Alkitab Mobile SABDA
[VER] : [TORAJA]     [PL]  [PB] 
 <<  Kejadian 25 >> 

Kamateanna Abraham

1Kebaine polemi tu Abraham umpobaine misa’ baine disanga Ketura.

2Nakianak te undadian Zimran sia Yoksan sia Medan sia Midian sia Isybak na Suah.

3Na Yoksan undadian Syeba sola Dedan. Iatu bati’na Dedan iamotu to Asyur sia to Letushim na to Leum.

4Iatu mintu’ muane nadadian Midian iamotu Efa sia Efer sia Henokh sia Abida na Eldaa. Mintu’ te, muane bati’na nasang Ketura.

5Lako ia Ishak nanii nasang ussorongi Abraham tu mintu’ apa naampui.

6Apa lako anak tang nabolai naben pa’pakatana, mangkato nasua nasangmi mallai dio mai Ishak, anakna; tonna tuopa tu Abraham nasuai lako rampe matallo, lako Padang matallo.

7Inde sia tu lambe’na sunga’na Abraham, angge tuona saratu’ pitungpulo llima taunna.

8Ka’tumi angin dipudukna Abraham sia ronta’mi tondon to batangna tonna matua indukmo banu’ karurungan, nadipatama batu dilobang dipasola rapunna.

9Napeliangmi Ishak sola Ismael, anakna, tama lo’ko’ Makhpela dio padangna Efron, anakna Zohar, to Het, sitingoan Mamre.

10Dio to padang naalli Abraham lako to Het. Indeto nanii umpalumpunni tu Abraham sola Sara, bainena.

11Napamasakkemi Puang Matua tu Ishak, anakna tonna matemo tu Abraham; torro diomi sikandappi’ bubun Lahai-Roi.

Bati’na Ismael

12Inde sia tu sanganna mintu’ anakna Ismael, anakna Abraham sola Hagar, baine to Mesir, pa’kurinanna Sara, tu umpadadian pia Abraham.

13Inde sia tu sanganna mintu’ muane nadadian Ismael, situru’ kadadianna: iatu pa’bunga’na Ismael iamo Nebayot, namane Kedar sola Adbeel sia Mibsam.

14Sia Misyma sia Duma sia Masa,

15sia Hadad sia Tema sia Yetur sia Nafish na Kedma.

16Inde sia tu mintu’ anak muane nadadian Ismael sia inde sia tu mai sanganna, pada unnii tondokna sia inanna, tu sangpulo dua datu pantan umpobangsa bangsana.

17Inde sia tu lambe’na sunga’na Ismael: saratu’ tallungpulo mpitu taunna; ka’tumi angin dipudukna sia ronta’mi tondon to batangna, nadipatama batu dilobang dipasola rapunna.

18Torromi tu tau iato mai randuk dio mai tondok Hawila sae lako Syur, matallona Mesir, ma’palulako Asyur. Na iatu tau iato ma’tondok sitingoan naninna mintu’ siulu’na.

Bati’na Ishak

19Inde sia tu tuna’na diona bati’na Ishak, anakna Abraham. Na Abraham undadian Ishak.

20Patangpulo taunna tu Ishak tonna pobainei tu Ribka, anakna Betuel, to Aram dio mai Padan-Aram, anak daranna Laban, to Aram.

21Iatu Ishak malaku tongan langngan PUANG diona bainena, belanna tamanang: Napalalomi PUANG tu palakunna, ma’tambukmi tu Ribka, bainena.

22Iatu pia’-pia’ sita’du-ta’du lan pa’tambukanna, iamoto anna ma’kada nakua: Iake susite, ma’apari narampoira’ te iannate? Malemi umpekutananni lako PUANG.

23Ma’kadami tu PUANG lako Nakua: Den da’dua bangsa lan pa’tambukammu, iatu da’dua to sangpetayanan sisarak sun lan mai inan taummu; iatu misa’ la mawatang ia na iatu misa’na sia iatu kakanna la napokaunan adinna.

24Tonna lambi’mi allona la kianak, den tonganmi da’dua pia rindu lan inan taunna.

25Tassu’mi tu bunga’na, mararrang, tae’ bang silaenanna to balulang kebulu: nasangaimi Esau.

26Tassu’mi tu siulu’na, pia muane sia, manda’ untoe kambutu’na Esau; nasangaimi Yakub. Iatu Ishak annanmo pulona taunna tonna dadi tu pia sola duai.

27Sakapua-puanami tu pia sola duai; iatu Esau manarang moasu sia tang rapa’ torro dio to’ banua, apa iatu Yakub misa’ to rapa’ penaa torro lan tenda.

28Iatu Esau napakaboro’ Ishak, belanna naporai Ishak ungkandei tu apa naala ke laoi moasu, apa iatu Ribka Yakub ia tu napakaboro’.

29Denmi pissan namangka tu Yakub ma’pare’de, saemi tu Esau dio mai padang bo’yo’ tongan.

30Nakuami tu Esau lako Yakub: Benna’ dikka’ kukandei titi’ pa’pare’de mararang-rarang, belanna bo’yo’ tonganna’te. Iamoto nasangai tau Edom.

31Ma’kadami tu Yakub lako Esau: Balukanni lako kaleku te allo ia bangsiamote tu katonganammu anak pa’bunga’.

32Nakuami tu Esau: Manassa aku te inang la mateku, apara gai’na lako kaleku tu katonganan anak pa’bunga’.

33Nakuami tu Yakub: Massumpako lako kaleku te totemo. Massumpami lako kalena, anna balukki tu katonganan anak pa’bunga’ lako Yakub.

34Mangkato nabenmi Yakub roti sola pare’de kadong barra’ tu Esau. Iatonna mangka kumande sia mangiru’, ke’de’mi male. Susimoto tang napakeangga’na Esau tu katonganan anak pa’bunga’na.


  Share Facebook  |  Share Twitter

 <<  Kejadian 25 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel