Perangiina’: iatu padang kubenkomi sia lo’ko’ lan kuben dukakomi, natingayoi mintu’ sangrara sangbukungku angku benkomi, peliang siai dio tu to matemi.
12Tukkumi tu Abraham dio tingayona mintu’ to ma’tondok.
13Ma’kadami lako Efron dio tingayona mintu’ to ma’tondok nakua: Iake naalai penaammi, la miperangii te kadangku. La kubaya’ tu alli padang; karangi tu doi’ dio mai kaleku, angku mane ma’din umpeliangi tu to mateku dio.
14Mebalimi tu Efron lako Abraham nakua:
15La miperangii te kadangku: iatu angga’na padang iato, a’pa’ratu’ sikele’ salaka, apaora to tu kitanna sola dua? Iamoto peliang bangmi dio tu to matemi.
16Napasituru’mi Abraham tu kadanna Efron, anna timbanganni pada tu napokadanna dio tingayona mintu’ to Het, tu a’pa’ratu’ sikele’ salaka, tu naangga’na to ma’baluk.
17Susimoto tu padangna Efron dio Makhpela dio rampe matallona Mamre, iamotu padang sola lo’ko’ lan sia mintu’ kayu dio padang iato,
18diben nasangmo Abraham to, dio tingayona to Het sia to tama sun dio babangan tondok, la napoapa.
19Mangkato napeliangmi Abraham tu Sara, bainena lan lo’ko’ dio padang Makhpela, dio rampe matallona Mamre, iamo Hebron dio lili’na Kanaan.
20Susimoto tu padang iato sola lo’ko’ lan nasorongmo to Het lako la napoliang misa.