Alkitab Mobile SABDA
[VER] : [TORAJA]     [PL]  [PB] 
 <<  Kejadian 26 >> 

Ishak torro dio tondok to Filistin

1Saemi tu karorian pannang lan tondok iato, senga’ ia na iatu karorian bunga’na tonna linona Abraham, iamoto anna male tu Ishak lako Abimelekh, datu to Filistin dio Gerar.

2Ombo’mi tu PUANG lako kalena anna ma’kada Nakua: Da mulao rokko Mesir; torromoko dio padang la Kupokadangko.

3Torromoko butung to sae lan tondok iate, Aku la urrondongko sia umparongko’ko, belanna mintu’ te tana iate la Kuba’giangko sia lako bati’mu, sia la Kupalanda’ tu sumpa mangka Kuposumpa lako Abraham, ambe’mu.

4Sia la Kupopemba’ka’ tu bati’mu susi bintoen dao langi’ sia la Kuba’gian bati’mu mintu’ tana iate; lan bati’mu mintu’ bangsa lan te lino la unnappa’ karongkosan.

5Tu belanna naturu’mo Abraham tu kadangKu sia nakaritutui tu pangalukangku, iamotu pepasanKu sia tu apa Kupondok sia Sukaran alukKu.

6Torromi tu Ishak dio Gerar.

7Nakutanaimi pa’tondokan tu diona bainena, namebali nakua: Siulu’ku, belanna mataku’ umpokadai kumua bainena, nakua: Napateina’ manii pa’tondokan diona Ribka, belanna melo pantarisanna.

8Den pissan tonna masaimo torro dio mentiromi tu Abimelekh, datu to Filistin dao mai pentiroanna, anna ta’pai matanna tu Ishak marassan sibarruga Ribka, bainena.

9Natambaimi Abimelekh tu Ishak anna kuanni: Manassa bainemi te baine iate, ma’apai ammi kua: siulu’ku? Mebalimi tu Ishak lako nakua: Belanna kusanga la kupomate.

10Nakuami Abimelekh: Ma’apai ammi pogau’i susito lako kaleki? Maraa bangsia te mai bangsa iate sangampa’ bainemi, apa susirito kumua la minii umpabu’tuangkan misa’ sala!

11Napa’parentammi Abimelekh lako makalima’na tau iato, nakua: Minda-minda umpatumbai lako te tau iate ba’tu iatu bainena, la mate dipongko.

12Mangambo’mi tu Ishak lan tondok iato, nalan taun ia dukato, natammumi manglokkon pessaratu’, belanna Napamasakke PUANG.

13Sugi’mi tu tau iato, samasai-sainna sasugi’-sugi’nami naurungan mandu tongan sugi’.

14Den bembe’ sola domba tu daka’na, sapi sia kaunan buda, naurunganni nakemburu to Filistin.

15Mintu’ bubun nabo’bok kaunanna ambe’na tonna linona Abraham, ambe’na, nabumbunmo to Filistin, naponnoimo litak rokko.

16Nakuami tu Abimelekh lako Ishak: Mallaikomi dio mai kaleki, belanna mandu paamokomi anna kami.

17Soro’mi tu Ishak inde to dio mai, anna pabendan tendana dio lombok Gerar, anna torro dio.

18Tonna iato nakaroi polemi Ishak tu mintu’ bubun dibo’bok tonna linona Abraham ambe’na, tu mangka nabumbun to Filistin, tonna matemo tu Abraham anna mintu’nato nasangai Ishak susitu nasanganni ambe’na.

19Iatonna marassan tu mintu’ kaunanna Ishak mangkali-kali dio lombok iato, naappa’mi tu misa’ kalimbuang tang mate.

20Sipakkami to manglaa to Gerar tu to manglaana Ishak nakua: Uaingki kami te. Iamoto anna sangai Esek tu bubun iato, belanna sipakkamo tau iato mai.

21Nabo’bok poleomi tu bubun senga’, sipakka poleomi diona bubun iato, iamoto anna sangai Sitna tu bubun iato.

22Tilelemi inde to dio mai tu Ishak anna bo’bok bubun senga’, natae’mo nasipakkai, nasangaimi Rehobot, anna ma’kada nakua: Totemo nabenmoki’ kamalonaran PUANG sia la memba’ka’ki’ lan te tondok.

23Undinnato malemi inde to dio mai langngan Bersyeba.

24Iatonna bongi iato, ombo’mi tu PUANG lako kalena, anna ma’kada Nakua: Akumo tu Kapenombanna Abraham, ambe’mu; da mumataku’ belanna Kurondongko sia la Kupamasakkeko sia la Kupopemba’ka’ tu bati’mu tete dio Abraham, taungKu.

25Napabendanmi Ishak tu inan pemalaran inde to dio, anna massambayang ussa’bu’ sanganNa PUANG, sia napabendan tu tendana dio. Nabo’bok polemi kaunanna Ishak misa’ bubun inde to dio.

26Saemi tu Abimelekh dio mai Gerar sola Ahuzat, sangmuanena na Pikhol, pa’baraninna, umpessitiroi Ishak.

27Nakuami tu Ishak lako: Ma’apai ammi sae umpessitiroina’ na mikabiri’na’ sia misuamo’ mallai lan mai tondokmi?

28Mebalimi nakua: Payan mentolino lako kaleki kumua narondongkomi PUANG, kikuami: Sipatu la den tu basse tang simallaran ba’teng dio patomalinta, iamotu kamu anna kami sia la untanankan basse lako kalemi, kumua:

29tae’ ammi la umpogau’ kadake lako kaleki, susi dukato tu kaminna tae’ kirumbu lenkomi sia moi misa’ tae’ kipogau’ lako kalemi sangadinna kameloanri, na iatonna pirangbongi’ tongki suakomi male, mipomelo duka sia. Manassa Napamasakke tongankomi PUANG totemo.

30Natoratumi Ishak tu tau iato mai, anna kumande sia mangiru’.

31Mela’bikmi millik tu tau iato mai, anna sibasse tang la simallaran ba’teng; naelorammi Ishak male sule, namale marampa’ tu tau iato mai.

32Iato allo iato saemi tu mintu’ kaunanna Ishak umpokadanni tu diona bubun nabo’bok nakua: Kikabu’tuimo tu uai.

33Nasangaimi Syeba, iamoto anna disanga Bersyeba tu tondok iato sae lako totemo.

34Nasusi to, iatonna patangpulomo taunna tu Esau, umpobainemi Yudit, anakna Beeri, to Het, sia Basmat, anakna Elon, to Het.

35Iatu iannato umparosso penaanna Ishak sola Ribka.


  Share Facebook  |  Share Twitter

 <<  Kejadian 26 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Dual Panel Dual Panel